Chapter 108
Chapter 107 / Enoch / Chapter 108

1 ካልእ ፡ መጽሐፍ ፡ ዘጸሐፈ ፡ ሄኖክ ፡ ለወልዱ ፡ ማቱሳላ ፡ ወለእለ ፡ ይመጽኡ ፡ እምድኅሬሁ ፡ ወየዐቅቡ ፡ ሥርዐተ ፡ በደኃሪ ፡ መዋዕል ።

2 እለ ፡ ገበርክሙ ፡ ወትጸንሑ ፡ በእሉ ፡ መዋዕል ፡ እስከ ፡ ይትፌጸሙ ፡ እለ ፡ ይገብሩ ፡ እኩየ ፡ ወይትፌጸም ፡ ኀይሎሙ ፡ ለመአብሳን ፤

3 አንትሙሰ ፡ ጽንሑ ፡ እስክ ፡ ተሐልፍ ፡ ኀጢአት ፡ እስመ ፡ ሀሎ ፡ ስሞሙ ፡ ይደመሰስ ፡ እመጻሕፍተ ፡ ቅዱሳን ፡ ወዘርኦሙ ፡ ይትሐጐል ፡ ለዓለም ፡ ወመናፍስቲሆሙ ፡ ይትቀተሉ ፡ ወይጸርሑ ፡ ወየዐወይዉ ፡ በመካነ ፡ በድው ፡ ዘኢያስተርኢ ፡ ወበእሳት ፡ ይነድዱ ፡ እስመ ፡ ኢሀሎ ፡ ህየ ፡ ምድር ።

4 ወርኢኩ ፡ ህየ ፡ ከመ ፡ ደመና ፡ ዘኢይትረአይ ፡ እስመ ፡ እምዕመቁ ፡ ኢክህልኩ ፡ ላዕለ ፡ ነጽሮ ፡ ወላህበ ፡ እሳቱ ፡ ርኢኩ ፡ እንዘ ፡ ይነድድ ፡ ስቡሕ ፡ ወይትከበቡ ፡ ከመ ፡ አድባር ፡ ስቡሓን ፡ ወይትሀወኩ ፡ ለፌ ፡ ወለፌ ።

5 ወተስእልክዎ ፡ ለ፩እመላእክት ፡ ቅዱሳን ፡ እለ ፡ ምስሌየ ፡ ወእቤሎ ፡ ምንት ፡ ውእቱ ፡ ዝስቡሕ ፡ እስመ ፡ ኢኮነ ፡ ሰማየ ፡ አላ ፡ ላህበ ፡ እሳት ፡ ባሕቲቱ ፡ ዘይነድድ ፡ ወቃለ ፡ ጽራሕ ፡ ወብካይ ፡ ወአውያት ፡ ወሕማም ፡ ኀያል ።

6 ወይቤለኒ ፡ ዝንቱ ፡ መካን ፡ ዘትሬኢ ፡ በህየ ፡ ይትወደዩ ፡ መናፍስተ ፡ ኃጥኣን ፡ ወፅሩፋን ፡ ወእለ ፡ ይገብሩ ፡ እኩየ ፡ ወእለ ፡ ይመይጡ ፡ ኵሎ ፡ ዘነገረ ፡ እግዚአብሔር ፡ በአፈ ፡ ነቢያት ፡ እለ ፡ ሀለዉ ፡ ይትገበሩ ።

7 እስመ ፡ ሀለዉ ፡ እምኔሆሙ ፡ ጽሑፋን ፡ ወልኩዓን ፡ ላዕለ ፡ በሰማይ ፡ ከመ ፡ ያንብብዎሙ ፡ መላእክት ፡ ወያእምሩ ፡ ዘሀሎ ፡ ይብጽሖሙ ፡ ለኃጥኣን ፡ ወለመናፍስተ ፡ ትሑታን ፡ ወእለ ፡ አሕመሙ ፡ ሥጋሆሙ ፡ ወተፈድዩ ፡ እምኀበ ፡ አምላክ ፡ ወእለ ፡ ኀስሩ ፡ እምእኩያን ፡ ሰብእ ፤

