Chapter 92
Chapter 91 / Enoch / Chapter 92 Chapter 93

1 ዘተጽሕፈ ፡ እምሄኖክ ፡ ጸሓፊ ፡ ዝኵሉ ፡ ትምህርተ ፡ ጥበብ ፡ እምኵሉ ፡ ሰብእ ፡ ስቡሕ ፡ ወመኰንነ ፡ ኵሉ ፡ ምድር ፡ ለኵሎሙ ፡ ውሉድየ ፡ እለ ፡ የኀድሩ ፡ ዲበ ፡ ምድር ፡ ወለትውልድ ፡ ደኀራውያን ፡ እለ ፡ ይገብሩ ፡ ርትዐ ፡ ወሰላመ ።

2 ኢትኅዝን ፡ መንፈስክሙ ፡ በአዝማን ፡ እስመ ፡ መዋዕለ ፡ ወሀበ ፡ ቅዱስ ፡ ዐቢይ ፡ ለኵሉ ።

3 ወይትነሣእ ፡ ጻድቅ ፡ እምንዋም ፡ ይትነሣእ ፡ ወየኀልፍ ፡ በፍኖተ ፡ ጽድቅ ፡ ወኵሉ ፡ ፍኖቱ ፡ ወምሕዋሪሁ ፡ ዘበኂሩት ፡ ወበሣህል ፡ ዘለዓለም ።

4 ይሠሀሎ ፡ ለጻድቅ ፡ ወሎቱ ፡ ይሁብ ፡ ርትዐ ፡ ዘለዓለም ፡ ወይሁብ ፡ ሥልጣነ ፡ ወይከውን ፡ በኂሩት ፡ ወበጽድቅ ፡ ወየሐውር ፡ በብርሃን ፡ ዘለዓለም ።

5 ወኀጢአት ፡ በጽልመት ፡ ትትሐጐል ፡ እስከ ፡ ለዓለም ፡ ወኢትትረአይ ፡ እንከ ፡ እምይእቲ ፡ ዕለት ፡ እስከ ፡ ለዓለም ።