Chapter 67
Chapter 66 / Enoch / Chapter 67 Chapter 68

1 ወበእማንቱ ፡ መዋዕል ፡ ኮነ ፡ ቃለ ፡ እግዚአብሔር ፡ ኀቤየ ፡ ወይቤለኒ ፡ ኖኅ ፡ ናሁ ፡ ክፍልከ ፡ ዐርገ ፡ ኀቤየ ፡ ክፍል ፡ ዘአልቦቱ ፡ ሒስ ፡ ክፍለ ፡ ፍቅር ፡ ወርትዕ ።

2 ወይእዜኒ ፡ ይገብሩ ፡ መላእክት ፡ ዕፀወ ፡ ወሶበ ፡ ወፅኡ ፡ ለውእቱ ፡ መልእክት ፡ እወዲ ፡ እዴየ ፡ ዲቤሃ ፡ ወአዐቅባ ፡ ወትከውን ፡ እምኔሃ ፡ ዘርአ ፡ ሕይወት ፡ ወተውላጠ ፡ ይባእ ፡ ከመ ፡ ኢይንበር ፡ የብስ ፡ ዕራቆ ።

3 ወአጸንዖ ፡ ለዘርእከ ፡ በቅድሜየ ፡ ለዓለመ ፡ ዓለም ፤ ወእዘርኦሙ ፡ ለእለ ፡ የኀድሩ ፡ ምስሌከ ፡ ውስተ ፡ ገጸ ፡ የብስ ፡ ወይትባረክ ፡ ወይትባዛኅ ፡ ቅድመ ፡ የብስ ፡ በስሙ ፡ ለእግዚእ ።

4 ወየዐፅውዎሙ ፡ ለእልክቱ ፡ መላእክት ፡ እለ ፡ አርአይዋ ፡ ለዐመፃ ፡ ውስተ ፡ ይእቲ ፡ ቈላ ፡ እንተ ፡ ትነድድ ፡ እንተ ፡ አርአየኒ ፡ ቀዳሚ ፡ እምሔውየ ፡ ሄኖክ ፡ በዐረብ ፡ በኀበ ፡ አድባረ ፡ ወርቅ ፡ ወብሩር ፡ ወሐፂን ፡ ወነጠብጣብ ፡ ወናእክ ።

5 ወርኢክዋ ፡ ለይእቲ ፡ ቈላ ፡ እንተ ፡ ሀውክ ፡ ዐቢይ ፡ ባቲ ፡ ወተሀውኮ ፡ ማያት ።

6 ወዝንቱ ፡ ኵሉ ፡ ሶበ ፡ ተገብረ ፡ እምውእቱ ፡ ነጠብጣበ ፡ እሳት ፡ ወሀውኮሙ ፡ ዘየሀውኮሙ ፡ በውእቱ ፡ መካን ፡ ተወልደ ፡ ፄና ፡ ተይ ፡ ወተኀብረ ፡ ምስለ ፡ እልኩ ፡ ማያት ፡ ወይእቲ ፡ ቈላ ፡ እንተ ፡ መላእክት ፡ እለ ፡ አስሐቱ ፡ ትነድድ ፡ መትሕተ ፡ ይእቲ ፡ ምድር ።

7 ወእንተ ፡ ቈላተ ፡ ዚአሃ ፡ አፍላገ ፡ እሳት ፡ ይወፅኡ ፡ በኀበ ፡ ይትኴነኑ ፡ እልክቱ ፡ መላእክት ፡ እለ ፡ አስሐትዎሙ ፡ ለእለ ፡ የኀድሩ ፡ ዲበ ፡ የብስ ።

8 ወይከውኑ ፡ እልክቱ ፡ ማያት ፡ በእማንቱ ፡ መዋዕል ፡ ለነገሥት ፡ ወለአዚዛን ፡ ወለልዑላን ፡ ወለእለ ፡ የኀድሩ ፡ ዲበ ፡ የብስ ፡ ለፈውሰ ፡ ነፍስ ፡ ወሥጋ ፡ ወለኵነኔ ፡ መንፈስ ፡ ወተውኔተ ፡ ይመልእ ፡ መንፈሶሙ ፡ ከመ ፡ ይትኰነኑ ፡ ሥጋሆሙ ፡ እስመ ፡ ክህድዎ ፡ ለእግዚአ ፡ መናፍስት ፡ ወይሬእዩ ፡ ኵነኔሆሙ ፡ እንተ ፡ ኵሉ ፡ ዕለት ፡ ወኢየአምኑ ፡ በስሙ ።

9 ወከመ ፡ ብዙኀ ፡ ውዕየ ፡ ሥጋሆሙ ፡ ከመዝ ፡ ቦሙ ፡ ተውላጥ ፡ ለመንፈስ ፡ ለዓለመ ፡ ዓለም ፡ እስመ ፡ አልቦ ፡ በቅድመ ፡ እግዚአ ፡ መናፍስት ፡ ዘይትናገር ፡ በነገረ ፡ በክ ።

10 እስመ ፡ ትመጽእ ፡ ኵነኔ ፡ ዲቤሆሙ ፡ እስመ ፡ የአምኑ ፡ በተውኔተ ፡ ሥጋሆሙ ፡ ወመንፈሰ ፡ እግዚእ ፡ ይክህዱ ።

11 ወኪያሁ ፡ ማያት ፡ በውእቱ ፡ መዋዕል ፡ ቦሙ ፡ ተውላጥ ፡ እስመ ፡ ሶበ ፡ ይትኴነኑ ፡ እልኩ ፡ መላእክት ፡ በውእቱ ፡ መዋዕል ፡ ይትዌለጥ ፡ ዋዕዮሙ ፡ ለእልክቱ ፡ አንቅዕተ ፡ ማያት ፡ ወሶበ ፡ የዐርጉ ፡ መላእክት ፡ ይትዌለጥ ፡ ዝኩ ፡ ማይ ፡ ዘአንቅዕት ፡ ወይቈርር ።

12 ወሰማዕክዎ ፡ ለቅዱስ ፡ ሚካኤል ፡ እንዘ ፡ ያወሥእ ፡ ወይብል ፡ ዛቲ ፡ ኵነኔ ፡ እንተ ፡ ይትኴነኑ ፡ መላእክት ፡ ሰማዕት ፡ ይእቲ ፡ ለነገሥት ፡ ወለአዚዛን ፡ ወለእለ ፡ ይእኅዝዋ ፡ ለየብስ ።

13 እስመ ፡ እሉ ፡ ማያተ ፡ ኵነኔ ፡ ለፈውሰ ፡ ዚአሆሙ ፡ ለመላእክት ፡ ወለሞተ ፡ ሥጋሆሙ ፡ ወኢይሬእዩ ፡ ወኢየአምኑ ፡ ከመ ፡ ይትመየጡ ፡ እሙንቱ ፡ ማያት ፡ ወይከውኑ ፡ እሳተ ፡ ዘይነድድ ፡ ለዓለም ።