Chapter 83
Chapter 82 / Enoch / Chapter 83 Chapter 84

1 ወይእዜኒ ፡ አርእየከ ፡ ወልድየ ፡ ማቱሳላ ፡ ኵሎ ፡ ራእያተ ፡ እለ ፡ ርኢኩ ፡ በቅድሜከ ፡ እነግር ።

2 ክልኤተ ፡ ራእያተ ፡ ርኢኩ ፡ እንበለ ፡ እንሣእ ፡ ብእሲተ ፡ ወ ፩ ሂ ፡ እምኔሆሙ ፡ ኢይትማሰል ፡ ምስለ ፡ ካልኡ ፡ ቀዳማየ ፡ አመ ፡ እትሜሐር ፡ መጽሐፈ ፡ ወካልአ ፡ ዘእንበለ ፡ እንሣእ ፡ እመከ ፡ ርኢኩ ፡ ራእየ ፡ ጽኑዐ ፡ ወበእንቲአሆሙ ፡ አስተብቋዕክዎ ፡ ለእግዚእ ።

3 ስኩበ ፡ ኮንኩ ፡ በቤተ ፡ መላልኤል ፡ እምሔውየ ፡ ርኢኩ ፡ በራእይ ፡ ሰማይ ፡ ይትነፃኅ ፡ ወይትሐየድ ፡ ወይወድቅ ፡ ዲበ ፡ ምድር ።

4 ወሶበ ፡ ይወድቅ ፡ ዲበ ፡ ምድር ፡ ርኢክዋ ፡ ለምድር ፡ ከመ ፡ ትትወሐጥ ፡ ውስተ ፡ ቀላይ ፡ ዐቢይ ፡ ወአድባር ፡ ዲበ ፡ አድባር ፡ ይሰቀሉ ፡ ወአውግር ፡ ዲበ ፡ አውግር ፡ ይሠጠሙ ፡ ወዕፀው ፡ ነዋኃን ፡ ይትገዘሙ ፡ እምጕንዳቲሆሙ ፡ ወይትገደፉ ፡ ወይሠጠሙ ፡ ውስተ ፡ ቀላይ ።

5 ወእምኔሁ ፡ ወድቀ ፡ ነገር ፡ ውስተ ፡ አፉየ ፡ ወአንሣእኩ ፡ እጽራሕ ፡ ወእቤ ፡ ተሐጕለት ፡ ምድር ።

6 ወመላልኤል ፡ እምሔውየ ፡ አንሥአኒ ፡ እንዘ ፡ አነ ፡ እሰክብ ፡ ኀቤሁ ፡ ወይቤለኒ ፡ ምንት ፡ ከመዝ ፡ ትጸርሕ ፡ ወልድየ ፡ ወለምንት ፡ ከመዝ ፡ ተዐወዩ ።

7 ወነገርክዎ ፡ ኵሎ ፡ ራእየ ፡ ዘርኢኩ ፡ ወይቤለኒ ፡ ከመ ፡ ጽኑዕ ፡ ርኢከ ፡ ወልድየ ፡ ወኀየለ ፡ ርእየ ፡ ሕልምከ ፡ ኅቡአተ ፡ ኵሉ ፡ ኀጢአተ ፡ ምድር ፡ ወትሰጠም ፡ ሀለወት ፡ ውስተ ፡ ቀላይ ፡ ወተሐጕል ፡ ሐጕለ ፡ ዐቢየ ።

8 ወይእዜኒ ፡ ወልድየ ፡ ተንሥእ ፡ ወአስተብቍዖ ፡ ለእግዚአ ፡ ስብሐት ፡ እስመ ፡ መሀይምን ፡ አንተ ፡ ከመ ፡ ይትርፍ ፡ ትራፍ ፡ ዲበ ፡ ምድር ፡ ወኢይደምስሳ ፡ ለኵላ ፡ ምድር ።

9 ወልድየ ፡ እምሰማይ ፡ ይሄሉ ፡ ዝኵሉ ፡ ዲበ ፡ ምድር ፡ ወዲበ ፡ ምድር ፡ ይከውን ፡ ሐጕል ፡ ዐቢይ ።

10 ወእምኔሁ ፡ ተንሣእኩ ፡ ወጸለይኩ ፡ ወአስተብቋዕኩ ፡ ወጸሎትየ ፡ ጸሐፍኩ ፡ ለትውልደ ፡ ዓለም ፡ ወኵሎ ፡ አርእየከ ፡ ወልድየ ፡ ማቱሳላ ።

11 ወሶበ ፡ ወጻእኩ ፡ ታሕተ ፡ ወርኢክዎ ፡ ለሰማይ ፡ ወለፀሐይ ፡ ይወጽእ ፡ እምሥራቅ ፡ ወወርኅ ፡ ይወርድ ፡ እምዕራብ ፡ ወውሑዳት ፡ ከዋክብት ፡ ወኵሉ ፡ ዘአእመረ ፡ ዲበ ፡ ቀዳሚ ፡ ወባረክዎ ፡ ለእግዚአ ፡ ኵነኔ ፡ ወሎቱ ፡ ወሀብኩ ፡ ዕበየ ፡ እስመ ፡ አውፅአ ፡ ፀሐየ ፡ እመሣክወ ፡ ምሥራቅ ፡ ወዐርገ ፡ ወሠረቀ ፡ ዲበ ፡ ገጸ ፡ ሰማይ ፡ ወተንሥአ ፡ ወየሐውር ፡ ፍኖተ ፡ እንተ ፡ ተርእየት ፡ ሎቱ ።