Chapter 61
Chapter 60 / Enoch / Chapter 61 Chapter 62

1  ወርኢኩ ፡ በእማንቱ ፡ መዋዕል ፡ ተውህበ ፡ ለእልኩ ፡ መላእክት ፡ አኅባል ፡ ነዊኃን ፡ ወነሥኡ ፡ ሎሙ ፡ ክንፈ ፡ ወሠረሩ ፡ ወሖሩ ፡ መንገለ ፡ መስዕ ።

2 ወተስእልክዎ ፡ ለመልአክ ፡ እንዘ ፡ እብል ፡ ለምንት ፡ ነሥኡ ፡ እሎንቱ ፡ አኅባለ ፡ ነዊኃነ ፡ ወሖሩ ፡ ወይቤለኒ ፡ ሖሩ ፡ ከመ ፡ ይመጥኑ ።

3 ወይቤለኒ ፡ መልአክ ፡ ዘምስሌየ ፡ የሐውር ፡ እሉ ፡ እሙንቱ ፡ አምጣነ ፡ ጻድቃን ፡ ወመኣሥረ ፡ ጻድቃን ፡ ያመጽኡ ፡ ከመ ፡ ይትመርጐዙ ፡ በስሙ ፡ ለእግዚአ ፡ መናፍስት ፡ ለዓለመ ፡ ዓለም ።

4 ይዌጥኑ ፡ ወየኀድሩ ፡ ኅሩያን ፡ ምስለ ፡ ኅሩያን ፡ ወእሉ ፡ አምጣናት ፡ እለ ፡ ይትወሀቡ ፡ ለሃይማኖት ፡ ወያጸንዑ ፡ ቃለ ፡ ጽድቅ ።

5 ወእሉ ፡ አምጣናት ፡ ይከሥቱ ፡ ኩሎ ፡ ኅቡኣታ ፡ ለዕመቀ ፡ ምድር ፡ ወእለ ፡ ተኀጕሉ ፡ እምበድው ፡ ወእለ ፡ ተበልዑ ፡ እምዐሣተ ፡ ባሕር ፡ ወእምአራዊት ፡ ከመ ፡ ይግብኡ ፡ ወይትመርጐዙ ፡ በዕለተ ፡ ኅሩይ ፡ እስመ ፡ አልቦ ፡ ዘይትሐጐል ፡ በቅድመ ፡ እግዚአ ፡ መናፍስት ፡ ወአልቦ ፡ ዘይክል ፡ ተሐጕሎተ ።

6 ወነሥኡ ፡ ትእዛዘ ፡ እለ ፡ በመልዕልተ ፡ ሰማያት ፡ ኵሎሙ ፡ ወኀይል ፡ ፩ ወቃል ፡ ፩ ወብርሃን ፡ ፩ ከመ ፡ እሳት ፡ ተውህበ ፡ ሎሙ ።

7 ወለውእቱ ፡ መቅድመ ፡ ቃል ፡ ይባርክዎ ፡ ወያሌዕልዎ ፡ ወይሴብሕዎ ፡ በጥበብ ፡ ወይጠበቡ ፡ በነገር ፡ ወበመንፈሰ ፡ ሕይወት ።

8 ወእግዚአ ፡ መናፍስት ፡ ዲበ ፡ መንበረ ፡ ስብሐቲሁ ፡ አንበሮ ፡ ለኅሩይ ፡ ወይኴንን ፡ ኵሎ ፡ ግብሮሙ ፡ ለቅዱሳን ፡ በመልዕልተ ፡ ሰማይ ፡ ወበመዳልው ፡ ይደሉ ፡ ምግባሮሙ ።

9 ወሶበ ፡ ያሌዕል ፡ ገጾ ፡ ከመ ፡ ይኰንን ፡ ፍኖቶሙ ፡ እንተ ፡ ኅቡኣት ፡ በነገረ ፡ ስሙ ፡ ለእግዚአ ፡ መናፍስት ፡ ወአሰረ ፡ ዚአሆሙ ፡ በፍኖተ ፡ ኵነኔ ፡ ጽድቅ ፡ ዘእግዚአብሔር ፡ ልዑል ፡ ወይትናገሩ ፡ ኵሎሙ ፡ በ ፩ ቃል ፡ ወይባርኩ ፡ ወይሴብሑ ፡ ወያሌዕሉ ፡ ወይዌድሱ ፡ በስሙ ፡ ለእግዚአ ፡ መናፍስት ።

10 ወይጼውዕ ፡ ኵሎ ፡ ኀይለ ፡ ሰማያት ፡ ወኵሎ ፡ ቅዱሳነ ፡ ዘመልዕልት ፡ ወኀይለ ፡ እግዚአብሔር ፡ ኪሩቤል ፡ ወሱራፌል ፡ ወኦፍኒን ፡ ወኵሉ ፡ መላእክተ ፡ ኀይል ፡ ወኵሉ ፡ መላእክተ ፡ አጋእዝት ፡ ወኅሩይ ፡ ወካልእ ፡ ኀይል ፡ እለ ፡ ውስተ ፡ የብስ ፡ ዲበ ፡ ማይ ፡ በይእቲ ፡ ዕለት ፡

11 ወይነሥኡ ፡ ፩ ቃለ ፡ ወይባርኩ ፡ ወይሴብሑ ፡ ወይዌድሱ ፡ ወያሌዕሉ ፡ በመንፈሰ ፡ ሃይማኖት ፡ ወበመንፈሰ ፡ ጥበብ ፡ ወትዕግሥት ፡ ወበመንፈሰ ፡ ምሕረት ፡ ወበመንፈሰ ፡ ኵነኔ ፡ ወሰላም ፡ ወበመንፈሰ ፡ ኂሩት ፡ ወይብሉ ፡ ኵሎሙ ፡ በ ፩ ቃል ፡ ቡሩክ ፡ ውእቱ ፡ ወይትባረክ ፡ ስሙ ፡ ለእግዚአ ፡ መናፍስት ፡ ለዓለም ፡ ወእስከ ፡ ለዓለም ።

12 ይባርክዎ ፡ ኵሎሙ ፡ እለ ፡ ኢይነውሙ ፡ በመልዕልተ ፡ ሰማይ ፤ ይባርክዎ ፡ ኵሎሙ ፡ ቅዱሳኑ ፡ እለ ፡ ውስተ ፡ ሰማይ ፡ ወኵሎሙ ፡ ኅሩያን ፡ እለ ፡ የኀድሩ ፡ ውስተ ፡ ገነተ ፡ ሕይወት ፡ ወኵሉ ፡ መንፈሰ ፡ ብርሃን ፡ ዘትክል ፡ ባርኮቶ ፡ ወሰብሖቶ ፡ ወአልዕሎቶ ፡ ወቀድሶቶ ፡ ለስምከ ፡ ቅዱስ ፡ ወኵሉ ፡ ዘሥጋ ፡ ዘፈድፋደ ፡ እምኀይል ፡ ትሴብሕ ፡ ወትባርክ ፡ ለስምከ ፡ ለዓለመ ፡ ዓለም ።

13 እስመ ፡ ብዙኅ ፡ ምሕረቱ ፡ ለእግዚአ ፡ መናፍስት ፡ ወርኁቀ ፡ መዓት ፡ ወኵሎ ፡ ግብሮ ፡ ወኵሎ ፡ ኀይሎ ፡ በአምጣነ ፡ ገብረ ፡ ከሠተ ፡ ለጻድቃን ፡ ወለኅሩያን ፡ በስሙ ፡ ለእግዚአ ፡ መናፍስት ።