Chapter 65
Chapter 64 / Enoch / Chapter 65 Chapter 66

1  ወበእማንቱ ፡ መዋዕል ፡ ርእየ ፡ ኖኅ ፡ ምድረ ፡ ከመ ፡ አድነነት ፡ ወከመ ፡ ቅሩብ ፡ ሐጕላ ።

2 ወአንሥአ ፡ እገሪሁ ፡ እምህየ ፡ ወሖረ ፡ እስከ ፡ አጽናፈ ፡ ምድር ፡ ወጸርኀ ፡ ለእምሔዉ ፡ ሄኖክ ፡ ወይቤ ፡ ኖኅ ፡ በቃል ፡ መሪር ፡ ስምዐኒ ፡ ስምዐኒ ፡ ስምዐኒ ፡ ሥልሰ ።

3 ወይቤሎ ፡ ንግረኒ ፡ ምንት ፡ ውእቱ ፡ ዘይትገበር ፡ በዲበ ፡ ምድር ፡ እስመ ፡ ከመዝ ፡ ሰርሐት ፡ ምድር ፡ ወአንቀልቀለት ፡ ዮጊ ፡ አነ ፡ እትኀጐል ፡ ምስሌሃ ።

4 ወበድኅረ ፡ ውእቱ ፡ ጊዜ ፡ ኮነ ፡ ሀውክ ፡ ዐቢይ ፡ ዲበ ፡ ምድር ፡ ወተሰምዐ ፡ ቃል ፡ እምሰማይ ፡ ወወደቁ ፡ በገጽየ ።

5 ወመጽአ ፡ ሄኖክ ፡ እምሔውየ ፡ ወቆመ ፡ ኀቤየ ፡ ወይቤለኒ ፡ ለምንት ፡ ጸራኅከ ፡ ኀቤየ ፡ ጽራኀ ፡ መሪረ ፡ ወብካየ ።

6 ወትእዛዝ ፡ ወፅአ ፡ እምኀበ ፡ ገጸ ፡ እግዚእ ፡ ዲበ ፡ እለ ፡ የኀድሩ ፡ ውስተ ፡ የብስ ፡ ከመ ፡ ውእቱ ፡ ይኩን ፡ ኅልቀቶሙ ፡ እስመ ፡ አእመሩ ፡ ኵሎ ፡ ኅቡኣተ ፡ መላእክት ፡ ወኵሎ ፡ ግፍዐ ፡ ሰይጣናት ፡ ወኵሎ ፡ ኀይሎሙ ፡ ኅቡአ ፡ ወኵሎ ፡ ኀይሎሙ ፡ ለእለ ፡ ይገብሩ ፡ ሥራያተ ፡ ወኀይሎሙ ፡ ለኅብራት ፡ ወኀይሎሙ ፡ ለእለ ፡ ይሠብኩ ፡ ሥብኮ ፡ ኵሉ ፡ ምድር ።

7 ወእስኩ ፡ እፎ ፡ ይትወለድ ፡ ብሩር ፡ እምጸበለ ፡ ምድር ፡ ወእፎ ፡ ይከውን ፡ ነጠብጣብ ፡ ዲበ ፡ ምድር ።

8 እስመ ፡ ዐረር ፡ ወናእክ ፡ ኢይትወለድ ፡ እምድር ፡ ከመ ፡ ቀዳሚ ፡ ነቅዕ ፡ ውእቱ ፡ ዘይወልዶሙ ፡ ወመልአክ ፡ ዘይቀውም ፡ ውስቴታ ፡ ወይበድር ፡ ውእቱ ፡ መልአክ ።

9 ወእምድኅረዝ ፡ አኀዘኒ ፡ እምሔውየ ፡ ሄኖክ ፡ በእዴሁ ፡ ወአንሥአኒ ፡ ወይቤለኒ ፡ ሑር ፡ እስመ ፡ ተስእልክዎ ፡ ለእግዚአ ፡ መናፍስት ፡ በእንተዝ ፡ ሀውክ ፡ ዘዲበ ፡ ምድር ።

10 ወይቤለኒ ፡ በእንተ ፡ ዐመፃሆሙ ፡ ተፈጸመት ፡ ኵነኔሆሙ ፡ ወኢይትኌለቍ ፡ በቅድሜየ ፡ በእንተ ፡ አውራኅ ፡ ዘኀሠሡ ፡ ወአእመሩ ፡ ከመ ፡ ምድር ፡ ትትሐጐል ፡ ወእለ ፡ የኀድሩ ፡ ዲቤሃ ።

11 ወለእሉ ፡ ምግባእ ፡ አልቦሙ ፡ ለዓለም ፡ እስመ ፡ አርአይዎሙ ፡ ዘኅቡእ ፡ ወእለ ፡ ተኰነኑ ፡ ወአኮ ፡ ለከ ፡ አንተ ፡ ወልድየ ፡ አእመረ ፡ እግዚአ ፡ መናፍስት ፡ እስመ ፡ ንጹሕ ፡ ወኄር ፡ አንተ ፡ እምዝ ፡ ሒስ ፡ ዘኅቡኣት ።

12 ወአጽንዖ ፡ ለስምከ ፡ በማዕከለ ፡ ቅዱሳን ፡ ወየዐቅበከ ፡ እምእለ ፡ የኀድሩ ፡ ዲበ ፡ የብስ ፡ ወአጽንዖ ፡ ለዘርእከ ፡ በጽድቅ ፡ ለነገሥት ፡ ወለስብሐት ፡ ዐቢያት ፡ ወእምዘርእከ ፡ ይወፅእ ፡ ነቅዐ ፡ ጻድቃን ፡ ወቅዱሳን ፡ ወኍልቍ ፡ አልቦሙ ፡ ለዓለም ።