Chapter 71
Chapter 70 / Enoch / Chapter 71 Chapter 72

1 ወኮነ ፡ እምድኅረዝ ፡ ከመ ፡ ትትከበት ፡ መንፈስየ ፡ ወትዕርግ ፡ ውስተ ፡ ሰማያት ፡ ርኢክዎሙ ፡ ለውሉዶሙ ፡ ለመላእክት ፡ ይከይዱ ፡ ዲበ ፡ ላህበ ፡ እሳት ፡ ወአልባሲሆሙ ፡ ፀዐዳ ፡ ወዐጽፎሙኒ ፡ ወብርሃነ ፡ ገጾሙ ፡ ከመ ፡ በረድ ።

2 ወርኢኩ ፡ ፪ አፍላገ ፡ እሳት ፡ ወብርሃነ ፡ ዝኩ ፡ እሳት ፡ ከመ ፡ ያክንት ፡ ያበርህ ፡ ወወደቁ ፡ በገጽየ ፡ ቅድመ ፡ እግዚአ ፡ መናፍስት ።

3 ወሚካኤል ፡ መልአክ ፡ ፩ እምአርእስተ ፡ መላእክት ፡ አኀዘኒ ፡ እዴየ ፡ ዘየማን ፡ ወአንሥአኒ ፡ ወአውፅአኒ ፡ ኀበ ፡ ኵሉ ፡ ኅቡኣተ ፡ ምሕረት ፡ ወኅቡኣተ ፡ ጽድቅ ።

4 ወአርአየኒ ፡ ኵሎ ፡ ኅቡኣተ ፡ አጽናፈ ፡ ሰማይ ፡ ወኵሎ ፡ መዛግብተ ፡ ከዋክብት ፡ ወብርሃናት ፡ ኵሎሙ ፡ እምኀበ ፡ ወፅኡ ፡ ለገጸ ፡ ቅዱሳን ።

5 ወከበቶ ፡ መንፈስ ፡ ለሄኖክ ፡ ውስተ ፡ ሰማየ ፡ ሰማያት ፤ ወርኢኩ ፡ በህየ ፡ ማእከለ ፡ ዝኩ ፡ ብርሃን ፡ ከመ ፡ ቦቱ ፡ ዘይትነደቅ ፡ እምእብነ ፡ አስሐትያ ፡ ወማእከለ ፡ እሙንቱ ፡ አእባን ፡ ልሳናተ ፡ እሳት ፡ ሕያው ።

6 ወርእየት ፡ መንፈስየ ፡ ዐውደ ፡ ዘየዐውዶ ፡ ለውእቱ ፡ ቤት ፡ እሳት ፡ እም ፬ አጽናፊሁ ፡ ለውእቱ ፡ አፍላግ ፡ ምሉኣነ ፡ እሳት ፡ ሕያው ፡ ወየዐውድዎ ፡ ለውእቱ ፡ ቤት ።

7 ወዐውዱ ፡ ሱራፌል ፡ ወኪሩቤል ፡ ወኦፍኒን ፡ እሉ ፡ እሙንቱ ፡ እለ ፡ እይነውሙ ፡ ወየዐቅቡ ፡ መንበረ ፡ ስብሐተ ፡ ዚአሁ ።

8  ወርኢኩ ፡ መላእክተ ፡ እለ ፡ ኢይትኌለቁ ፡ አእላፈ ፡ አእላፋት ፡ ወትእልፊተ ፡ አእላፋት ፡ የዐውድዎ ፡ ለውእቱ ፡ ቤት ፡ ወሚካኤል ፡ ወሩፋኤል ፡ ወገብርኤል ፡ ወፋኑኤል ፡ ወመላእክት ፡ ቅዱሳን ፡ እለ ፡ መልዕልተ ፡ ሰማያት ፡ ይበውኡ ፡ ወይወፅኡ ፡ በውእቱ ፡ ቤት ።

