Chapter 62
Chapter 61 / Enoch / Chapter 62 Chapter 63

1 ወከመዝ ፡ አዘዘ ፡ እግዚእ ፡ ለነገሥት ፡ ወለአዚዛን ፡ ወለልዑላን ፡ ወለእለ ፡ የኀድርዋ ፡ ለምድር ፡ ወይብል ፡ ክሥቱ ፡ አዕይንቲክሙ ፡ ወአንሥኡ ፡ አቅርንቲክሙ ፡ እመ ፡ ትክሉ ፡ አእምሮቶ ፡ ለኅሩይ ።

2 ወነበረ ፡ እግዚአ ፡ መናፍስት ፡ ዲበ ፡ መንበረ ፡ ስብሐቲሁ ፡ ወመንፈሰ ፡ ጽድቅ ፡ ተክዕወ ፡ ዲቤሁ ፡ ወነገረ ፡ አፉሁ ፡ ይቀትል ፡ ኵሎ ፡ ኃጥኣነ ፡ ወኵሎ ፡ ዐማፅያነ ፡ ወእምገጹ ፡ ይትኀጐሉ ።

3 ወይቀውሙ ፡ በይእቲ ፡ ዕለት ፡ ኵሎሙ ፡ ነገሥት ፡ ወአዚዛን ፡ ወልዑላን ፡ ወእለ ፡ ይእኅዝዋ ፡ ለየብስ ፡ ወይሬእይዎ ፡ ወያአምርዎ ፡ ከመ ፡ ይነብር ፡ ዲበ ፡ መንበረ ፡ ስብሐቲሁ ፡ ወጻድቃን ፡ በጽድቅ ፡ ቅድሜሁ ፡ ይትኴነኑ ፡ ወነገረ ፡ በክ ፡ አልቦ ፡ ዘይትበሀል ፡ በቅድሜሁ ።

4 ወይመጽእ ፡ ዲቤሆሙ ፡ ሕማም ፡ ከመ ፡ ብእሲት ፡ እንተ ፡ ውስተ ፡ ማሕምም ፡ ወየዐፅባ ፡ ወሊድ ፡ ሶበ ፡ ይመጽእ ፡ ወልዳ ፡ በአፈ ፡ ማኅፀን ፡ ወተዐፅብ ፡ በወሊድ ።

5 ወይሬእዩ ፡ መንፈቆሙ ፡ ለመንፈቆሙ ፡ ወይደነግፁ ፡ ወያቴሕቱ ፡ ገጾሙ ፡ ወይእኅዞሙ ፡ ሕማም ፡ ሶበ ፡ ይሬእይዎ ፡ ለዝኩ ፡ ወልደ ፡ ብእሲት ፡ እንዘ ፡ ይነብር ፡ ዲበ ፡ መንበረ ፡ ስብሐቲሁ ።

6 ወይሴብሕዎ ፡ ወይባርክዎ ፡ ወያሌዕልዎ ፡ ነገሥት ፡ አዚዛን ፡ ወኵሎሙ ፡ እለ ፡ ይእኅዝዋ ፡ ለምድር ፡ ለዘይመልክ ፡ ኵሎ ፡ ዘኅቡእ ።

7 እስመ ፡ እምቅድም ፡ ኅቡአ ፡ ኮነ ፡ ወልደ ፡ እጓለ ፡ እመሕያው ፡ ወዐቀቦ ፡ ልዑል ፡ በቅድመ ፡ ኀይሉ ፡ ወከሠቶ ፡ ለኅሩያን ።

8 ወይዘራእ ፡ ማኅበረ ፡ ቅዱሳን ፡ ወኅሩያን ፡ ወይቀውሙ ፡ በቅድሜሁ ፡ ኵሎሙ ፡ ኅሩያን ፡ በይእቲ ፡ ዕለት ።

9 ወይወድቁ ፡ ኵሎሙ ፡ ነገሥት ፡ አዚዛን ፡ ወልዑላን ፡ ወእለ ፡ ይመልክዋ ፡ ለየብስ ፡ በቅድሜሁ ፡ በገጾሙ ፡ ወይሰግዱ ፡ ወይሴፈውዎ ፡ ለዝኩ ፡ ወልደ ፡ እጓለ ፡ እመሕያው ፡ ወያስተበቍዕዎ ፡ ወይስእሉ ፡ ምሕረተ ፡ እምኀቤሁ ።

10 ወያጔጕዖሙ ፡ እንከ ፡ ውእቱ ፡ እግዚአ ፡ መናፍስት ፡ ከመ ፡ ያፍጥኑ ፡ ወይፃኡ ፡ እምቅድመ ፡ ገጹ ፡ ወገጾሙ ፡ ይመልእ ፡ ኀፍረተ ፡ ወጽልመተ ፡ ይትዌሰክ ፡ ገጾሙ ።

11 ወይትሜጠውዎሙ ፡ መላእክተ ፡ መቅሠፍት ፡ ከመ ፡ ይትፈደዩ ፡ እምኔሆሙ ፡ ዘገፍእዎሙ ፡ ለደቂቁ ፡ ወለኅሩያነ ፡ ዚአሁ ።

12 ወይከውኑ ፡ አርአያ ፡ ለጻድቃን ፡ ወለኅሩያነ ፡ ዚአሁ ፡ ቦሙ ፡ ይትፌሥሑ ፡ እስመ ፡ መዐቱ ፡ ለእግዚአ ፡ መናፍስት ፡ ዲቤሆሙ ፡ ታአርፍ ፡ ወመጥባሕቱ ፡ ለእግዚአ ፡ መናፍስት ፡ ትሰክር ፡ እምኔሆሙ ።

13 ወጻድቃን ፡ ወኅሩያን ፡ ይድኅኑ ፡ በይእቲ ፡ ዕለት ፡ ወገጾሙ ፡ ለኃጥኣን ፡ ወለዐማፅያን ፡ ኢይሬእዩ ፡ እምይእዜ ።

14 ወእግዚአ ፡ መናፍስት ፡ ዲቤሆሙ ፡ የኀድር ፡ ወምስለ ፡ ዝኩ ፡ ወልደ ፡ እጓለ ፡ እመሕያው ፡ የኀድሩ ፡ ወይበልዑ ፡ ወይሰክቡ ፡ ወይትነሥኡ ፡ ለዓለመ ፡ ዓለም ።

15 ወተንሥኡ ፡ ጻድቃን ፡ ወኅሩያን ፡ እምድር ፡ ወኀደጉ ፡ አትሕቶ ፡ ገጾሙ ፡ ወለብሱ ፡ ልብሰ ፡ ሕይወት ።

16 ወውእቱ ፡ ይከውን ፡ ልብሰ ፡ ሕይወት ፡ በኀበ ፡ እግዚአ ፡ መናፍስት ፡ ወአልባሲክሙኒ ፡ ኢይበልዩ ፡ ወስብሐቲክሙ ፡ ኢየኀልቅ ፡ በቅድመ ፡ እግዚአ ፡ መናፍስት ።