Chapter 80
Chapter 79 / Enoch / Chapter 80 Chapter 81

1  ወበውእቱ ፡ መዋዕል ፡ አውሥአኒ ፡ ኡርኤል ፡ ወይቤለኒ ፡ ነዋ ፡ አርአይኩከ ፡ ኵሎ ፡ ኦሄኖክ ፡ ወኵሎ ፡ ከሠትኩ ፡ ለከ ፡ ትርአዮ ፡ ለዝ ፡ ፀሐይ ፡ ወለዝ ፡ ወርኅ ፡ ወለእለ ፡ ይመርህዎሙ ፡ ለከዋክብተ ፡ ሰማይ ፡ ወለኵሎሙ ፡ እለ ፡ ይመይጥዎሙ ፡ ግብሮሙ ፡ ወአዝማኖሙ ፡ ወሙፃኢሆሙ ።

2 ወበመዋዕለ ፡ ኃጥኣን ፡ ክራማት ፡ የሐፅራ ፡ ወዘርአ ፡ ዚአሆሙ ፡ ይከውን ፡ ደኀራዌ ፡ በምድሮሙ ፡ ወበሙፋሮሙ ፡ ወኵሉ ፡ ግብር ፡ ዘዲበ ፡ ምድር ፡ ይትመየጥ ፡ ወኢያስተርኢ ፡ በዘመኑ ፡ ወዝናም ፡ ይትከላእ ፡ ወሰማይ ፡ ታቀውም ።

3 ወበውእቱ ፡ አዝማን ፡ ፍሬ ፡ ምድር ፡ ደኃራዌ ፡ ይከውን ፡ ወኢይበቍል ፡ በዘመኑ ፡ ወፍሬ ፡ ዕፅ ፡ ይትከላእ ፡ በዘመነ ፡ ዚአሁ ።

4 ወወርኅ ፡ ይዌልጥ ፡ ሥርአቶ ፡ ወኢይትረአይ ፡ በዘመነ ፡ ዚአሁ ።

5 ወበእማንቱ ፡ መዋዕል ፡ ይትረአይ ፡ ሰማይ ፡ ወይበጽሕ ፡ ዐባር ፡ በጽንፈ ፡ ሰረገላት ፡ ዐቢይ ፡ በምዕራብ ፡ ወይበርህ ፡ ፈድፋደ ፡ እምሥርዐተ ፡ ብርሃን ።

6 ወይስሕቱ ፡ ብዙኃን ፡ አርእስቲሆሙ ፡ ለከዋክብተ ፡ ትእዛዝ ፡ ወእሉ ፡ ይመይጡ ፡ ፍናዊሆሙ ፡ ወግብሮሙ ፡ ወኢይትረአዩ ፡ በአዝማነ ፡ ዚአሆሙ ፡ እለ ፡ ተአዘዙ ፡ ሎሙ ።

7 ወኵሉ ፡ ሥርዐተ ፡ ከዋክብት ፡ ይትዐፀዉ ፡ ላዕለ ፡ ኃጥኣን ፡ ወሕሊናሆሙ ፡ ለእለ ፡ ይነብሩ ፡ ዲበ ፡ ምድር ፡ ይስሕቱ ፡ ዲቤሆሙ ፡ ወይትመየጡ ፡ እምኵሉ ፡ ፍናዊሆሙ ፡ ወይስሕቱ ፡ ወይመስልዎሙ ፡ አማልክተ ።

8 ወይበዝኅ ፡ ላዕሌሆሙ ፡ እከይ ፡ ወመቅሠፍት ፡ ይመጽእ ፡ ዲቤሆሙ ፡ ከመ ፡ ያኅጕሎሙ ፡ ለኵሎሙ ።