Chapter 98
Chapter 97 / Enoch / Chapter 98 Chapter 99

1 ወይእዜኒ ፡ አነ ፡ እምሕል ፡ ለክሙ ፡ ለጠቢባን ፡ ወለአብዳን ፡ እስመ ፡ ብዙኀ ፡ ትሬእዩ ፡ ዲበ ፡ ምድር ።

2 እስመ ፡ ሥነ ፡ ትወድዩ ፡ ላዕሌክሙ ፡ አንትሙ ፡ ዕደው ፡ ፈድፋደ ፡ እምአንስት ፡ ወኅብረ ፡ ፈድፋደ ፡ እምድንግል ፡ በመንግሥት ፡ ወበዕበይ ፡ ወበሥልጣን ፡ ወበብሩር ፡ ወወርቅ ፡ ወሜላት ፡ ወክብር ፡ ወመባልዕት ፡ ከመ ፡ ማይ ፡ ይትከዐዉ ።

3 በእንተዝ ፡ ትምህርት ፡ ወጥበብ ፡ አልቦሙ ፡ ወቦቱ ፡ ይትሐጐሉ ፡ ኅቡረ ፡ ምስለ ፡ ንዋያቲሆሙ ፡ ወምስለ ፡ ኵሉ ፡ ስብሐቶሙ ፡ ወክብሮሙ ፡ ወበጽእለት ፡ ወበቀትል ፡ ወበንዴት ፡ ዐቢይ ፡ ትትወደይ ፡ መንፈሶሙ ፡ ውስተ ፡ እቶነ ፡ እሳት ።

4 መሐልኩ ፡ ለክሙ ፡ ኃጥኣን ፡ ከመ ፡ ኢኮነ ፡ ደብር ፡ ገብረ ፡ ወኢይከውን ፡ ወኢወግር ፡ ለብእሲት ፡ አመተ ፡ ከመዝ ፡ ኀጢአትኒ ፡ ኢተፈነወት ፡ ዲበ ፡ ምድር ፡ አላ ፡ ሰብእ ፡ እምርእሶሙ ፡ ፈጠርዋ ፡ ወለመርገም ፡ ዐቢይ ፡ ይከውኑ ፡ እለ ፡ ገብርዋ ።

5 ወምክነት ፡ ለብእሲት ፡ ኢተውህበት ፡ አላ ፡ በእንተ ፡ ግብረ ፡ እደዊሃ ፡ ትመውት ፡ ዘእንበለ ፡ ውሉድ ።

6 መሐልኩ ፡ ለክሙ ፡ ኃጥኣን ፡ በቅዱስ ፡ ወዐቢይ ፡ እስመ ፡ ኵሉ ፡ ግብርክሙ ፡ እኩይ ፡ ክሡት ፡ ውእቱ ፡ በሰማያት ፡ ወአልብክሙ ፡ ግብረ ፡ ግፍዕ ፡ ክዱን ፡ ወኢኅቡእ ።

7 ወኢታምስሉ ፡ በመንፈስክሙ ፡ ወኢትበሉ ፡ በልብክሙ ፡ እስመ ፡ ኢታአምሩ ፡ ወኢትሬእዩ ፡ ኵሎ ፡ ኀጢአተ ፡ በሰማይ ፡ ይጸሐፍ ፡ ሀሎ ፡ በኵሉ ፡ ዕለት ፡ በቅድሜሁ ፡ ለልዑል ።

8 እምይእዜ ፡ ተአምሩ ፡ እስመ ፡ ኵሉ ፡ ግፍዕክሙ ፡ ዘትገፍዑ ፡ ይጸሐፍ ፡ በኵሉ ፡ ዕለት ፡ እስከ ፡ ዕለተ ፡ ኵነኔክሙ ።

9 አሌ ፡ ለክሙ ፡ አብዳን ፡ እስመ ፡ ትትሐጐሉ ፡ በእበድክሙ ፡ ወለጠቢባን ፡ እትሰምዕዎሙ ፡ ወሠናይ ፡ ኢይረክበክሙ ።

10 ወይእዜኒ ፡ አእምሩ ፡ ከመ ፡ ድልዋን ፡ አንትሙ ፡ ለዕለተ ፡ ሐጕል ፡ ወኢትሰፈዉ ፡ ከመ ፡ ተሐይዉ ፡ ኃጥኣን ፡ አላ ፡ ተሐውሩ ፡ ወትመውቱ ፡ እስመ ፡ ኢተአምሩ ፡ ቤዛ ፡ እስመ ፡ ተደለውክሙ ፡ ለዕለተ ፡ ኵነኔ ፡ ዐባይ ፡ ወለዕለተ ፡ ምንዳቤ ፡ ወኀሳር ፡ ዐቢይ ፡ ለመንፈስክሙ ።

11 አሌ ፡ ለክሙ ፡ ግዙፋነ ፡ ልብ ፡ እለ ፡ ትገብሩ ፡ እኩየ ፡ ወትበልዑ ፡ ደመ ፡ እምአይቴ ፡ አንትሙ ፡ ትበልዑ ፡ በሠናይ ፡ ወትሰትዩ ፡ ወትጸግቡ ፡ እስመ ፡ እምኵሉ ፡ ሠናይ ፡ ዘአፈድፈደ ፡ እግዚእነ ፡ ልዑል ፡ ዲበ ፡ ምድር ፡ ወአልብክሙ ፡ ሰላም ።

12 አሌ ፡ ለክሙ ፡ እለ ፡ ታፈቅርዋ ፡ ለግብረ ፡ ዐመፃ ፡ ለምንት ፡ ለክሙ ፡ ትሴፈውዋ ፡ ለሠናይት ፡ አእምፉ ፡ ከመ ፡ ሀለወክሙ ፡ ትትወሀቡ ፡ በእዴሆሙ ፡ ለጻድቃን ፡ ወይመትሩ ፡ ክሣውዲክሙ ፡ ወይቀትሉክሙ ፡ ወኢይምሕሩክሙ ።

13 አሌ ፡ ለክሙ ፡ እለ ፡ ትትፌሥሑ ፡ በምንዳቤሆሙ ፡ ለጻድቃን ፡ እስመ ፡ መቃብር ፡ ኢይትከረይ ፡ ለክሙ ።

14 አሌ ፡ ለክሙ ፡ እለ ፡ ታበጥሉ ፡ ነገረ ፡ ጻድቃን ፡ እስመ ፡ ኢይከውን ፡ ለክሙ ፡ ተስፋ ፡ ሕይወት ።

15 አሌ ፡ ለክሙ ፡ እለ ፡ ትጽሕፉ ፡ ነገረ ፡ ሐሰት ፡ ወነገረ ፡ ረሲዓን ፡ እስመ ፡ ውእቶሙ ፡ ይጽሕፉ ፡ ሐሰቶሙ ፡ ከመ ፡ ይስምዕዋ ፡ ወኢይርስእዋ ፡ ለእበድ ፡ ወኢይከውን ፡ ሎሙ ፡ ሰላም ፡ አላ ፡ ሞተ ፡ ይመውቱ ፡ ፍጡነ ።