Chapter 102
Chapter 101 / Enoch / Chapter 102 Chapter 103

1 ወበእማንቱ ፡ መዋዕል ፡ ለእመ ፡ ወደየ ፡ ዲቤክሙ ፡ ዕፁበ ፡ እሳተ ፡ አይቴ ፡ ትነፍጹ ፡ ወበአይቴ ፡ ትድኅኑ ፡ ወሶበ ፡ ይወዲ ፡ ቃሎ ፡ ዲቤክሙ ፡ አኮኑ ፡ ትትመሐከዉ ፡ ወትፈርሁ ።

2 ወኵሎሙ ፡ ብርሃናት ፡ ይትሀወኩ ፡ በፍርሀት ፡ ዐቢይ ፡ ወኵላ ፡ ምድር ፡ ትትመሐከው ፡ ወትርዕድ ፡ ወትጔጕዕ ።

3 ወኵሎሙ ፡ መላእክት ፡ ይፌጽሙ ፡ ትእዛዞሙ ፡ ወይፈቅዱ ፡ ከመ ፡ ይትኃብኡ ፡ እምቅድመ ፡ ዐቢየ ፡ ስብሐት ፡ ወይርዕዱ ፡ ደቂቀ ፡ ምድር ፡ ወይትሀወኩ ፡ ወአንትሙ ፡ ኃጥኣን ፡ ርጉማን ፡ ለዓለም ፡ ወአልብክሙ ፡ ሰላም ።

4 ኢትፍርሁ ፡ አንትሙ ፡ ነፍሳተ ፡ ጻድቃን ፡ ወተሰፈዉ ፡ ዕለተ ፡ ሞትክሙ ፡ በጽድቅ ።

5 ወኢትኅዝኑ ፡ እስመ ፡ ወረደት ፡ ነፍስክሙ ፡ ውስተ ፡ ዐቢይ ፡ ምንዳቤ ፡ ወገዓር ፡ ወናእክ ፡ ወውስተ ፡ ሲኦል ፡ በሐዘን ፡ ወኢረከበ ፡ ሥጋክሙ ፡ በሕይወትክሙ ፡ በከመ ፡ ኂሩትክሙ ፡ አላ ፡ እንከ ፡ በዕለት ፡ እንተ ፡ ባቲ ፡ ኮንክሙ ፡ ኃጥኣነ ፡ ወበዕለተ ፡ መርገም ፡ ወመቅሠፍት ።

6 ወሶበ ፡ ትመውቱ ፡ ይብሉ ፡ በላዕሌክሙ ፡ ኃጥኣን ፡ ከመ ፡ ሞትነ ፡ ሞቱ ፡ ጻድቃን ፡ ወምንት ፡ ኮነ ፡ በቍዔቶሙ ፡ በምግባሮሙ ።

7 ነዋ ፡ ከማነ ፡ ሞቱ ፡ በኀዘን ፡ ወበጽልመት ፡ ወምንት ፡ ፈድፋዶሙ ፡ እምኔነ ፡ እምይእዜ ፡ ተዐረይነ ።

8 ወምንተ ፡ ይነሥኡ ፡ ወምንተ ፡ ይሬእዩ ፡ ለዓለም ፡ እስመ ፡ እሙንቱሂ ፡ ነዋ ፡ ሞቱ ፡ ወእምይእዜ ፡ ለዓለም ፡ ኢይሬእዩ ፡ ብርሃነ ።

9 እብለክሙ ፡ አንትሙ ፡ ኃጥኣን ፡ አከለክሙ ፡ በሊዕ ፡ ወሰትይ ፡ ወአዕርቆተ ፡ ሰብእ ፡ ወሐይድ ፡ ወኀጢአት ፡ ወአጥርዮተ ፡ ንዋይ ፡ ወርእዮተ ፡ መዋዕል ፡ ሠናይ ።

10 ርኢክምዎሙኑ ፡ ለጻድቃን ፡ እፎ ፡ ኮነ ፡ ተፍጻሜቶሙ ፡ ሰላመ ፡ እስመ ፡ ኵሉ ፡ ግፍዕ ፡ ኢተረክበ ፡ በላዕሌሆሙ ፡ እስከ ፡ ዕለተ ፡ ሞቶሙ ።

11 ወተሐጕሉ ፡ ወኮኑ ፡ ከመ ፡ ዘኢኮኑ ፡ ወወረዱ ፡ ውስተ ፡ ሲኦል ፡ ነፍሳቲሆሙ ፡ በምንዳቤ ።