Chapter 93
Chapter 92 / Enoch / Chapter 93 Chapter 94

1 ወእምድኅረዝ ፡ ኮነ ፡ ሄኖክ ፡ ወአኀዘ ፡ ይትናገር ፡ እመጻሕፍት ።

2 ወይቤ ፡ ሄኖክ ፡ በእንተ ፡ ውሉደ ፡ ጽድቅ ፡ ወበእንተ ፡ ኅሩያነ ፡ ዓለም ፡ ወበእንተ ፡ ተክለ ፡ ጽድቅ ፡ ወርትዕ ፡ እሎንተ ፡ እብለክሙ ፡ ወአየድዐክሙ ፡ ደቂቅየ ፡ አነ ፡ ውእቱ ፡ ሄኖክ ፡ በዘአስተርአየኒ ፡ እምራእየ ፡ ሰማይ ፡ ወእምቃለ ፡ ቅዱሳን ፡ መላእክት ፡ አእመርኩ ፡ ወእምጸፍጸፈ ፡ ሰማይ ፡ ለበውኩ ።

3 ወአኀዘ ፡ እንከ ፡ ይትናገር ፡ ሄኖክ ፡ እመጻሕፍት ፡ ወይቤ ፡ አነ ፡ ሳብዕ ፡ ተወለድኩ ፡ በቀዳሚት ፡ ሰንበት ፡ እስከ ፡ አመ ፡ ኵነኔ ፡ ወጽድቅ ፡ ተዐገሠ ።

4 ወትቀውም ፡ እምድኅሬየ ፡ በካልእት ፡ ሰንበት ፡ ዐባይ ፡ እኪት ፡ ወጕሕሉት ፡ በቈለት ፡ ወባቲ ፡ ትከውን ፡ ፍጻሜ ፡ ቀዳሚት ፡ ወባቲ ፡ ይድኅን ፡ ብእሲ ፡ ወእምድኅረ ፡ ተፈጸመ ፡ ትልህቅ ፡ ዐመጻ ፡ ወሥርዐተ ፡ ይገብር ፡ ለኃጥአን ።

5 ወእምድኅረዝ ፡ በሣልስት ፡ ሰንበት ፡ በተፍጻሜታ ፡ ይትኀረይ ፡ ብእሲ ፡ ለተክለ ፡ ኵነኔ ፡ ጽድቅ ፡ ወእምድኅሬሁ ፡ ይመጽእ ፡ ተክለ ፡ ጽድቅ ፡ ለዓለም ።

6 ወእምድኅረዝ ፡ በራብዕት ፡ ሰንበት ፡ በተፍጻሜታ ፡ ራእያተ ፡ ቅዱሳን ፡ ወጻድቃን ፡ ይትረአዩ ፡ ወሥርዐት ፡ ለትውልደ ፡ ትውልድ ፡ ወዐጸድ ፡ ይትገበር ፡ ሎሙ ።

7 ወእምድኅረዝ ፡ በሰንበት ፡ ኃምስ ፡ በተፍጻሜታ ፡ ቤተ ፡ ስብሐት ፡ ወመንግሥት ፡ ይትሐነጽ ፡ እስከ ፡ ለዓለም ።

8 ወእምድኅረዝ ፡ በሳድስት ፡ ሰንበት ፡ እለ ፡ ይከውኑ ፡ ውስቴታ ፡ ጽሉላን ፡ ኵሎሙ ፡ ወይትረሳዕ ፡ ልቦሙ ፡ ለኵሎሙ ፡ እምጥበብ ፡ ወባቲ ፡ የዐርግ ፡ ብእሲ ፡ ወበተፍጻሜታ ፡ ይውዒ ፡ ቤተ ፡ መንግሥት ፡ በእሳት ፡ ወባቲ ፡ ይዘረው ፡ ኵሉ ፡ ዘመደ ፡ ሥርው ፡ ኅሩይ ።

9 ወእምድኅረዝ ፡ በሳብዕ ፡ ሰንበት ፡ ትትነሣእ ፡ ትውልድ ፡ ዕሉት ፡ ወብዙኅ ፡ ምግባራቲሃ ፡ ወኵሉ ፡ ምግባራቲሃ ፡ ዕልወት ።

10 ወበተፍጻሜታ ፡ ይትዐሰዩ ፡ ኅሩያን ፡ ጻድቃን ፡ እምተክለ ፡ ጽድቅ ፡ ዘለዓለም ፡ እለ ፡ ይትወሀብ ፡ ሎሙ ፡ ፯ምክዕቢታተ ፡ ትምህርት ፡ ለኵሉ ፡ ፍጥረተ ፡ ዚአሁ ።

11 እስመ ፡ መኑ ፡ ውእቱ ፡ ኵሉ ፡ ውሉደ ፡ ሰብእ ፡ ዘይክል ፡ ሰሚዐ ፡ ቃሎ ፡ ለቅዱስ ፡ ወኢይትሀወክ ፡ ወመኑ ፡ ዘይክል ፡ ከመ ፡ የሐሊ ፡ ሕሊናሁ ፡ ወመኑ ፡ ዘይክል ፡ ነጽሮታ ፡ ለኵሉ ፡ ምግባረ ፡ ሰማይ ።

12 ወምንት ፡ ውእቱ ፡ ዘይክል ፡ አእምሮ ፡ ግብረ ፡ ሰማይ ፡ ወከመ ፡ ይርአይ ፡ ነፍሶ ፡ ወእመ ፡ አኮ ፡ መንፈሶ ፡ ወይክል ፡ ነጊረ ፡ ወእመ ፡ አኮ ፡ ዐሪገ ፡ ወይሬኢ ፡ ኵሎ ፡ አክናፊሆሙ ፡ ወይሔዮሙ ፡ ወእመ ፡ አኮ ፡ ይገብር ፡ ከማሆሙ ።

13 ወመኑ ፡ ውእቱ ፡ ኵሉ ፡ ብእሲ ፡ ዘይክል ፡ አእምሮተ ፡ እፎ ፡ ውእቱ ፡ ራኅባ ፡ ወኑኃ ፡ ለምድር ፡ ወለመኑ ፡ ተርእየ ፡ አምጣነ ፡ ኵሎሙ ።

14 ወእመ ፡ ቦቱ ፡ ኵሉ ፡ ብእሲ ፡ ዘይክል ፡ አእምሮተ ፡ ኑኃ ፡ ለሰማይ ፡ ወእፎ ፡ ውእቱ ፡ ልዕልናሃ ፡ ወዲበ ፡ ምንት ፡ ጸንዐት ፡ ወሚመጠን ፡ ውእቱ ፡ ኍልቆሙ ፡ ለከዋክብት ፡ ወበአይቴ ፡ የዐርፉ ፡ ኵሎሙ ፡ ብርሃናት ።