74. Concerning the King of Medyam
73. Concerning the first judgment of Adrami, King of Rome / Kebra Nagast / 74. Concerning the King of Medyam 75. Concerning the King of Babylon

፸፬ ፡ በእንተ ፡ ንጉሠ ፡ ምድያም ።

 

ንጉሠ ፡ ምድያምሂ ፡ ዘርአ ፡ ሤም ፡ ውእቱ ፤ እስመ ፡ ዘርአ ፡ ይስሐቅ ፡ ዔሳው ፡ ውእቱ ፡ ዘወፅአ ፡ እምከርሠ ፡ እሙ ፡ እንዘ ፡ ይእኅዞ ፡ ያዕቆብ ፡ በሰኰናሁ ፡ ወሄደ ፡ ብኵርናቱ ፡ ለዔሳው ፡ በእንተ ፡ ተብሲለ ፡ ብርስን ። ወበስመ ፡ ጽዕለቱ ፡ ተሰምየ ፡ ስመ ፡ መንግሥቱ ፡ እስመ ፡ ኤዶም ፡ ትርጕምናሁ ፡ ብርስን ፡ ብሂል ፤ ወበእንተዝኬ ፡ ተሰምዩ ፡ ዘርአ ፡ ዔሳው ፡ ኤዶማውያነ ። እስመ ፡ በስጥመተ ፡ ከርሡ ፡ ኀደገ ፡ ወተስዕረ ፡ እምብኵርናተ ፡ ዘርአ ፡ ሴም ። እስመ ፡ ለእመ ፡ ኢተአስረት ፡ ነፍስ ፡ በትዕግሥት ፡ ያወርዶ ፡ ለኵሉ ፡ ዘሥጋ ፡ ፍትወተ ፡ ከርሥ ፡ ውስተ ፡ መሥገርት ፤ እስመ ፡ ሥጋሰ ፡ ሥሥዕት ፡ ወነፍስሰ ፡ እስርት ፡ በትዕግሥት ፤ ወበእንተዝ ፡ ይቤ ፡ ጳውሎስ ፡ ዘኢትፈቱ ፡ ነፍስ ፡ ትፈቱ ፡ ሥጋ ፡ ወዘኢትፈቱ ፡ ሥጋ ፡ ትፈቱ ፡ ነፍስ ፡ ወክልኤሆን ፡ ይትኣበያ ፡ በበይናቲሆን ። ለእመ ፡ አጥብዐ ፡ ብእሲ ፡ ወኀብረት ፡ ነፍሱ ፡ ምስለ ፡ ፍትወተ ፡ ሥጋሁ ፡ ይከውን ፡ ከመ ፡ ዳያብሎስ ፤ ወለእመሰ ፡ አሰረ ፡ ሥጋሁ ፡ ወኀብረ ፡ ምስለ ፡ ፍትወተ ፡ ነፍሱ ፡ ይከውን ፡ ከመ ፡ ክርስቶስ ፤ እስመ ፡ ኵሉ ፡ ብእሲ ፡ ዘየሐውር ፡ በፍኖት ፡ ርትዕት ፡ ርእሱ ፡ ክርስቶስ ፡ ይቤሉ ፡ ሐዋርያት ። ወእግዚእነሂ ፡ ይቤሎሙ ፡ ለአርዳኢሁ ፡ በመንፈስ ፡ ሖሩ ፡ ወፍትወተ ፡ ሥጋክሙ ፡ ኢትግበሩ ፤ ወዘንተ ፡ ሰሚዖሙ ፡ ኀደጉ ፡ ኵሎ ፡ ፍትወተ ፡ ሥጋ ፡ ወይቤልዎ ፡ ለእግዚእነ ፡ ናሁኬ ፡ ኀደግነ ፡ ኵሎ ፡ ወተለውናከ ፡ ምንት ፡ ዐስብነ ። ወይቤሎሙ ፡ መድኀኒነ ፡ እስመ ፡ ተመሰልክሙ ፡ በሥጋ ፡ ከመ ፡ መላእክት ፡ ወትገብሩ ፡ ኀይለ ፡ ከማየ ፤ ወናሁ ፡ አባሕኩክሙ ፡ ታንሥኡ ፡ ምዉታነ ፡ ወወሀብኩክሙ ፡ ስልጣነ ፡ ትፈውሱ ፡ ድውያነ ፡ ወትኪዱ ፡ ኵሎ ፡ ኀይለ ፡ ጸላኢ ፤ ወበዳግም ፡ ምጽአትየ ፡ ትኴንንዎሙ ፡ ወታስተኀፍርዎሙ ፡ ለ፲ወ፪ ፡ ነገደ ፡ እስራኤል ፡ በእንተ ፡ ዘኢአምኑ ፡ ኪያየ ፡ ወአስተሐቀሩ ፡ ስብሐትየ ፤ ወለእለሰ ፡ የአምኑ ፡ ብየ ፡ ታዐብይዎሙ ፡ ወታስተፌሥሕዎሙ ፡ ምስሌክሙ ፡ በመንግሥትየ ፠ ፠ ፠