Chapter 104
Chapter 103 / Enoch / Chapter 104 Chapter 105

1 እምሕል ፡ ለክሙ ፡ ጻድቃን ፡ እስመ ፡ በሰማይ ፡ ይዜከሩ ፡ መላእክት ፡ በእንቲአክሙ ፡ ለሠናይ ፡ በቅድመ ፡ ስብሐቲሁ ፡ ለዐቢይ ፤ አስማቲክሙ ፡ ይጸሐፍ ፡ በቅድመ ፡ ስብሐቲሁ ፡ ለዐቢይ ።

2 ተሰፈዉ ፡ እስመ ፡ በቀዳሚ ፡ ኀሰርክሙ ፡ በእከይ ፡ ወበስራሕ ፡ ወይእዜኒ ፡ ትበርሁ ፡ ከመ ፡ ብርሃናተ ፡ ሰማይ ፡ ወትትረአዩ ፡ ወኆኅተ ፡ ሰማይ ፡ ይትረኀዉ ፡ ለክሙ ።

3 ወጽራሐ ፡ ዚአክሙ ፡ ኵነኔ ፡ ጽርሑ ፡ ወያስተርኢ ፡ ለክሙ ፡ እስመ ፡ እምነ ፡ መላእክት ፡ ይትኀሠሥ ፡ ኵሎ ፡ ምንዳቤክሙ ፡ ወእምኵሎሙ ፡ እለ ፡ አርድእዎሙ ፡ ለእለ ፡ የሀይዱክሙ ።

4 ተሰፈዉ ፡ ወኢትኅድጉ ፡ ተስፋክሙ ፡ እስመ ፡ ትከውን ፡ ለክሙ ፡ ፍሥሓ ፡ ዐባይ ፡ ከመ ፡ መላእክተ ፡ ሰማይ ።

5 እንተ ፡ ሀለወክሙ ፡ ትግበሩ ፡ አኮ ፡ ትትኀብኡ ፡ ሀለወክሙ ፡ በዕለተ ፡ ኵነኔ ፡ ዐባይ ፡ ወኢትትረከቡ ፡ ከመ ፡ ኃጥኣን ፡ ወኵነኔ ፡ እንተ ፡ ለዓለም ፡ ትከውን ፡ እምኔክሙ ፡ ለኵሉ ፡ ትውልደ ፡ ዓለም ።

6 ወይእዜኒ ፡ ኢትፍርሁ ፡ ጻድቃን ፡ ሶበ ፡ ትሬእይዎሙ ፡ ለኃጥአን ፡ ይጸንዑ ፡ ወይዴለዉ ፡ በፍትወቶሙ ፡ ወኢትኩኑ ፡ ሱቱፋነ ፡ ምስሌሆሙ ፡ አላ ፡ ረኀቁ ፡ እምግፍዐ ፡ ዚአሆሙ ፡ እስመ ፡ ለሐራ ፡ ሰማይ ፡ ሀለወክሙ ፡ ትኩኑ ፡ ሱቱፋነ ።

7 እስመ ፡ ትብሉ ፡ አንትሙ ፡ ኃጥአን ፡ ኢትኅሥሡ ፡ ወኢይጸሐፍ ፡ ኵሉ ፡ ኀጢአትነ ፡ ይጽሕፉ ፡ ሀለዉ ፡ ኵሎ ፡ ኀጢአተክሙ ፡ በኵሉ ፡ ዕለት ።

8 ወይእዜኒ ፡ አነ ፡ አርእየክሙ ፡ እስመ ፡ ብርሃን ፡ ወጽልመት ፤ ዕለት ፡ ወሌሊት ፡ ይሬእዩ ፡ ኵሎ ፡ ኀጢአተክሙ ።

9 ኢትርስዑ ፡ በልብክሙ ፡ ወኢተሐስዉ ፡ ወኢትሚጥዎ ፡ ለነገረ ፡ ርትዕ ፡ ወኢታሐስውዎ ፡ ለነገረ ፡ ቅዱስ ፡ ወዐቢይ ፡ ወኢትሰብሕዎ ፡ ለጣዖትክሙ ፡ እስመ ፡ ኢኮነት ፡ ኵላ ፡ ሐሰትክሙ ፡ ወኵሉ ፡ ርስዓንክሙ ፡ ለጽድቅ ፡ አላ ፡ ለኀጢአት ፡ ዐባይ ።

10 ወይእዜኒ ፡ አነ ፡ አአምሮ ፡ ለዝ ፡ ምሥጢር ፡ እስመ ፡ ነገረ ፡ ርትዕ ፡ ይመይጡ ፡ ወየዐልዉ ፡ ብዙኃን ፡ ኃጥኣን ፡ ወይትናገሩ ፡ ነገራተ ፡ እኩያተ ፡ ወይሔስዉ ፡ ወይፈጥሩ ፡ ፍጥረተ ፡ ዐቢያተ ፡ ወመጻሕፍተ ፡ ይጽሕፉ ፡ ዲበ ፡ ነገራቲሆሙ ።

11 ወሶበሰ ፡ ኵሎ ፡ ነገርየ ፡ ይጽሕፉ ፡ በርትዕ ፡ ዲበ ፡ ልሳናቲሆሙ ፡ ወኢይዌልጡ ፡ ወኢያሐፅፁ ፡ እምነገራትየ ፡ አላ ፡ ኵሎ ፡ በርትዕ ፡ ይጽሕፉ ፡ ኵሎ ፡ ዘቀዳሚ ፡ አስማዕኩ ፡ በእንቲአሆሙ ።

12 ወካልአ ፡ ምሥጢረ ፡ አአምር ፡ እስመ ፡ ለጻድቃን ፡ ወለጠቢባን ፡ ይትወሀባ ፡ መጻሕፍታት ፡ ለፍሥሓ ፡ ወለርትዕ ፡ ወለጥበብ ፡ ብዙኅ ።

13 ወሎሙ ፡ ይትወሀባ ፡ መጻሕፍት ፡ ወየአምኑ ፡ ቦሙ ፡ ወይትፌሥሑ ፡ ቦሙ ፡ ወይትዐሠዩ ፡ ኵሎሙ ፡ ጻድቃን ፡ እለ ፡ እምኔሆሙ ፡ አእመሩ ፡ ኵሎ ፡ ፍናዋተ ፡ ርትዕ ።