73. Concerning the first judgment of Adrami, King of Rome
72. Concerning the King of Rome [Constantinople] / Kebra Nagast / 73. Concerning the first judgment of Adrami, King of Rome 74. Concerning the King of Medyam

፸፫ ፡ በእንተ ፡ ቀዳሜ ፡ ፍትሑ ፡ ለአድራሚ ፡ ንጉሠ ፡ ሮም ።

 

ወይቤሎሙ ፡ ስምዑኒ ፡ ዘእፈትሕ ፡ ለክሙ ፤ ለእመ ፡ ሠረዋ ፡ አሕሩገ ፡ ጕንዱ ፡ ሥረዎን ፡ ወኵሎን ፡ ለከ ፡ ወለእመ ፡ በልዓ ፡ ቈጽለ ፡ አዕጹቅ ፡ ወጽጌ ፡ ቆዕ ፡ ንሣእ ፡ ቅርፅ ፡ ፀምሮን ፡ ወደቂቆን ፡ እለ ፡ ኢተበኵራ ፤ ወእለሰ ፡ ተበኵራ ፡ ወወለዳ ፡ ኅድግ ፡ ሎቱ ፡ ለባዕለ ፡ አባግዕ ። ወአንከርዎ ፡ ኵሎሙ ፡ እለ ፡ ሰምዑ ፡ አውሥኦተ ፡ ፍትሑ ። ወይቤ ፡ በልጣሶር ፡ በአማን ፡ ዝንቱ ፡ ፍትሕ ፡ ፍትሐ ፡ ሕዝበ ፡ አምላከ ፡ እስራኤል ፡ ወእምይእዜሰ ፡ ለዘሂ ፡ ይትዋቀሥ ፡ ፍታሕ ፡ ወለዘሂ ፡ ይፀብእ ፡ ፅባእ ፡ ወለዘሂ ፡ ይትኴነን ፡ ኰንን ፡ ወለዘሂ ፡ የሐዩ ፡ አሕዩ ፡ ወለኵሉ ፡ በከመ ፡ ፍትሑ ፡ ፍታሕ ፡ ወንሥኣ ፡ ለዛቲ ፡ ሀገር ፡ ለከ ፡ ወለዘርእከ ፡ እምድኅሬከ ። ወሠምሩ ፡ ኵሎሙ ፡ ሰብአ ፡ ሀገረ ፡ ሮሜ ፡ ወአንገሥዎ ፡ ላዕሌሆሙ ፡ ወተፈሥሑ ፡ ቦቱ ፡ ዐቢየ ፡ ፍሥሓ ፤ እስመ ፡ በፈቃዶሙ ፡ ወበፈቃደ ፡ እግዚኣብሔር ፡ ኮነ ፡ ከመዝ ። ወአኀዞ ፡ ፈፀንት ፡ ለበልጣሶር ፡ ወእምአሜሃ ፡ ይልእኮ ፡ ኀበ ፡ ፀብእ ፡ ወውስተ ፡ ኵሉ ፡ ዘፈቀደ ፡ ወውእቱሰ ፡ ይነብር ፡ ሀገረ ። ወእምድኅረዝ ፡ ሞተ ፡ በልጣሶር ፡ ወአርትዐ ፡ መንግሥተ ፤ ወኮነት ፡ ሀገረ ፡ ሮሜ ፡ ለአድራሚ ፡ ለትውልደ ፡ ትውልዱ ፡ እስመ ፡ በፈቃደ ፡ እግዚኣብሔር ፡ ተውህበ ፡ ኵሉ ፡ መንግሥተ ፡ ዓለም ፡ ለዘርአ ፡ ሴም ፡ ወግብርናት ፡ ለዘርአ ፡ ካም ፡ ወጕዕትያ ፡ ለዘርአ ፡ ያፌት ፠ ፠ ፠