Chapter 85
Chapter 84 / Enoch / Chapter 85 Chapter 86

1 ወእምድኅረዝ ፡ ካልአ ፡ ሕልመ ፡ ርኢኩ ፡ ወኵሎ ፡ አርእየከ ፡ ወልድየ ። 2 ወአንሥአ ፡ ሄኖክ ፡ ወይቤ ፡ ለወልዱ ፡ ማቱሳላ ፡ ለከ ፡ እብለከ ፡ ወልድየ ፡ ስማዕ ፡ ነገርየ ፡ ወአጽንን ፡ እዝነከ ፡ ለርእየ ፡ ሕልመ ፡ አብከ ።

3 እንበለ ፡ እንሥአ ፡ ለእምከ ፡ እድና ፡ ርኢኩ ፡ በራእይ ፡ በምስካብየ ፡ ወናሁ ፡ ወጽአ ፡ ላህም ፡ እምድር ፡ ወኮነ ፡ ዝኩ ፡ ላህም ፡ ፀዐዳ ፡ ወእምድኅሬሁ ፡ ወጽአት ፡ ጣዕዋ ፡ አንስቲያዊት ፡ አሐቲ ፡ ወምስሌሃ ፡ ወጽአ ፡ ካልእ ፡ ጣዕዋ ፡ ወ ፩ እምኔሆሙ ፡ ኮነ ፡ ጸሊመ ፡ ወ ፩ ቀይሐ ።

4 ወጐድኦ ፡ ዝኩ ፡ ጸሊም ፡ ጣዕዋ ፡ ለቀይሕ ፡ ወተለዎ ፡ ዲበ ፡ ምድር ፡ ወኢክህልኩ ፡ እምሶቤሃ ፡ ርእዮቶ ፡ ለዝኩ ፡ ቀይሕ ፡ ጣዕዋ ።

5 ወዝኩ ፡ ጣዕዋ ፡ ጸሊም ፡ ልህቀ ፡ ወመጽአት ፡ ምስሌሁ ፡ እንትኩ ፡ ጣዕዋ ፡ አንስቲያዊት ፡ ወርኢኩ ፡ እምኔሁ ፡ ዘይወጽኡ ፡ አልህምተ ፡ ብዙኃነ ፡ እንዘ ፡ ይመስልዎ ፡ ወይተልዉ ፡ ድኅሬሁ ።

6 ወእንታክቲ ፡ ዕጐልት ፡ አንስቲያዊት ፡ እንታክቲ ፡ ቀዳሚት ፡ ወጽአት ፡ እምቅድመ ፡ ገጸ ፡ ዝኩ ፡ ላህም ፡ ቀዳሚ ፡ ኀሠሠቶ ፡ ለውእቱ ፡ ጣዕዋ ፡ ቀይሕ ፡ ወኢረከበቶ ፡ ወአውየወት ፡ ሶቤሃ ፡ አውያተ ፡ ዐበይተ ፡ ወኀሠሠቶ ።

7 ወርኢኩ ፡ እስከ ፡ መጽአ ፡ ዝኩ ፡ ላህም ፡ ቀዳማዊ ፡ ኀቤሃ ፡ ወአርመማ ፡ ወእምይእቲ ፡ ጊዜ ፡ ኢጸርሐት ።

8 ወእምድኅረዝ ፡ ወለደት ፡ ካልአ ፡ ላህመ ፡ ጸዐዳ ፡ ወእምድኅሬሁ ፡ ወለደት ፡ አልህምተ ፡ ብዙኃነ ፡ ወዕጐተ ፡ ጸሊማነ ።

9 ወርኢኩ ፡ በንዋምየ ፡ ዝኩ ፡ ሶር ፡ ጸዐዳ ፡ ወከመዝ ፡ ልህቀ ፡ ወኮነ ፡ ሶረ ፡ ጸዐዳ ፡ ዐቢየ ፡ ወእምኔሁ ፡ ወጽኡ ፡ አልህምት ፡ ብዙኃን ፡ ጸዐዳ ፡ ወይመስልዎ ።

10 ወወጠኑ ፡ እንዘ ፡ ይወልዱ ፡ አልህምተ ፡ ብዙኃነ ፡ ጸዐዳ ፡ ወእለ ፡ ይመስልዎሙ ፡ ወተለዎ ፡ ፩ ለካልኡ ።