Chapter 91
Chapter 90 / Enoch / Chapter 91 Chapter 92

1 ወይእዜኒ ፡ ወልድየ ፡ ማቱሳላ ፡ ጸውዕ ፡ ሊተ ፡ ኵሎ ፡ አኀዊከ ፡ ወአስተጋብእ ፡ ሊተ ፡ ኵሎ ፡ ደቂቀ ፡ እምከ ፡ እስመ ፡ ቃል ፡ ይጼውዐኒ ፡ ወመንፈስ ፡ ተክዕወ ፡ በላዕሌየ ፡ ከመ ፡ አርኢክሙ ፡ ኵሎ ፡ ዘይበጽሐክሙ ፡ እስከ ፡ ለዓለም ።

2 ወእምኔሁ ፡ ሖረ ፡ ማቱሳላ ፡ ወጸውዖሙ ፡ ለኵሎሙ ፡ አኀዊሁ ፡ ኀቤሁ ፡ ወአስተጋብኦሙ ፡ ለአዝማደ ፡ ዚአሁ ።

3 ወተናገሮሙ ፡ ለኵሎሙ ፡ ውሉዱ ፡ ጽድቀ ፡ ወይቤ ፡ ስምዑ ፡ ደቂቅየ ፡ ኵሎ ፡ ነገረ ፡ አቡክሙ ፡ ወአፅምኡ ፡ በርትዕ ፡ ቃለ ፡ አፉየ ፡ እስመ ፡ አሰምዕ ፡ ዲቤክሙ ፡ ወእነግረክሙ ፡ ፍቁራንየ ፡ አፍቅርዋ ፡ ለርትዕ ፡ ወባቲ ፡ ሑሩ ።

4 ወኢትቅረቡ ፡ ኀበ ፡ ርትዕ ፡ በ፪ልብ ፡ ወኢትኅበሩ ፡ ምስለ ፡ እለ ፡ በ፪ልብ ፡ አላ ፡ ሑሩ ፡ በጽድቅ ፡ ደቂቅየ ፡ ወይእቲ ፡ ትመርሐክሙ ፡ በፍናዋት ፡ ኄራት ፡ ወጽድቅ ፡ ይከውን ፡ ለክሙ ፡ ሱታፌ ።

5 እስመ ፡ አአምር ፡ ከመ ፡ ይጸንዕ ፡ ህላዌ ፡ ግፍዕ ፡ ዲበ ፡ ምድር ፡ ወይትፌጸም ፡ መቅሠፍት ፡ ዐቢይ ፡ ዲበ ፡ ምድር ፡ ወትትፌጸም ፡ ኵላ ፡ ዐመፃ ፡ ወትትገዘም ፡ እምሥረዊሃ ፡ ወኵሉ ፡ ሕንጻ ፡ የሐልፍ ።

6 ወትደግም ፡ ካዕበ ፡ ዐመፃ ፡ ወትትፌጸም ፡ ዲበ ፡ ምድር ፡ ኵሉ ፡ ግብረ ፡ ዐመፃ ፡ ወግብረ ፡ ግፍዕ ፡ ወአበሳ ፡ ካዕበተ ።

7 ወእመኒ ፡ ትልህቅ ፡ ዐመፃ ፡ ወኀጢአት ፡ ወጽርፈት ፡ ወግፍዕ ፡ ወኵሉ ፡ ግብር ፡ ወትልህቅ ፡ ዕልወት ፡ ወአበሳ ፡ ወርኵስ ፡ መቅሠፍት ፡ ዐቢይ ፡ ይከውን ፡ እምሰማይ ፡ ዲበ ፡ እሉ ፡ ኵሎሙ ፡ ወይወጽእ ፡ እግዚእ ፡ ቅዱስ ፡ በመዐት ፡ ወበመቅሠፍት ፡ ከመ ፡ ይግበር ፡ ኵነኔ ፡ ዲበ ፡ ምድር ።

8 በእማንቱ ፡ መዋዕል ፡ ትትገዘም ፡ ግፍዕ ፡ እምነ ፡ ሥረዊሃ ፡ ወአሥራወ ፡ ዐመፃ ፡ ምስለ ፡ ጕሕሉት ፡ ወይትሐጐሉ ፡ እምታሕተ ፡ ሰማይ ።

9 ወኵሉ ፡ ይትወሀብ ፡ ምስለ ፡ አሕዛብ ፡ ማኅፈድ ፡ በእሳት ፡ ትነድድ ፡ ወያወጽእዎሙ ፡ እምኵሉ ፡ ምድር ፡ ወይትገደፉ ፡ በኵነኔ ፡ እሳት ፡ ወይትኀጐሉ ፡ በመዐት ፡ ወበኵነኔ ፡ ኀያል ፡ እንተ ፡ ለዓለም ።

