Chapter 94
Chapter 93 / Enoch / Chapter 94 Chapter 95

1 ወይእዜኒ ፡ እብለክሙ ፡ ደቂቅየ ፡ አፍቅርዋ ፡ ለጽድቅ ፡ ወባቲ ፡ ሑሩ ፡ እስመ ፡ ፍናዋተ ፡ ጽድቅ ፡ ይደሉ ፡ ይትወከፍዎሙ ፡ ወፍናዋተ ፡ ዐመፃ ፡ ፍጡነ ፡ ይትሐጐሉ ፡ ወየሐፅፁ ።

2 ወለሰብእ ፡ እሙራን ፡ እምትውልድ ፡ ይትከሠቱ ፡ ፍናዋተ ፡ ግፍዕ ፡ ወሞት ፡ ወይርኅቁ ፡ እምኔሆሙ ፡ ወኢይተልውዎሙ ።

3 ወይእዜኒ ፡ ለክሙ ፡ እብል ፡ ለጻድቃን ፡ ኢትሑሩ ፡ በፍኖት ፡ እኩይ ፡ ወግፍዕ ፡ ወኢበፍናዋተ ፡ ሞት ፡ ወኢትቅረቡ ፡ ኀቤሆሙ ፡ ከመ ፡ ኢትትሐጐሉ ።

4 አላ ፡ ፍቅዱ ፡ ወኅረዩ ፡ ለክሙ ፡ ጽድቀ ፡ ወሕይወተ ፡ ኅሪተ ፡ ወሑሩ ፡ በፍናዋተ ፡ ሰላም ፡ ከመ ፡ ትሕየዉ ፡ ወትደለዉ ።

5 ወትእኅዙ ፡ በሕሊና ፡ ልብክሙ ፡ ወኢይደምሰስ ፡ ነገርየ ፡ እምልብክሙ ፡ እስመ ፡ አአምር ፡ ከመ ፡ ያሜክርዎሙ ፡ ኃጥኣን ፡ ለሰብእ ፡ ከመ ፡ ይግበሩ ፡ ጥበበ ፡ እኩየ ፡ ወኵሉ ፡ መካን ፡ ኢይትረከብ ፡ ላቲ ፡ ወኵሉ ፡ መከራ ፡ ኢየሐፅፅ ።

6 አሌ ፡ ሎሙ ፡ ለእለ ፡ የሐንጽዋ ፡ ለዐመፃ ፡ ወለግፍዕ ፡ ወይሳርርዋ ፡ ለጕሕሉት ፡ እስመ ፡ ፍጡነ ፡ ይትነሠቱ ፡ ወአልቦሙ ፡ ሰላም ።

7 አሌ ፡ ሎሙ ፡ ለእለ ፡ የሐንጹ ፡ አብያቶሙ ፡ በኀጢአት ፡ እስመ ፡ እምኵሉ ፡ መሰረቶሙ ፡ ይትነሠቱ ፡ ወበሰይፍ ፡ ይወድቁ ፡ ወእለ ፡ ያጠርይዎ ፡ ለወርቅ ፡ ወለብሩር ፡ በኵነኔ ፡ ፍጡነ ፡ ይትሐጐሉ ።

8 አሌ ፡ ለክሙ ፡ አብዕልት ፡ እስመ ፡ ዲበ ፡ ብዕልክሙ ፡ ተወከልክሙ ፡ ወእምነ ፡ ብዕልክሙ ፡ ትወጽኡ ፡ እስመ ፡ ለልዑል ፡ ኢተዘከርክምዎ ፡ በመዋዕለ ፡ ብዕልክሙ ።

9 ገበርክምዋ ፡ ለጽርፈት ፡ ወለዐመፃ ፡ ወድልዋነ ፡ ኮንክሙ ፡ ለዕለተ ፡ ክዕወተ ፡ ደም ፡ ወለዕለተ ፡ ጽልመት ፡ ወለዕለተ ፡ ኵነኔ ፡ ዐባይ ።

10 ከመዝ ፡ እብል ፡ አነ ፡ ወአየድዐክሙ ፡ ከመ ፡ ይገፈትዐክሙ ፡ ዘፈጠረክሙ ፡ ወዲበ ፡ ድቀትክሙ ፡ ኢይከውን ፡ ምሕረት ፡ ወፈጣሪክሙ ፡ ይትፌሣሕ ፡ በሐጕልክሙ ።

11 ወጻድቃነ ፡ ዚአክሙ ፡ በእማንቱ ፡ መዋዕል ፡ ይከውኑ ፡ ጽእለተ ፡ ለኃጥኣን ፡ ወለረሲዓን ።