Chapter 84
Chapter 83 / Enoch / Chapter 84 Chapter 85

1 ወአልዓልኩ ፡ እደውየ ፡ በጽድቅ ፡ ወባረክዎ ፡ ለቅዱስ ፡ ወለዐቢይ ፡ ወነገርኩ ፡ በመንፈሰ ፡ አፉየ ፡ ወበልሳነ ፡ ሥጋ ፡ እንተ ፡ ገብረ ፡ አምላክ ፡ ለውሉደ ፡ ሰብእ ፡ ከመ ፡ ይትናገሩ ፡ ባቲ ፡ ወወሀቦሙ ፡ መንፈሰ ፡ ወልሳነ ፡ ወአፈ ፡ ከመ ፡ ይትናገሩ ፡ ቦቱ ።

2 ቡሩክ ፡ አንተ ፡ እግዚኦ ፡ ንጉሥ ፡ ወዐቢይ ፡ ወኀያል ፡ በዕበየ ፡ ዚአከ ፡ እግዚአ ፡ ኵሉ ፡ ፍጥረተ ፡ ሰማይ ፡ ንጉሠ ፡ ነገሥት ፡ ወአምላከ ፡ ኵሉ ፡ ዓለም ፡ ወመለኮትከ ፡ ወመንግሥትከ ፡ ወዕበይከ ፡ ይነብር ፡ ለዓለም ፡ ወለዓለመ ፡ ዓለም ፡ ወለኵሉ ፡ ትውልደ ፡ ትውልድ ፡ ስልጣንከ ፡ ወኵሎሙ ፡ ሰማያት ፡ መንበርከ ፡ ለዓለም ፡ ወኵላ ፡ ምድር ፡ መከየደ ፡ እገሪከ ፡ ለዓለም ፡ ወለዓለመ ፡ ዓለም ።

3 እስመ ፡ አንተ ፡ ገበርከ ፡ ወኵሎ ፡ አንተ ፡ ትመልክ ፡ ወኢይጸንዐከ ፡ ግብር ፡ ወኢ ፩ ወኢአሐቲ ፡ ጥበብ ፡ ኢተኀልፈከ ፡ ወኢትትመየጥ ፡ እመንበርታ ፡ ምንባሪከ ፡ ወኢእምገጽከ ፡ ወአንተ ፡ ኵሎ ፡ ተአምር ፡ ወትሬኢ ፡ ወትሰምዕ ፡ ወአልቦ ፡ ዘይትኀባእ ፡ እምኔከ ፡ እስመ ፡ ኵሎ ፡ ትሬኢ ።

4 ወይእዜኒ ፡ መላእክተ ፡ ሰማያቲከ ፡ ይኤብሱ ፡ ወዲበ ፡ ሥጋ ፡ ሰብእ ፡ ትከውን ፡ መዐትከ ፡ እስከ ፡ ዕለተ ፡ ዐባይ ፡ ኵነኔ ።

5 ወይእዜኒ ፡ አምላክ ፡ ወእግዚእ ፡ ወንጉሥ ፡ ዐቢይ ፡ አስተበቍዕ ፡ ወእስእል ፡ ከመ ፡ ታቅም ፡ ሊተ ፡ ስእለትየ ፡ ከመ ፡ ታትርፍ ፡ ሊተ ፡ ደኃሪተ ፡ ውስተ ፡ ምድር ፡ ወኢታጥፍእ ፡ ኵሎ ፡ ሥጋ ፡ ሰብእ ፡ ወኢታዕርቃ ፡ ለምድር ፡ ወይከውን ፡ ሐጕል ፡ ለዓለም ።

6 ወይእዜኒ ፡ እግዚእየ ፡ አጥፍእ ፡ እምዲበ ፡ ምድር ፡ ሥጋ ፡ አምዕዐተከ ፡ ወሥጋ ፡ ጽድቅ ፡ ወርትዕ ፡ አቅም ፡ ለተክለ ፡ ዘርእ ፡ ለዓለም ፡ ወኢትሰውር ፡ ገጸከ ፡ እምስእለተ ፡ ገብርከ ፡ እግዚኦ ።