Chapter 69
Chapter 68 / Enoch / Chapter 69 Chapter 70

1 ወእምድኅረዝ ፡ ኵነኔ ፡ ያደነግፅዎሙ ፡ ወያምዕዕዎሙ ፡ እስመ ፡ ዘንተ ፡ አርአዩ ፡ ለእለ ፡ የኀድሩ ፡ ዲበ ፡ የብስ ።

2 ወነዋ ፡ አስማቲሆሙ ፡ ለእልክቱ ፡ መላእክት ፡ ወዝንቱ ፡ ውእቱ ፡ አስማቲሆሙ ፡ ቀዳማየ ፡ ዚአሆሙ ፡ ስምያዛ ፤ ወካልኡ ፡ አርስጢቂፋ ፤ ወሣልስ ፡ አርሜን ፤ ወራብዕ ፡ ከከባኤል ፤ ወኃምስ ፡ ጡርኤል ፤ ወሳድስ ፡ ሩምያል ፤ ወሳብዕ ፡ ዳንኤል ፤ ወሳምን ፡ ኑቃኤል ፤ ወታስዕ ፡ በራቅኤል ፤ ወዓሥር ፡ አዛዝኤል ፤ ፲ወ፩ አርምርስ ፤ ፲ወ፪ በጠርያል ፤ ፲ወ፫ በሰሳኤል ፤ ፲ወ፬ አናንኤል ፤ ፲ወ፭ ጡርያል ፤ ፲ወ፯ ሲማፒሲኤል ፤ ፲ወ፯ ይተርኤል ፤ ፲ወ፰ ቱማኤል ፤ ፲ወ፱ ጠርኤል ፤ ፳ ሩማኤል ፤ ፳ወ፩ ዒዜዜኤል ።

3 ወእሉ ፡ እሙንቱ ፡ አርእስተ ፡ መላእክቲሆሙ ፡ ወአስማቲሆሙ ፡ ለመኰንነ ፡ ፻ ዚአሆሙ ፤ ወመኰንነ ፡ ፶ ዚአሆሙ ፤ ወመኰንነ ፡ ፲ ዚአሆሙ ።

4 ስሙ ፡ ለቀዳማዊ ፡ ይቁን ፡ ወዝንቱ ፡ ዘአስሐተ ፡ ኵሎሙ ፡ ደቂቀ ፡ መላእክት ፡ ቅዱሳን ፡ ወአውረዶሙ ፡ ዲበ ፡ የብስ ፡ ወአስሐቶሙ ፡ በአዋልደ ፡ ሰብእ ።

5 ወካልእ ፡ ስሙ ፡ አስብኤል ፡ ዝንቱ ፡ አመሮሙ ፡ ምክረ ፡ እኩየ ፡ ለደቂቀ ፡ መላእክት ፡ ቅዱሳን ፡ ወአስሐቶሙ ፡ ከመ ፡ ያማስኑ ፡ ሥጋሆሙ ፡ በአዋልደ ፡ ሰብእ ።

6 ወሣልስ ፡ ስሙ ፡ ጋድርኤል ፡ ዝውእቱ ፡ ዘአርአየ ፡ ኵሎ ፡ ዝብጠታተ ፡ ሞት ፡ ለውሉደ ፡ ሰብእ ፡ ወውእቱ ፡ አስሐታ ፡ ለሔዋን ፡ ወውእቱ ፡ አርአየ ፡ ንዋየ ፡ ሞት ፡ ለደቂቀ ፡ ሰብእ ፡ ወድርዐ ፡ ወወልታ ፡ ወሰይፈ ፡ ለቀትል ፡ ወኵሎ ፡ ንዋየ ፡ ሞት ፡ ለውሉደ ፡ ሰብእ ።

7 ወእምነ ፡ እዴሁ ፡ ወፅአ ፡ ዲቤሆሙ ፡ ለእለ ፡ የኀድሩ ፡ ዲበ ፡ የብስ ፡ እምይእቲ ፡ ጊዜ ፡ ወእስከ ፡ ለዓለም ።

8 ወራብዕ ፡ ስሙ ፡ ፔኔሙዕ ፡ ዝንቱ ፡ አርአየ ፡ ለውሉደ ፡ ሰብእ ፡ መሪረ ፡ ወመዐርዒረ ፡ ወአርአዮሙ ፡ ኵሎ ፡ ኅቡኣተ ፡ ጥበቦሙ ።

