Chapter 96
Chapter 95 / Enoch / Chapter 96 Chapter 97

1 ተሰፈዉ ፡ ጻድቃን ፡ እስመ ፡ ፍጡነ ፡ ይትሐጐሉ ፡ ኃጥኣን ፡ እምቅድሜክሙ ፡ ወሥልጣን ፡ ይከውን ፡ ለክሙ ፡ ዲቤሆሙ ፡ በከመ ፡ ፈቀድክሙ ።

2 ወበዕለተ ፡ ምንዳቤሆሙ ፡ ለኃጥኣን ፡ ይትሌዐሉ ፡ ወይትነሥኡ ፡ ከመ ፡ አንስርት ፡ እጕለ ፡ ዚአክሙ ፡ ወፈድፋደ ፡ እምነ ፡ አውስት ፡ ይከውን ፡ ምጽላሊክሙ ፡ ወተዐርጉ ፡ ወትበውኡ ፡ በንድለታተ ፡ ምድር ፡ ወበንቅዐታተ ፡ ኰኵሕ ፡ ለዓለም ፡ ከመ ፡ ግሔ ፡ እምቅድመ ፡ ዐማፅያን ፡ ወይንዕኩ ፡ ዲቤክሙ ፡ ወይበክዩ ፡ ከመ ፡ ጼዴናታት ።

3 ወአንትሙሰ ፡ ኢትፍርሁ ፡ እለ ፡ ሐመምክሙ ፡ እስመ ፡ ፈውስ ፡ ይከውነክሙ ፡ ወብርሃን ፡ ብሩህ ፡ ያበርህ ፡ ለክሙ ፡ ወቃለ ፡ ዕረፍት ፡ ትሰምዑ ፡ እምሰማይ ።

4 አሌ ፡ ለክሙ ፡ ኃጥኣን ፡ እስመ ፡ ብዕልክሙ ፡ ያመስለክሙ ፡ ጻድቃነ ፡ ወልብክሙ ፡ ይዘልፈክሙ ፡ ከመ ፡ ኃጥኣን ፡ አንትሙ ፡ ወዝንቱ ፡ ነገር ፡ ይከውን ፡ ዲቤክሙ ፡ ሰማዕተ ፡ ለተዝካረ ፡ እከያት ።

5 አሌ ፡ ለክሙ ፡ እለ ፡ ትበልዑ ፡ ሥብሐ ፡ ስርናይ ፡ ወትሰትዩ ፡ ኀይለ ፡ ሥርወ ፡ ነቅዕ ፡ ወትከይድዎሙ ፡ ለትሑታን ፡ በኀይልክሙ ።

6 አሌ ፡ ለክሙ ፡ እለ ፡ ትሰትዩ ፡ ማየ ፡ በኵሉ ፡ ጊዜ ፡ እስመ ፡ ፍጡነ ፡ ትትፈደዩ ፡ ወትትዌድኡ ፡ ወትየብሱ ፡ እስመ ፡ ኀደግሙ ፡ ነቅዐ ፡ ሕይወት ።

7 አሌ ፡ ለክሙ ፡ እለ ፡ ትገብሩ ፡ ዐመፃ ፡ ወጕሕሉተ ፡ ወጽርፈተ ፡ ተዝካረ ፡ ይከውን ፡ ዲቤክሙ ፡ ለእከይ ።

8 አሌ ፡ ለክሙ ፡ ኀያላን ፡ እለ ፡ በኀይል ፡ ትኰርዕዎ ፡ ለጻድቅ ፡ እስመ ፡ ትመጽእ ፡ ዕለተ ፡ ኀጕልክሙ ፤ በእማንቱ ፡ መዋዕል ፡ ይመጽኣ ፡ ለጻድቃን ፡ መዋዕል ፡ ብዙኃት ፡ ወኄራት ፡ በዕለተ ፡ ኵነኔ ፡ ዚአክሙ ።