Chapter 95
Chapter 94 / Enoch / Chapter 95 Chapter 96

1 መኑ ፡ ይሁበኒ ፡ አዕይንትየ ፡ ከመ ፡ ይኩና ፡ ደመና ፡ ማይ ፡ ወእብኪ ፡ ዲቤክሙ ፡ ወእክዐው ፡ አንብዕየ ፡ ከመ ፡ ደመና ፡ ማይ ፡ ወአዕርፍ ፡ እምኀዘነ ፡ ልብየ ።

2 መኑ ፡ ወሀበክሙ ፡ ከመ ፡ ትግበሩ ፡ ጽልዐ ፡ ወእከየ ፡ ወይርከብክሙ ፡ ለኃጥኣን ፡ ኵነኔ ።

3 ኢትፍርሁ ፡ ጻድቃን ፡ እምኃጥአን ፡ እስመ ፡ ካዕበ ፡ ያገብኦሙ ፡ እግዚአብሔር ፡ ውስተ ፡ እዴክሙ ፡ ከመ ፡ ትግበሩ ፡ ላዕሌሆሙ ፡ ኵነኔ ፡ በከመ ፡ ፈቀድክሙ ።

4 አሌ ፡ ለክሙ ፡ እለ ፡ ታወግዙ ፡ ግዘታተ ፡ ከመ ፡ ኢትፍትሑ ፡ ወፈውስ ፡ ርኁቅ ፡ እምኔክሙ ፡ በእንተ ፡ ኀጢአተ ፡ ዚአክሙ ።

5 አሌ ፡ ለክሙ ፡ እለ ፡ ትፈድዩ ፡ እኩየ ፡ ለቢጽክሙ ፡ እስመ ፡ ትትፈደዩ ፡ በከመ ፡ ምግባሪክሙ ።

6 አሌ ፡ ለክሙ ፡ ለሰማዕታተ ፡ ሐሰት ፡ ወለእለ ፡ ይደልውዋ ፡ ለዐመፃ ፡ እስመ ፡ ፍጡነ ፡ ትትሐጐሉ ።

7 አሌ ፡ ለክሙ ፡ ለኃጥኣን ፡ እስመ ፡ ለጻድቃን ፡ ትሰድድዎሙ ፡ እስመ ፡ አንትሙ ፡ ትትሜጠዉ ፡ ወትሰደዱ ፡ እለ ፡ ዐመፃ ፡ ወይጸንዕ ፡ በላዕሌክሙ ፡ አርኡተ ፡ ዚአሆሙ ።