Chapter 99
Chapter 98 / Enoch / Chapter 99 Chapter 100

1 አሌ ፡ ሎሙ ፡ ለእለ ፡ ይገብሩ ፡ ርስዕናተ ፡ ወለነገረ ፡ ሐሰት ፡ ይሴብሑ ፡ ወያከብሩ ፡ ተሐጐልክሙ ፡ ወአልብክሙ ፡ ሕይወት ፡ ሠናይት ።

2 አሌ ፡ ለክሙ ፡ እለ ፡ ትዌልጥዎን ፡ ለነገራተ ፡ ርትዕ ፡ ወሥርዐተ ፡ እንተ ፡ ለዓለም ፡ የዐልዉ ፡ ወይሬስዩ ፡ ርእሶሙ ፡ ዘኢኮኑ ፡ ኃጥኣነ ፡ ዲበ ፡ ምድር ፡ ሀለዉ ፡ ይትከየዱ ።

3 በእማንቱ ፡ መዋዕል ፡ ተደለዉ ፡ ጻድቃን ፡ ከመ ፡ ትንሥኡ ፡ ጸሎታቲክሙ ፡ በተዝካር ፡ ወአንበርክምዎሙ ፡ ሰማዕተ ፡ በቅድመ ፡ መላእክት ፡ ከመ ፡ ያንብርዎ ፡ ለኀጢአተ ፡ ኃጥኣን ፡ በቅድመ ፡ ልዑል ፡ ለተዝካር ።

4 በእማንቱ ፡ መዋዕል ፡ ይትሀወኩ ፡ አሕዛብ ፡ ወይትነሥኡ ፡ አዝማደ ፡ አሕዛብ ፡ በዕለት ፡ እንተ ፡ ሐጕል ።

5 ወበእማንቱ ፡ መዋዕል ፡ እለ ፡ ይጼነሱ ፡ ይወጽኡ ፡ ወይመስጡ ፡ ደቂቆሙ ፡ ወይገድፍዎሙ ፡ ለደቂቆሙ ፡ ወእምኔሆሙ ፡ ይድኅፁ ፡ ውሉዶሙ ፡ ወእንዘ ፡ ይጠብዉ ፡ ይገድፍዎሙ ፡ ወኢይገብኡ ፡ ኀቤሆሙ ፡ ወኢይምሕርዎሙ ፡ ለፍቁራኒሆሙ ።

6 ካዕበ ፡ አነ ፡ እምሕል ፡ ለክሙ ፡ ለኃጥኣን ፡ እስመ ፡ ለዕለተ ፡ ደም ፡ ዘኢየኀድዕ ፡ ተደለወት ፡ ኀጢአት ።

7 ወይሰግዱ ፡ ለእብን ፡ ወእለ ፡ ይገልፉ ፡ ምስለ ፡ ዘወርቅ ፡ ወዘብሩር ፡ ወዘዕፅ ፡ ወዘልሕኵት ፡ ወእለ ፡ ይሰግዱ ፡ ለነፍሳት ፡ ርኩሳት ፡ ወአጋንንት ፡ ወለኵሉ ፡ ጣዖት ፡ ወበምሕራማት ፡ ወኵሉ ፡ ረድኤት ፡ እይትረከብ ፡ እምኔሆሙ ።

8 ወይትረስዑ ፡ በእንተ ፡ እበደ ፡ ልቦሙ ፡ ወይጼለላ ፡ አዕይንቲሆሙ ፡ በፍርሀተ ፡ ልቦሙ ፡ ወበርእየ ፡ አሕላሞሙ ።

9 ቦሙ ፡ ይረስዑ ፡ ወይፈርሁ ፡ እስመ ፡ ኵሎ ፡ ግብሮሙ ፡ በሐሰት ፡ ገብሩ ፡ ወሰገዱ ፡ ለእብን ፡ ወይትሐጐሉ ፡ በምዕር ።

10 ወበእማንቱ ፡ መዋዕል ፡ ብፁዓን ፡ ኵሎሙ ፡ እለ ፡ ይትሜጠዉ ፡ ነገረ ፡ ጥበብ ፡ ወየአምርዎ ፡ ወይገብርዎን ፡ ለፍናዋተ ፡ ልዑል ፡ ወየሐውሩ ፡ በፍኖተ ፡ ጽድቅ ፡ ወኢይረስዑ ፡ ምስለ ፡ እለ ፡ ይረስዑ ፡ እስመ ፡ እሙንቱ ፡ ይድኅኑ ።

11 አሌ ፡ ለክሙ ፡ እለ ፡ ትሰፍሕዋ ፡ ለእኪት ፡ ለቢጽክሙ ፡ እስመ ፡ በሲኦል ፡ ትትቀተሉ ።

12 አሌ ፡ ለክሙ ፡ እለ ፡ ትገብርዋ ፡ ለመሠረተ ፡ ኀጢአት ፡ ወጕሕሉት ፡ ወእለ ፡ ያመርሩ ፡ ዲበ ፡ ምድር ፡ እስመ ፡ ቦቱ ፡ ይትዌድኡ ።

13 አሌ ፡ ለክሙ ፡ እለ ፡ ትነድቁ ፡ አብያቲክሙ ፡ በጻማ ፡ ባዕድ ፡ ወኵሉ ፡ መንድቆሙ ፡ ግንፋል ፡ ወእብነ ፡ ኀጢአት ፡ እብለክሙ ፡ ከመ ፡ አልብክሙ ፡ ሰላም ።

14 አሌ ፡ ሎሙ ፡ ለእለ ፡ ይሜንኑ ፡ መሥፈርተ ፡ ወርስተ ፡ አበዊሆሙ ፡ እንተ ፡ ለዓለም ፡ ወያተልዉ ፡ ነፍሶሙ ፡ ድኅረ ፡ ጣዖት ፡ እስመ ፡ እይከውን ፡ ሎሙ ፡ ዕረፍት ።

15 አሌ ፡ ሎሙ ፡ ለእለ ፡ ይገብርዋ ፡ ለዐመፃ ፡ ወይረድእዋ ፡ ለግፍዕ ፡ ወይቀትሉ ፡ ቢጾሙ ፡ እስከ ፡ ዕለተ ፡ ኵነኔ ፡ ዐባይ ።

16 እስመ ፡ ያወድቅ ፡ ስብሐቲክሙ ፡ ወይወዲ ፡ እከየ ፡ ውስተ ፡ ልብክሙ ፡ ወያነሥእ ፡ መንፈሰ ፡ መዐቱ ፡ ከመ ፡ ያሕጕልክሙ ፡ ለኵልክሙ ፡ በሰይፍ ፤ ወኵሎሙ ፡ ጻድቃን ፡ ወቅዱሳን ፡ ይዜከሩ ፡ ኀጢአተ ፡ ዚአክሙ ።