10 ወይትነሣእ ፡ ጻድቅ ፡ እምንዋም ፡ ወይትነሣእ ፡ ጥበብ ፡ ወይትወሀብ ፡ ሎሙ ።

11 ወእምኔሁ ፡ ይትገዘሙ ፡ አሥራወ ፡ ዐመፃ ፡ ወኃጥኣን ፡ ይትኀጐሉ ፡ በሰይፍ ፡ እምጽሩፋን ፡ ይትገዘሙ ፡ በኵሉ ፡ መካን ፡ ወእለ ፡ ይሔልይዋ ፡ ለግፍዕ ፡ ወእለ ፡ ይገብርዋ ፡ ለጽርፈት ፡ ይትኀጐሉ ፡ በመጥባሕት ።

12 ወእምድኅረዝ ፡ ትከውን ፡ ካልእት ፡ ሰንበት ፡ ሳምኒት ፡ እንተ ፡ ጽድቅ ፡ ወይትወሀብ ፡ ላቲ ፡ ሰይፍ ፡ ከመ ፡ ይትገበር ፡ ኵነኔ ፡ ወጽድቅ ፡ እምእለ ፡ ይገፍዑ ፡ ወይትሜጠዉ ፡ ኃጥኣን ፡ በእደዊሆሙ ፡ ለጻድቃን ።

13 ወበተፍጻሜታ ፡ ያጠርዩ ፡ አብያተ ፡ እምጽድቀ ፡ ዚአሆሙ ፡ ወይትሐነጽ ፡ ቤት ፡ ለንጉሥ ፡ ዐቢይ ፡ ለስብሐት ፡ እስከ ፡ ለዓለም ።

14 ወእምድኅረዝ ፡ በሰንበት ፡ ታስዕ ፡ ባቲ ፡ ኵነኔ ፡ ጽድቅ ፡ ትትከሠት ፡ ለኵሉ ፡ ዓለም ፡ ወኵሉ ፡ ተግባረ ፡ ረሲዓን ፡ ይወጽእ ፡ እምዲበ ፡ ኵሉ ፡ ምድር ፡ ወይጸሐፍ ፡ ለሐጕል ፡ ዓለም ፡ ወኵሉ ፡ ሰብእ ፡ ይኔጽሩ ፡ ለፍኖተ ፡ ርትዕ ።

15 ወእምድኅረ ፡ ዝንቱ ፡ በሰንበት ፡ ዓሥርት ፡ ፯ እድ ፡ ባቲ ፡ ኵነኔ ፡ እንተ ፡ ለዓለም ፡ ወትትገበር ፡ እምትጉሃን ፡ ወሰማይ ፡ ዘለዓለም ፡ ዐቢይ ፡ ዘይበቍል ፡ እማእከሎሙ ፡ ለመላእክት ።

16 ወሰማይ ፡ ቀዳማይ ፡ ይወጽእ ፡ ወየኀልፍ ፡ ወሰማይ ፡ ሐዲስ ፡ ይትረአይ ፡ ወኵሉ ፡ ኃይላተ ፡ ሰማያት ፡ ያበርሁ ፡ ለዓለም ፡ ፯ምክዕቢተ ።

17 ወእምድኅረዝ ፡ ሰንበታት ፡ ብዙኃት ፡ እለ ፡ አልቦን ፡ ኍልቍ ፡ ለዓለም ፡ በኂሩት ፡ ወበጽድቅ ፡ ይከውኑ ፡ ወኀጢአት ፡ እምህየ ፡ ኢትትበሀል ፡ እስከ ፡ ለዓለም ።

18 ወይእዜኒ ፡ እብለክሙ ፡ ደቂቅየ ፡ ወአርእየክሙ ፡ ፍናዋተ ፡ ጽድቅ ፡ ወፍናዋተ ፡ ግፍዕኒ ፡ ወአርእየክሙ ፡ ካዕበ ፡ ከመ ፡ ታእምሩ ፡ ዘይመጽእ ።

19 ወይእዜኒ ፡ ስምዑ ፡ ደቂቅየ ፡ ወሑሩ ፡ በፍናዋተ ፡ ጽድቅ ፡ ወኢትሑሩ ፡ በፍናዋተ ፡ ግፍዕ ፡ እስመ ፡ ይትሐጐሉ ፡ ለዓለም ፡ ኵሎሙ ፡ እለ ፡ የሐውሩ ፡ በፍኖተ ፡ ዐመፃ ።