Chapter 63
Chapter 62 / Enoch / Chapter 63 Chapter 64

1 በእማንቱ ፡ መዋዕል ፡ ያስተበቍዑ ፡ ነገሥት ፡ አዚዛን ፡ እለ ፡ ይእኅዝዋ ፡ ለየብስ ፡ እመላእክተ ፡ መቅሠፍቱ ፡ በኀበ ፡ ሀለዉ ፡ ምጥዋነ ፡ ከመ ፡ የሀቦሙ ፡ ዕረፍተ ፡ ንስቲተ ፡ ወከመ ፡ ይደቁ ፡ ወይስግዱ ፡ በቅድመ ፡ እግዚአ ፡ መናፍስት ፡ ወይትአመኑ ፡ ኀጢአቶሙ ፡ በቅድሜሁ ።

2 ወይባርክዎ ፡ ወይሴብሕዎ ፡ ለእግዚአ ፡ መናፍስት ፡ ወይብሉ ፡ ቡሩክ ፡ ውእቱ ፡ እግዚአ ፡ መናፍስት ፡ ወእግዚአ ፡ ነገሥት ፡ እግዚኦሙ ፡ ለአዚዛን ፡ ወእግዚኡ ፡ ለባዕል ፡ ወእግዚአ ፡ ስብሐት ፡ ወእግዚአ ፡ ጥበብ ፡ ወይበርህ ፡ ኵሉ ፡ ኅቡእ ።

3 ወኀይልከ ፡ ለትውልደ ፡ ትውልድ ፡ ወስብሐቲከ ፡ ለዓለመ ፡ ዓለም ፡ ዕሙቅ ፡ ውእቱ ፡ ኅቡኣተ ፡ ዚአከ ፡ ኵሉ ፡ ወኍልቍ ፡ አልቦ ፡ ወጽድቀ ፡ ዚአከ ፡ ሐሳብ ፡ አልቦ ።

4 ይእዜ ፡ አእመርነ ፡ ከመ ፡ ንሰብሖ ፡ ወንባርኮ ፡ ለእግዚአ ፡ ነገሥት ፡ ወለዘይነግሥ ፡ ዲበ ፡ ኵሎሙ ፡ ነገሥት ።

5 ወይብሉ ፡ መኑ ፡ ወሀበነ ፡ ዕረፍተ ፡ ከመ ፡ ንሰብሖ ፡ ወናእኵቶ ፡ ወንባርኮ ፡ ወንእመን ፡ ቅድመ ፡ ስብሐቲሁ ።

6 ወይእዜኒ ፡ ንስቲተ ፡ ዕረፍተ ፡ ንትሜነይ ፡ ወኢንረክብ ፡ ንሰደድ ፡ ወኢንእኅዝ ፡ ወብርሃን ፡ እምቅድሜነ ፡ ኀለፈ ፡ ወጽልመት ፡ ምንባሪነ ፡ ለዓለመ ፡ ዓለም ።

7 እስመ ፡ በቅድሜሁ ፡ ኢአመነ ፡ ወኢሰባሕነ ፡ በስሙ ፡ ለእግዚአ ፡ ነገሥት ፡ ወኢሰባሕናሁ ፡ ለእግዚእ ፡ በኵሉ ፡ ተግባሩ ፡ ወተስፋነ ፡ ኮነ ፡ ዲበ ፡ በትረ ፡ መንግሥትነ ፡ ወስብሐቲነ ።

8 ወበዕለተ ፡ ስራሕነ ፡ ወምንዳቤነ ፡ ኢያድኅነነ ፡ ወኢንረክብ ፡ ዕረፍተ ፡ ንእመን ፡ እስመ ፡ መሃይምን ፡ ውእቱ ፡ እግዚእነ ፡ በኵሉ ፡ ምግባሩ ፡ ወበኵሉ ፡ ኵነኔሁ ፡ ወጽድቁ ፡ ወገጸ ፡ ኵነኔሁ ፡ ኢይነሥኡ ።

9 ወነኀልፍ ፡ እምገጹ ፡ በእንተ ፡ ምግባሪነ ፡ ወኵሉ ፡ ኀጢአትነ ፡ በጽድቅ ፡ ተኈለቈ ።

10 ይእዜ ፡ ይቤልዎሙ ፡ ትፀግብ ፡ ነፍስነ ፡ እምንዋየ ፡ ዐመፃ ፡ ወኢትከልእ ፡ ወሪዶተነ ፡ እምላህባ ፡ ለክበደ ፡ ሲኦል ።

11 ወእምድኅረዝ ፡ ይመልእ ፡ ገጾሙ ፡ ጽልመተ ፡ ወኀፍረተ ፡ በቅድመ ፡ ዝኩ ፡ ወልደ ፡ እጓለ ፡ እመሕያው ፡ ወእምቅድመ ፡ ገጹ ፡ ይሰደዱ ፡ ወሰይፍ ፡ የኀድር ፡ ቅድመ ፡ ገጹ ፡ ማእከሎሙ ።

12 ወከመዝ ፡ ይቤ ፡ እግዚአ ፡ መናፍስት ፡ ዝንቱ ፡ ውእቱ ፡ ሥርዐቶሙ ፡ ወኵነኔሆሙ ፡ ለአዚዛን ፡ ወለነገሥት ፡ ወለልዑላን ፡ ወለእለ ፡ ይእኅዝዋ ፡ ለየብስ ፡ በቅድመ ፡ እግዚአ ፡ መናፍስት ።