Chapter 81
Chapter 80 / Enoch / Chapter 81 Chapter 82

1 ወይቤለኒ ፡ ኦሄኖክ ፡ ነጽር ፡ መጽሐፈ ፡ ዘጸፍጸፈ ፡ ሰማይ ፡ ወአንብብ ፡ ዘጽሑፍ ፡ ዲቤሆሙ ፡ ወአእምር ፡ ኵሎ ፡ ፩፩ ።

2 ወነጸርኩ ፡ ኵሎ ፡ በጸፍጸፈ ፡ ሰማይ ፡ ወአንበብኩ ፡ ኵሎ ፡ ዘጽሑፍ ፡ ወአእመርኩ ፡ ኵሎ ፡ ወአንበብክዋ ፡ ለመጽሐፍ ፡ ወኵሎ ፡ ዘጽሑፍ ፡ ውስቴታ ፡ ኵሎ ፡ ምግባሮሙ ፡ ለሰብእ ፡ ወኵሎ ፡ ውሉደ ፡ ሥጋ ፡ ዘዲበ ፡ ምድር ፡ እስከ ፡ ትውልደ ፡ ዓለም ።

3 ወእምዝ ፡ ሶቤሃ ፡ ባረክዎ ፡ ለእግዚእ ፡ ለንጉሠ ፡ ስብሐት ፡ ዘለዓለም ፡ በከመ ፡ ገብረ ፡ ኵሎ ፡ ግብረ ፡ ዓለም ፡ ወሰባሕክዎ ፡ ለእግዚእ ፡ በእንተ ፡ ትእግሥቱ ፡ ወባረኩ ፡ ዲበ ፡ ውሉደ ፡ ዓለም ።

4 ወይእተ ፡ ጊዜ ፡ እቤ ፡ ብፁዕ ፡ ብእሲ ፡ ዘይመውት ፡ እንዘ ፡ ጻድቅ ፡ ወኄር ፡ ወኵሉ ፡ መጽሐፈ ፡ ዐመፃ ፡ ዘኢተጽሕፈ ፡ ዲቤሁ ፡ ወኢተረክበ ፡ ጌጋይ ፡ ላዕሌሁ ።

5 ወእሙንቱ ፡ ፫ ቅዱሳን ፡ አቅረቡኒ ፡ ወአንበሩኒ ፡ ውስተ ፡ ምድር ፡ በቅድመ ፡ ኆኅተ ፡ ቤትየ ፡ ወይቤሉኒ ፡ አይድዕ ፡ ኵሎ ፡ ለማቱሳላ ፡ ወልድከ ፡ ወአርኢ ፡ ለኵሎሙ ፡ ውሉድከ ፡ ከመ ፡ ኢይጸድቅ ፡ ኵሉ ፡ ዘሥጋ ፡ በቅድመ ፡ እግዚእ ፡ እስመ ፡ ውእቱ ፡ ፈጠሮሙ ።

6 ፩ ዓመተ ፡ ነኀድገከ ፡ በኀበ ፡ ውሉድከ ፡ እስከ ፡ ካዕበ ፡ ትዔዝዝ ፡ ከመ ፡ ትምሀሮሙ ፡ ለውሉድከ ፡ ወትጽሐፍ ፡ ሎሙ ፡ ወታስምዕ ፡ ሎሙ ፡ ለኵሎሙ ፡ ውሉድከ ፤ ወበካልእ ፡ ዓም ፡ ይነሥኡከ ፡ እማእከሎሙ ።

7 ይጽናዕ ፡ ልብከ ፡ እስመ ፡ ኄራን ፡ ለኄራን ፡ ያየድዑ ፡ ጽድቀ ፡ ጻድቅ ፡ ምስለ ፡ ጻድቅ ፡ ይትፌሣሕ ፡ ወይትአምኁ ፡ በበይናቲሆሙ ።

8 ወኃጥእ ፡ ምስለ ፡ ኃጥእ ፡ ይመውት ፡ ወምዩጥ ፡ ምስለ ፡ ምዩጥ ፡ ይሠጠም ።

9 ወእለ ፡ ይገብሩ ፡ ጽድቀ ፡ ይመውቱ ፡ በእንተ ፡ ምግባረ ፡ ሰብእ ፡ ወይትጋብኡ ፡ በእንተ ፡ ምግባሮሙ ፡ ለረሲዓን ።

10 ወበእማንቱ ፡ መዋዕል ፡ ፈጸሙ ፡ እንዘ ፡ ይትናገሩ ፡ ምስሌየ ፡ ወቦእኩ ፡ ኀበ ፡ ሰብእየ ፡ እንዘ ፡ እባርኮ ፡ ለእግዚአ ፡ ዓለማት ።