Chapter 97
Chapter 96 / Enoch / Chapter 97 Chapter 98

1 ተአመኑ ፡ ጻድቃን ፡ እስመ ፡ ለጽእለት ፡ ይከውኑ ፡ ኃጥኣን ፡ ወይትኀጐሉ ፡ በዕለተ ፡ ዐመፃ ።

2 እሙረ ፡ ይከውን ፡ ለክሙ ፡ እስመ ፡ ልዑል ፡ ይዜከር ፡ ሐጕለክሙ ፡ ወይትፌሥሑ ፡ መላእክት ፡ ዲበ ፡ ሐጕለ ፡ ዚአክሙ ።

3 ምንተ ፡ ትግበሩ ፡ ሀለወክሙ ፡ ኀጥኣን ፡ ወአይቴ ፡ ትጐይዩ ፡ በይእቲ ፡ ዕለት ፡ እንተ ፡ ኵነኔ ፡ ሶበ ፡ ትሰምዑ ፡ ቃለ ፡ ጸሎቶሙ ፡ ለጻድቃን ።

4 ወአንትሙ ፡ ኢትከውኑ ፡ ከማሆሙ ፡ እለ ፡ ሰማዕተ ፡ ይከውን ፡ ዲቤክሙ ፡ ዝንቱ ፡ ነገር ፡ ሱቱፋነ ፡ ኮንክሙ ፡ ለኃጥኣን ።

5 ወበእማንቱ ፡ መዋዕል ፡ ትበጽሕ ፡ ጸሎቶሙ ፡ ለጻድቃን ፡ ኀበ ፡ እግዚእ ፡ ወለክሙ ፡ ይበጽሕ ፡ መዋዕለ ፡ ኵነኔክሙ ።

6 ወይትነበብ ፡ ኵሉ ፡ ነገረ ፡ ዐመፃክሙ ፡ ቅድመ ፡ ዐቢይ ፡ ወቅዱስ ፡ ወይትኀፈር ፡ ገጽክሙ ፡ ወይትገደፍ ፡ ኵሉ ፡ ተግባር ፡ ዘጸንዐ ፡ በዐመፃ ።

7 አሌ ፡ ለክሙ ፡ ኃጥኣን ፡ እለ ፡ ማእከለ ፡ ባሕር ፡ ወዲበ ፡ የብስ ፡ እለ ፡ ዝክሮሙ ፡ እኩይ ፡ ዲቤክሙ ።

8 አሌ ፡ ለክሙ ፡ እለ ፡ ታጠርዩ ፡ ብሩረ ፡ ወወርቀ ፡ ዘኢኮነ ፡ በጽድቅ ፡ ወትብሉ ፡ ብዕልነ ፡ ብዕለ ፡ ወኮነ ፡ ለነ ፡ ንዋይ ፡ ወአጥረይነ ፡ ኵሎ ፡ ዘፈቀድነ ።

9 ወይእዜኒ ፡ ንግበር ፡ ዘሐለይነ ፡ እስመ ፡ ብሩረ ፡ አስተጋባእነ ፡ ወመላእነ ፡ መዛግብቲነ ፡ ወከመ ፡ ማይ ፡ ብዙኅ ፡ ሐረስተ ፡ አብያቲነ ።

10 ወከመ ፡ ማይ ፡ ይውኅዝ ፡ ሐሰትክሙ ፡ እስመ ፡ ኢይነብር ፡ ለክሙ ፡ ብዕል ፡ አላ ፡ ፍጡነ ፡ የዐርግ ፡ እምኔክሙ ፡ እስመ ፡ ኵሎ ፡ በዐመፃ ፡ አጥረይክሙ ፡ ወአንትሙ ፡ ለመርገም ፡ ዐቢይ ፡ ትትወሀብ ።