9 ውእቱ ፡ አለበዎሙ ፡ ለሰብእ ፡ መጽሐፈ ፡ ወበማየ ፡ ሕመት ፡ ወክርታስ ፡ ወበእንተዝ ፡ ብዙኃን ፡ እለ ፡ ስሕቱ ፡ እምዓለም ፡ ወእስከ ፡ ለዓለም ፡ ወእስከ ፡ ዛቲ ፡ ዕለት ።

10 እስመ ፡ ኢተወልደ ፡ ሰብእ ፡ ለዝ ፡ ከመዝ ፡ በቀለም ፡ ወበማየ ፡ ሕመት ፡ ያጽንዑ ፡ ሃይማኖቶሙ ።

11 እስመ ፡ ኢተፈጥረ ፡ ሰብእ ፡ ዘእንበለ ፡ ከመ ፡ መላእክት ፡ ከመ ፡ ይንበሩ ፡ ጻድቃነ ፡ ወንጹሓነ ፡ ወሞት ፡ ዘኵሎ ፡ ያማስን ፡ እምኢገሰሶሙ ፡ አላ ፡ በዝ ፡ አእምሮቶሙ ፡ ይትኀጐሉ ፡ ወበዝንቱ ፡ ኀይል ፡ ይበልዐኒ ።

12 ወኃምስ ፡ ስሙ ፡ ከስድያዕ ፡ ዝንቱ ፡ አርአየ ፡ ለውሉደ ፡ ሰብእ ፡ ኵሎ ፡ ዝብጠታተ ፡ እኩየ ፡ ዘነፍሳት ፡ ወዘአጋንንት ፡ ወዝብጠታተ ፡ ጻእጻእ ፡ በማኅፀን ፡ ከመ ፡ ይደቅ ፡ ወዝብጠታተ ፡ ነፍስ ፡ ንስከተ ፡ አርዌ ፡ ወዝብጠተ ፡ ዘይከውን ፡ በቀትር ፡ ወልዳ ፡ ለአርዌ ፡ ዘስሙ ፡ ተባዕት ።

13 ወዝንቱ ፡ ውእቱ ፡ ኍልቁ ፡ ለክስብኤል ፡ ርእሰ ፡ መሐላ ፡ ዘአርአየ ፡ ለቅዱሳን ፡ ሶበ ፡ የኀድር ፡ ልዑል ፡ በስብሐት ፡ ወስሙ ፡ ቤቃ ።

14 ወዝንቱ ፡ ይቤሎ ፡ ለቅዱስ ፡ ሚካኤል ፡ ያርእዮሙ ፡ ስመ ፡ ኅቡአ ፡ ከመ ፡ ይርአይዎ ፡ ለውእቱ ፡ ስም ፡ ኅቡእ ፡ ወከመ ፡ ይዝክርዎ ፡ በመሐላ ፡ ከመ ፡ ይርዐዱ ፡ እምውእቱ ፡ ስም ፡ ወመሐላ ፡ እለ ፡ አርአዩ ፡ ለውሉደ ፡ ሰብእ ፡ ኵሎ ፡ ዘኅቡእ ።

15 ወዝንቱ ፡ ኀይሉ ፡ ለዝ ፡ መሐላ ፡ እስመ ፡ ኀያል ፡ ውእቱ ፡ ወጽኑዕ ፡ ወአንበሮ ፡ ለዝ ፡ መሐላ ፡ አካዕ ፡ በእዴሁ ፡ ለቅዱስ ፡ ሚካኤል ።

16 ወእሉ ፡ እሙንቱ ፡ ኅቡኣቲሁ ፡ ለዝ ፡ መሐላ ፡ ወጸንዑ ፡ በመሐላሁ ፡ ወሰማይ ፡ ተሰቅለ ፡ ዘእንበለ ፡ ይትፈጠር ፡ ዓለም ፡ ወእስከ ፡ ለዓለም ።

17 ወቦቱ ፡ ምድር ፡ ተሳረረት ፡ ዲበ ፡ ማይ ፡ ወእምነ ፡ ኅቡኣተ ፡ አድባር ፡ ይመጽኣ ፡ ላህያት ፡ ለሕያዋን ፡ ማያት ፡ እምፍጥረተ ፡ ዓለም ፡ ወእስከ ፡ ለዓለም ።

18 ወበውእቱ ፡ መሐላ ፡ ተፈጥረት ፡ ባሕር ፡ ወመሠረታ ፡ ለጊዜ ፡ መዐት ፡ አንበረ ፡ ላቲ ፡ ኆፃ ፡ ወኢተኀልፍ ፡ እምፍጥረተ ፡ ዓለም ፡ ወእስከ ፡ ለዓለም ።

