Chapter 77
Chapter 76 / Enoch / Chapter 77 Chapter 78

1 ይጼውዕዎ ፡ ለነፋስ ፡ ቀዳማዊ ፡ ጽባሓዊ ፡ እስመ ፡ ቀዳማዊ ፡ ውእቱ ፡ ወይጼውዕዎ ፡ ለካልእ ፡ አዜብ ፡ እስመ ፡ ልዑል ፡ ህየ ፡ ይወርድ ፡ ወፈድፋደ ፡ ህየ ፡ ይወርድ ፡ ቡሩክ ፡ ለዓለም ።

2 ወለነፋስ ፡ ዘእምዕራብ ፡ ስሙ ፡ ንቱግ ፡ እስመ ፡ በህየ ፡ የሐፅፁ ፡ ኵሉ ፡ ብርሃናተ ፡ ሰማይ ፡ ወይወርዱ ።

3 ወራብዕ ፡ ነፋስ ፡ ዘስሙ ፡ መስዕ ፡ ይትከፈል ፡ ፫ ክፍለ ፡ ፩ እምኔሆሙ ፡ ማኅደር ፡ ለሰብእ ፡ ወካልእ ፡ ለአብሕርተ ፡ ማያት ፡ ወበቀላያት ፡ ወበኦም ፡ ወበአፍላግ ፡ ወበጽልመት ፡ ወበጊሜ ፡ ወሣልስ ፡ ክፍል ፡ በገነተ ፡ ጽድቅ ።

4 ፯ አድባረ ፡ ነዋኃነ ፡ ርኢኩ ፡ እለ ፡ ይነውኁ ፡ እምኵሉ ፡ አድባር ፡ እለ ፡ ውስተ ፡ ምድር ፡ ወእምኔሆሙ ፡ ይወጽእ ፡ አስሐትያ ፡ ወየኀልፍ ፡ ወየሐውር ፡ መዋዕል ፡ ወዘመን ፡ ወዓመት ።

5 ፯ አፍላገ ፡ ዲበ ፡ ምድር ፡ ርኢኩ ፡ ዐበይተ ፡ እምኵሎሙ ፡ አፍላግ ፡ ፩ እምኔሆሙ ፡ ይመጽእ ፡ እምዓረብ ፡ ውስተ ፡ ባሕር ፡ ዐቢይ ፡ ይክዑ ፡ ማዮ ።

6 ወእልክቱ ፡ ፪ ይመጽኡ ፡ እመስዕ ፡ እስከ ፡ ባሕር ፡ ወይክዕዉ ፡ ማዮሙ ፡ በባሕረ ፡ ኤርትራ ፡ እምሥራቅ ።

7 ወእለ ፡ ተርፉ ፡ ፬ ይወጽኡ ፡ በገቦ ፡ መስዕ ፡ እስከ ፡ ባሕረ ፡ ዚአሆሙ ፡ ባሕረ ፡ ኤርትራ ፡ ወ ፪ በባሕር ፡ ዐቢይ ፡ ይሰወጡ ፡ በህየ ፡ ወይቤሉ ፡ መድበራ ።

8 ሰቡዐ ፡ ደሰያተ ፡ ዐበይተ ፡ ርኢኩ ፡ በባሕር ፡ ወበምድር ፡ ፪ በምድር ፡ ወ ፭ በባሕር ፡ ዐቢይ ።