Chapter 76
Chapter 75 / Enoch / Chapter 76 Chapter 77

1 ወበአጽናፈ ፡ ምድር ፡ ርኢኩ ፡ ፲ ወ ፪ ኀዋኅወ ፡ ርኅዋተ ፡ ለኵሎሙ ፡ ነፋሳት ፡ እለ ፡ እምኔሆሙ ፡ ይወጽኡ ፡ ነፋሳት ፡ ወይነፍሱ ፡ ዲበ ፡ ምድር ።

2 ፫ እምኔሆሙ ፡ ርኅዋት ፡ በገጸ ፡ ሰማይ ፡ ወ ፫ በምዕራብ ፡ ወ ፫ በየማነ ፡ ሰማይ ፡ ወ ፫ በፀጋም ።

3 ወ ፫ ቀዳምያት ፡ እለ ፡ መንገለ ፡ ጽባሕ ፡ ወ ፫ መንገለ ፡ መስዕ ፡ ወ ፫ በድኅር ፡ እለ ፡ በጸጋም ፡ ለመንገለ ፡ አዜብ ፡ ወ ፫ በዓረብ ።

4 በ ፬ እምኔሆሙ ፡ ይወጽኡ ፡ ነፋሳተ ፡ በረከት ፡ ወሰላም ፡ ወእምእልኩ ፡ ፰ ይወጽኡ ፡ ነፋሳተ ፡ መቅሠፍት ፡ ሶበ ፡ ይትፌነዉ ፡ ይደመስስዋ ፡ ለኵላ ፡ ምድር ፡ ወለማይ ፡ ዘዲቤሃ ፡ ወለኵሎሙ ፡ እለ ፡ የኀድሩ ፡ ዲቤሃ ፡ ወኵሉ ፡ ዘሀሎ ፡ ውስተ ፡ ማይ ፡ ወዲበ ፡ የብስ ።

5 ወይወጽእ ፡ ቀዳማይ ፡ ነፋስ ፡ እምእልኩ ፡ ኀዋኅው ፡ ዘስሙ ፡ ጽባሓይ ፡ በቀዳሚት ፡ ኆኅት ፡ እንተ ፡ መንገለ ፡ ጽባሕ ፡ እንተ ፡ ታጸንን ፡ ለአዜብ ፡ ይወጽእ ፡ እምኔሃ ፡ ድምሳሴ ፡ የብስ ፡ ወሞቅ ፡ ወሐጕል ።

6 ወበካልእት ፡ ኆኅት ፡ ማእከላይት ፡ ይወጽእ ፡ ርትዕ ፡ ወይወጽእ ፡ እምኔሃ ፡ ዝናም ፡ ወፍሬ ፡ ወሰላም ፡ ወጠል ፤ ወበሣልስት ፡ ኆኅት ፡ እንተ ፡ መንገለ ፡ መስዕ ፡ ይወጽእ ፡ ቍር ፡ ወየብስ ።

7 ወእምድኅረ ፡ እሉ ፡ ነፋሳት ፡ በመንገለ ፡ አዜብ ፡ ይወጽእ ፡ በ ፫ ኆኅት ፤ ቀዳምያት ፡ በቀዳሚት ፡ ኆኅት ፡ እምኔሆን ፡ እንተ ፡ ትጸንን ፡ ለመንገለ ፡ ምሥራቅ ፡ ይወጽእ ፡ ነፋሰ ፡ ሞቅ ።

8 ወበኆኅት ፡ እንተ ፡ ኀቤሃ ፡ ማእከላይት ፡ ይወጽእ ፡ እምኔሃ ፡ መዐዛ ፡ ሠናይ ፡ ወጠል ፡ ወዝናም ፡ ወሰላም ፡ ወሕይወት ።

9 ወበሣልስት ፡ ኆኅት ፡ እንተ ፡ መንገለ ፡ ምዕራብ ፡ ይወጽእ ፡ እምኔሃ ፡ ጠል ፡ ወዝናም ፡ ወአናኵዕ ፡ ወድምሳሴ ።

10 ወእምድኅረ ፡ እሉ ፡ ነፋሳት ፡ ዘመንገለ ፡ መስዕ ፡ [ዘስሙ ፡ ባሕር ፡ ]እም ፡ [፫] ፡ ሳብዓይ ፡ ኆኅት ፡ እንተ ፡ መንገለ ፡ ምሥራቅ ፡ ዘታጸንን ፡ መንገለ ፡ አዜብ ፡ ይወጽእ ፡ እምኔሃ ፡ ጠል ፡ ወዝናም ፡ አናኵዕ ፡ ወድምሳሴ ።

11 ወእማእከላይት ፡ ኆኅት ፡ ርትዕት ፡ ይወጽእ ፡ እምኔሃ ፡ ዝናም ፡ ወጠል ፡ ወሕይወት ፡ ወሰላም ፡ ወበሣልስት ፡ ኆኅት ፡ እንተ ፡ መንገለ ፡ ምዕራብ ፡ እንተ ፡ ታጸንን ፡ ለመስዕ ፡ ይወጽእ ፡ እምኔሃ ፡ ጊሜ ፡ ወአስሐትያ ፡ ወሐመዳ ፡ ወዝናም ፡ ወጠል ፡ ወአናኵዕ ።

12 ወእምድኅረ ፡ እሉ ፡ [፬] ነፋሳት ፡ እለ ፡ መንገለ ፡ ምዕራብ ፡ በቀዳሚት ፡ ኆኅት ፡ እንተ ፡ ታጸንን ፡ ለመንገለ ፡ መስዕ ፡ ወእምኔሃ ፡ ይወጽእ ፡ ጠል ፡ ወዝናም ፡ ወአስሐትያ ፡ ወቍር ፡ ወሐመዳ ፡ ወደደክ ።

13 ወእምነ ፡ ኆኅት ፡ ማእከላይት ፡ ይወጽእ ፡ ጠል ፡ ወዝናም ፡ ሰላም ፡ ወበረከት ፡ ወበደኃሪት ፡ ኆኅት ፡ እንተ ፡ መንገለ ፡ አዜብ ፡ ይወጽእ ፡ እምኔሃ ፡ የብስ ፡ ወድምሳሴ ፡ ዋዕይ ፡ ወሐጕል ።

14 ወተፈጸማ ፡ ፲ ወ ፪ ኀዋኅው ፡ ዘ ፬ ኀዋኅወ ፡ ሰማይ ፡ ወኩሎ ፡ ትእዛዞሙ ፡ ወኵሎ ፡ መቅሠፍቶሙ ፡ ወሰላሞሙ ፡ አርአይኩከ ፡ ወልድየ ፡ ማቱሳላ ።