19 ወበውእቱ ፡ መሐላ ፡ ቀላያት ፡ ጸንዑ ፡ ወቆሙ ፡ ወኢይትሐወሱ ፡ እመካኖሙ ፡ እምዓለም ፡ ወእስከ ፡ ለዓለም ።

20 ወበውእቱ ፡ መሐላ ፡ ፀሐይ ፡ ወወርኅ ፡ ይፌጽሙ ፡ ምሕዋሮሙ ፡ ወኢየኀልፉ ፡ እምትእዛዞሙ ፡ እምዓለም ፡ ወእስከ ፡ ለዓለም ።

21 ወበውእቱ ፡ መሐላ ፡ ከዋክብት ፡ ይፌጽሙ ፡ ምሕዋሮሙ ፡ ወአስማቲሆሙ ፡ ይጼውዕ ፡ ወያወሥእዎ ፡ እምዓለም ፡ ወእስከ ፡ ለዓለም ።

22 ወከመዝ ፡ ለማይ ፡ ነፍሳቲሆሙ ፡ ለነፋሳት ፡ ወለኵሎሙ ፡ መንፈሳት ፡ ወፍናዋቲሆሙ ፡ እምኵሉ ፡ ኅብራተ ፡ መናፍስት ።

23 ወበህየ ፡ ይትዐቀቡ ፡ መዛግብተ ፡ ቃሉ ፡ ለነጐድጓድ ፡ ወብርሃኑ ፡ ለመብረቅ ፡ ወበህየ ፡ ይትዐቀብ ፡ መዛግብተ ፡ በረድ ፡ ወአስሐትያ ፡ ወመዛግብተ ፡ ጊሜ ፡ ወመዛግብተ ፡ ዝናም ፡ ወጠል ።

24 ወኵሎሙ ፡ እሙንቱ ፡ የአምኑ ፡ ወያአኵቱ ፡ በቅድመ ፡ እግዚአ ፡ መናፍስት ፡ ወይሴብሑ ፡ በኵሉ ፡ ኀይሎሙ ፡ ወሲሳዮሙ ፡ በኵሉ ፡ አኰቴት ፡ ይእቲ ፡ ወያአኵቱ ፡ ወይሴብሑ ፡ ወያሌዕሉ ፡ በስሙ ፡ ለእግዚአ ፡ መናፍስት ፡ ለዓለመ ፡ ዓለም ።

25 ወዲቤሆሙ ፡ ጸንዐ ፡ ዝመሐላ ፡ ወይትዐቀቡ ፡ ቦቱ ፡ ወፍናዊሆሙ ፡ ይትዐቀቡ ፡ ወምሕዋራቲሆሙ ፡ ኢይማስን ።

26 ወኮኖሙ ፡ ፍሥሐ ፡ ዐቢየ ፡ ወባረኩ ፡ ወሰብሑ ፡ ወአልዐሉ ፡ በእንተ ፡ ዘተከሥተ ፡ ሎሙ ፡ ስሙ ፡ ለውእቱ ፡ ወልደ ፡ እጓለ ፡ እመሕያው ።

27 ወነበረ ፡ ዲበ ፡ መንበረ ፡ ስብሐቲሁ ፡ ወርእሱ ፡ ለኵነኔ ፡ ተውህበ ፡ ሎቱ ፡ ለወልደ ፡ እጓለ ፡ እመሕያው ፡ ወያኀልፍ ፡ ወያማስን ፡ ኃጥኣነ ፡ እምገጻ ፡ ለምድር ፡ ወእለ ፡ አስሐትዎ ፡ ለዓለም ።

28 በሰናስል ፡ ይትአሠሩ ፡ ወበማኅበሮሙ ፡ ዘሙስና ፡ ይትዐፀዉ ፡ ወኵሉ ፡ ምግባሮሙ ፡ የኀልፍ ፡ እምቅድመ ፡ ገጸ ፡ ምድር ።

29 ወእምይእዜሰ ፡ ኢይከውን ፡ ዘይማስን ፡ እስመ ፡ ውእቱ ፡ ወልደ ፡ ብእሲ ፡ ተርእየ ፡ ወነበረ ፡ ዲበ ፡ መንበረ ፡ ስብሐቲሁ ፡ ወኵሉ ፡ እኩይ ፡ እምቅድመ ፡ ገጹ ፡ የኀልፍ ፡ ወየሐውር ፡ ወነገሩ ፡ ለውእቱ ፡ ወልደ ፡ ብእሲ ፡ ይጸንዕ ፡ በቅድመ ፡ እግዚአ ፡ መናፍስት ።

30 ዝውእቱ ፡ ምሳሌ ፡ ሣልስ ፡ ዘሄኖክ ።