Chapter 73
Chapter 72 / Enoch / Chapter 73 Chapter 74

1 ወድኅሬሁ ፡ ለዝ ፡ ትእዛዝ ፡ ርኢኩ ፡ ካልአ ፡ ትእዛዘ ፡ ለብርሃን ፡ ንኡስ ፡ ዘስሙ ፡ ወርኅ ።

2 ወክበቡ ፡ ከመ ፡ ክበበ ፡ ሰማይ ፡ ወሰረገላ ፡ ዚአሁ ፡ በኀበ ፡ ይጼአን ፡ ነፋስ ፡ ይነፍኅ ፡ ወበመስፈርት ፡ ይትወሀብ ፡ ሎቱ ፡ ብርሃን ።

3 ወበኵሉ ፡ ወርኅ ፡ ሙጻኢሁ ፡ ወሙባኢሁ ፡ ይትዌለጥ ፡ ወመዋዕሊሁ ፡ ከመ ፡ መዋዕለ ፡ ፀሐይ ፡ ወሶበ ፡ ይኤሪ ፡ ከዊነ ፡ ብርሃኑ ፡ ይከውን ፡ ብርሃኑ ፡ ሳብዓየ ፡ እደ ፡ እምብርሃነ ፡ ፀሐይ ፡ ወከመዝ ፡ ይሠርቅ ።

4 ወርእሱ ፡ ዘመንገለ ፡ ጽባሕ ፡ ይወጽእ ፡ በ ፴ ጽባሕ ፡ ወበይእቲ ፡ ዕለት ፡ ያስተርኢ ፡ ወይከውን ፡ ለክሙ ፡ ርእሰ ፡ ወርኅ ፡ ፴ ጽባሐ ፡ ምስለ ፡ ጸሐይ ፡ በኆኅት ፡ እንተ ፡ ይወጽእ ፡ ፀሐይ ።

5 ወመንፈቁ ፡ ርኁቅ ፡ ፯ እደ ፡ ፩ ወኵሉ ፡ ክበበ ፡ ዚአሁ ፡ በክ ፡ ዘአልቦ ፡ ብርሃን ፡ ዘእንበለ ፡ ሳብዒት ፡ እደ ፡ ዚአሁ ፡ እም ፡ ፲ ወ ፬ እደ ፡ ብርሃኑ ።

6 ወበዕለተ ፡ ይነሥእ ፡ ሳብዓየ ፡ እደ ፡ ወመንፈቀ ፡ ብርሃኑ ፡ ይከውን ፡ ብርሃኑ ፡ ፯ ወ ፯ እደ ፡ አሐቲ ፡ ወመንፈቃ ፡ የዐርብ ፡ ምስለ ፡ ጸሐይ ።

7 ወሶበ ፡ ይሠርቅ ፡ ጸሐይ ፡ ይሠርቅ ፡ ወርኅ ፡ ምስሌሁ ፡ ወይነሥእ ፡ መንፈቀ ፡ እደ ፡ ብርሃን ፡ ወበይእቲ ፡ ሌሊት ፡ በርእሰ ፡ ጽባሐ ፡ ዚአሁ ፡ በቅድመ ፡ ዕለቱ ፡ ለወርኅ ፡ የዐርብ ፡ ወርኅ ፡ ምስለ ፡ ጸሐይ ፡ ወይጸልም ፡ በይእቲ ፡ ሌሊት ፡ ፯ ወ ፯ እደ ፡ ወንፍቃ ።

8 ወይሠርቅ ፡ በይእቲ ፡ ዕለት ፡ ሳብዓየ ፡ እደ ፡ ጥንቁቀ ፡ ወይወጽእ ፡ ወይጸንን ፡ እምሥራቀ ፡ ጸሐይ ፡ ወያበርህ ፡ በተረፈ ፡ ዕለቱ ፡ ፯ ወ ፯ እደ ።