8 እለ ፡ አፍቀርዎ ፡ ለአምላክ ፡ ኢወርቀ ፡ ወኢብሩረ ፡ ኢያፍቀሩ ፡ ወኢኵሎ ፡ ሠናየ ፡ ዘውስተ ፡ ዓለም ፡ አላ ፡ ወሀቡ ፡ ሥጋሆሙ ፡ ለጻዕር ፤

9 ወእለ ፡ እምአመ ፡ ኮኑ ፡ ኢፈተዉ ፡ መባልዕተ ፡ ዘውስተ ፡ ምድር ፡ አላ ፡ ረሰዩ ፡ ርእሶሙ ፡ ከመ ፡ መንፈስ ፡ እንተ ፡ ኀለፈት ፡ ወዘንተ ፡ ዐቀቡ ፡ ወብዙኃ ፡ አመከሮሙ ፡ እግዚእ ፡ ወተረክቡ ፡ መንፈሳቲሆሙ ፡ በንጽሕ ፡ ከመ ፡ ይባርክዎ ፡ ለስሙ ።

10 ወኵሎ ፡ በረከቶሙ ፡ ነገርኩ ፡ በመጻሕፍት ፡ ወዐሰዮሙ ፡ ለአርእስቲሆሙ ፡ እስመ ፡ እሉ ፡ ተረክቡ ፡ ያፈቅርዎ ፡ ለሰማይ ፡ እምእስትንፋሶሙ ፡ ዘለዓለም ፡ ወእንዘ ፡ ይትከየዱ ፡ እምእኩያን ፡ ሰብእ ፡ ወሰምዑ ፡ እምኀቤሆሙ ፡ ትዕይርተ ፡ ወጽርፈተ ፡ ወኀስሩ ፡ እንዘ ፡ ይባርኩኒ ።

11 ወይእዜኒ ፡ እጼውዕ ፡ መናፍስቲሆሙ ፡ ለኄራን ፡ እምትውልድ ፡ እንተ ፡ ብርሃን ፡ ወእዌልጥ ፡ ለእለ ፡ ተወልዱ ፡ በጽልመት ፡ እለ ፡ በሥጋሆሙ ፡ ኢተፈድዩ ፡ ክብረ ፡ በከመ ፡ ይደሉ ፡ ለሃይማኖቶሙ ።

12 ወአወጽኦሙ ፡ በብሩህ ፡ ብርሃን ፡ ለእለ ፡ ያፈቅርዎ ፡ ለስምየ ፡ ቅዱስ ፡ ወአነብር ፡ ፩፩ውስተ ፡ መንበረ ፡ ክብር ፡ ክብረ ፡ ዚአሁ ።

13 ወይትወኀውኁ ፡ በአዝማን ፡ ዘአልቦ ፡ ኍልቍ ፡ እስመ ፡ ጽድቅ ፡ ኵነኔሁ ፡ ለአምላክ ፡ እስመ ፡ ለመሃይምናን ፡ ሃይማኖተ ፡ ይሁብ ፡ በማኅደረ ፡ ፍናዋት ፡ ርቱዓት ።

14 ወይሬእይዎሙ ፡ ለእለ ፡ ተወልዱ ፡ በጽልመት ፡ ይትወደዩ ፡ በጽልመት ፡ እንዘ ፡ ይትወኀውኁ ፡ ጻድቃን ።

15 ወይጸርሑ ፡ ወይሬእይዎሙ ፡ ኃጥኣን ፡ እንዘ ፡ ይበርሁ ፡ ወየሐውሩ ፡ እሙንቱሂ ፡ በኀበ ፡ ተጽሕፈ ፡ ሎሙ ፡ መዋዕል ፡ ወአዝማን ።