Chapter 101
Chapter 100 / Enoch / Chapter 101 Chapter 102

1 ጠይቅዋ ፡ ለሰማይ ፡ ኵልክሙ ፡ ውሉደ ፡ ሰማይ ፡ ወኵሎ ፡ ግብረ ፡ ልዑል ፡ ወፍርሁ ፡ እምኔሁ ፡ ወኢትግበሩ ፡ እኩየ ፡ በቅድሜሁ ።

2 እመ ፡ ዐፀወ ፡ መስኮተ ፡ ሰማይ ፡ ወከልአ ፡ ዝናመ ፡ ወጠለ ፡ ከመ ፡ እይረድ ፡ ዲበ ፡ ምድር ፡ በእንቲአክሙ ፡ ሚሀለወክሙ ፡ ትግበሩ ።

3 ወእመ ፡ ፈነወ ፡ መዐቶ ፡ ዲቤክሙ ፡ ወዲበ ፡ ኵሉ ፡ ምግባሪክሙ ፡ አኮ ፡ አንትሙ ፡ እለ ፡ ታስተበቍዕዎ ፡ እስመ ፡ ትትናገሩ ፡ ዲበ ፡ ጽድቀ ፡ ዚአሁ ፡ ዐቢያተ ፡ ወጽኑዓተ ፡ ወአልብክሙ ፡ ሰላም ።

4 ወኢትሬእይዎሙኑ ፡ ለነገሥተ ፡ አሕማር ፡ እፎ ፡ ይትሀወኩ ፡ እሞገድ ፡ ወያንቀለቅሉ ፡ እምነፋሳት ፡ አሕማሮሙ ፡ ወይትመነደቡ ።

5 ወበእንተ ፡ ዝንቱ ፡ ይፈርሁ ፡ እስመ ፡ ኵሉ ፡ ንዋዮሙ ፡ ሠናይ ፡ ይወጽእ ፡ ውስተ ፡ ባሕር ፡ ምስሌሆሙ ፡ ወሠናየ ፡ ኢይሄልዩ ፡ በልቦሙ ፡ እስመ ፡ ባሕር ፡ ይውሕጦሙ ፡ ወይትሐጐሉ ፡ ውስቴታ ።

6 አኮኑ ፡ ኵሉ ፡ ባሕር ፡ ወኵሉ ፡ ማያቲሃ ፡ ወኵሉ ፡ ሑሰታ ፡ ግብረ ፡ ልዑል ፡ ውእቱ ፡ ወውእቱ ፡ ኵሎ ፡ ግብረታ ፡ ሐተመ ፡ ወአሠረ ፡ ኵለንታሃ ፡ በኆፃ ።

7 ወበተግሣጹ ፡ ትየብስ ፡ ወትፈርህ ፡ ወኵሉ ፡ ዓሣቲሃ ፡ ይመውቱ ፡ ወኵሉ ፡ ዘሀሎ ፡ ውስቴታ ፡ ወአንትሙ ፡ ኃጥኣን ፡ እለ ፡ ውስተ ፡ ምድር ፡ ኢትፈርህዎ ።

8 አኮኑ ፡ ውእቱ ፡ ገብረ ፡ ሰማየ ፡ ወምድረ ፡ ወኵሎ ፡ ዘሀሎ ፡ ውስቴቶሙ ፡ ወመኑ ፡ ወሀበ ፡ ትምህርተ ፡ ወጥበበ ፡ ለኵሎሙ ፡ እለ ፡ ይትሐወሱ ፡ ዲበ ፡ ምድር ፡ ወለእለ ፡ ውስተ ፡ ባሕር ። አኮኑ ፡ ውእቶሙ ፡ ነገሥተ ፡ አሕማር ፡ ይፈርህዎ ፡ ለባሕር ፡ ወኃጥኣንሰ ፡ ለልዑል ፡ ኢይፈርህዎ ።