9 ወወፅኡ ፡ እምነ ፡ ውእቱ ፡ ቤት ፡ ሚካኤል ፡ ወገብርኤል ፡ ሩፋኤል ፡ ወፋኑኤል ፡ ወብዙኃን ፡ ቅዱሳን ፡ መላእክት ፡ እለ ፡ አልቦሙ ፡ ኍልቍ ።

10 ወምስሌሆሙ ፡ ርእሰ ፡ መዋዕል ፡ ወርእሱ ፡ ከመ ፡ ፀምር ፡ ፀዐዳ ፡ ወንጹሕ ፡ ወልብሱ ፡ ዘኢይተረጐም ።

11 ወወደቁ ፡ በገጽየ ፡ ወኵሉ ፡ ሥጋየ ፡ ተመስወ ፡ ወመንፈስየ ፡ ተወለጠ ፡ ወጸራኅኩ ፡ በቃል ፡ ዐቢይ ፡ በመንፈሰ ፡ ኀይል ፡ ወባረኩ ፡ ወሰባሕኩ ፡ ወአልዐልኩ ።

12 ወእላ ፡ በረከታት ፡ እለ ፡ ወፅኣ ፡ እምነ ፡ አፉየ ፡ ኮና ፡ ሥሙራተ ፡ በቅድመ ፡ ዝኩ ፡ ርእሰ ፡ መዋዕል ።

13 ወመጽአ ፡ ውእቱ ፡ ርእሰ ፡ መዋዕል ፡ ምስለ ፡ ሚካኤል ፡ ወገብርኤል ፡ ሩፋኤል ፡ ወፋኑኤል ፡ ወአእላፍ ፡ ወትእልፊተ ፡ አእላፋት ፡ መላእክት ፡ እለ ፡ አልቦሙ ፡ ኍልቍ ።

14 ወመጽአ ፡ ኀቤየ ፡ ውእቱ ፡ መልአክ ፡ ወበቃሉ ፡ አምኀኒ ፡ ወይቤለኒ ፡ አንተ ፡ ውእቱ ፡ ወልደ ፡ ብእሲ ፡ ዘተወለድከ ፡ ለጽድቅ ፡ ወጽድቅ ፡ ላዕሌከ ፡ ኀደረ ፡ ወጽድቁ ፡ ለርእሰ ፡ መዋዕል ፡ ኢየኀድገከ ።

15 ወይቤለኒ ፡ ይጼውዕ ፡ ለከ ፡ ሰላመ ፡ በስሙ ፡ ለዓለም ፡ ዘይከውን ፡ እስመ ፡ እምህየ ፡ ወፅአ ፡ ሰላም ፡ እምፍጥረተ ፡ ዓለም ፡ ወከመዝ ፡ ይከውን ፡ ለከ ፡ ለዓለም ፡ ወለዓለመ ፡ ዓለም ።

16 ወኵሉ ፡ ዘይከውን ፡ ወየሐውር ፡ ዲበ ፡ ፍኖትከ ፡ እንዘ ፡ ጽድቅ ፡ እየኀድገከ ፡ ለዓለም ፡ ምስሌከ ፡ ይከውን ፡ ማኅደሮሙ ፡ ወምስሌከ ፡ ክፍሎሙ ፡ ወእምኔከ ፡ ኢይትሌለዩ ፡ ለዓለም ፡ ወለዓለመ ፡ ዓለም ።

17 ወከመዝ ፡ ይከውን ፡ ኑኀ ፡ መዋዕል ፡ ምስለ ፡ ውእቱ ፡ ወልደ ፡ እጓለ ፡ እመሕያው ፡ ወሰላም ፡ ይከውን ፡ ለጻድቃን ፡ ወፍኖቱ ፡ ርቱዕ ፡ ለጻድቃን ፡ በስመ ፡ እግዚአ ፡ መናፍስት ፡ ለዓለመ ፡ ዓለም ።