Chapter 75
Chapter 74 / Enoch / Chapter 75 Chapter 76

1 ወመራኅያኒሆሙ ፡ ለአርእስተ ፡ አእላፍ ፡ እለ ፡ ዲበ ፡ ኵሉ ፡ ፍጥረት ፡ ወዲበ ፡ ኵሉ ፡ ከዋክብት ፡ ወምስለ ፡ ፬ እለ ፡ ይትዌሰኩ ፡ ወኢይትሌለዩ ፡ እምንባሮሙ ፡ በከመ ፡ ኵሉ ፡ ሐሳበ ፡ ዓመት ፡ ወእሉ ፡ ይትቀነዩ ፡ ፬ መዋዕለ ፡ እለ ፡ እይትሐሰቡ ፡ በሐሳበ ፡ ዓመት ።

2 ወበእንቲአሆሙ ፡ ይጌግዩ ፡ ቦሙ ፡ ሰብእ ፡ እስመ ፡ እሙንቱ ፡ ብርሃናት ፡ ይትቀነዩ ፡ በጽድቅ ፡ በምንባረ ፡ ዓለም ፡ ፩ በቀዳሚ ፡ ኆኅት ፡ ወ ፩ በሣልስ ፡ ኆኅት ፡ ወ ፩ በራብዕ ፡ ኆኅት ፡ ወ ፩ በሳድስ ፡ ኆኅት ፡ ወይትፌጸም ፡ ጥንቃዌ ፡ ዓለም ፡ በበ ፫፻ ወ ፷ ወ ፬ መንበረ ፡ ዓለም ።

3 እስመ ፡ ለትእምርት ፡ ወለአዝማን ፡ ወለዓመታት ፡ ወለመዋዕል ፡ አርአየኒ ፡ ኡርኤል ፡ መልአክ ፡ ዘአንበሮ ፡ እግዚአ ፡ ስብሐት ፡ ዘለዓለም ፡ ዲበ ፡ ኵሎሙ ፡ ብርሃናተ ፡ ሰማይ ፡ በሰማይ ፡ ወበዓለም ፡ ከመ ፡ ይምልኩ ፡ በገጸ ፡ ሰማይ ፡ ወይትረአዩ ፡ ዲበ ፡ ምድር ፡ ወይኩኑ ፡ መራኅያነ ፡ ለመዓልት ፡ ወለሌሊት ፡ ፀሐይ ፡ ወወርኅ ፡ ወከዋክብት ፡ ወኵሉ ፡ ቅንየታት ፡ እለ ፡ የአውዱ ፡ በኵሎሙ ፡ ሰረገላተ ፡ ሰማይ ።

4 ከመዝ ፡ ፲ ወ ፪ ኀዋኅወ ፡ ርኅዋተ ፡ አርአየኒ ፡ ኡርኤል ፡ በክበበ ፡ ሰረገላት ፡ ዘጸሐይ ፡ በሰማይ ፡ እለ ፡ እምኔሆሙ ፡ ይወጽኡ ፡ እገሪሃ ፡ ለጸሐይ ፡ ወእምኔሆሙ ፡ ይወጽእ ፡ ሞቅ ፡ ዲበ ፡ ምድር ፡ ሶበ ፡ ይትረኀዉ ፡ በአዝማን ፡ እለ ፡ እሙራን ፡ ቦሙ ።

5 ወለነፋሳት ፡ ወለመንፈሰ ፡ ጠል ፡ ሶበ ፡ ይትረኀዉ ፡ በአዝማን ፡ ርኅዋተ ፡ በሰማያት ፡ ዲበ ፡ አጽናፍ ።

6 ፲ ወ ፪ ኀዋኅወ ፡ ርኢኩ ፡ በሰማይ ፡ በአጽናፈ ፡ ምድር ፡ እለ ፡ እምኔሆሙ ፡ ይወጽኡ ፡ ፀሐይ ፡ ወወርኅ ፡ ወከዋክብት ፡ ወኵሉ ፡ ግብራተ ፡ ሰማይ ፡ እምነ ፡ ምሥራቅ ፡ ወእምነ ፡ ምዕራብ ።

7 ወመሳክው ፡ ርኅዋት ፡ ብዙኃት ፡ እምፀጋሙ ፡ ወእምየማኑ ፡ ወአሐቲ ፡ መስኮት ፡ በዘመነ ፡ ዚአሃ ፡ ታመውቅ ፡ ሞቀ ፡ ዘከመ ፡ እልኩ ፡ ኀዋኅው ፡ እለ ፡ ይወጽኡ ፡ እምኔሆሙ ፡ ከዋክብት ፡ በከመ ፡ አዘዞሙ ፡ ወእለ ፡ ቦሙ ፡ የዐርቡ ፡ በከመ ፡ ኍልቆሙ ።

8 ወርኢኩ ፡ ሰረገላተ ፡ በሰማይ ፡ እንዘ ፡ ይረውፁ ፡ በዓለም ፡ እመልዕልቶሙ ፡ ወእመትሕቶሙ ፡ ለእልኩ ፡ ኀዋኅው ፡ እለ ፡ ቦሙ ፡ ይትመየጡ ፡ ከዋክብት ፡ እለ ፡ ኢየዐርቡ ።

9 ወ ፩ የዐብዮሙ ፡ ለኵሎሙ ፡ ወውእቱ ፡ የአውድ ፡ ለኵሉ ፡ ዓለም ።