Chapter 60
Chapter 59 / Enoch / Chapter 60 Chapter 61

1 በዓመት ፡ ፭፻ ፡ ወበወርኅ ፡ ሳብዕ ፡ እምዐሡሩ ፡ ወረቡዑ ፡ ለወርኅ ፡ በሕይወተ ፡ ሄኖክ ፡ በውእቱ ፡ አምሳል ፡ ርኢኩ ፡ ከመ ፡ ታድለቀልቅ ፡ ሰማየ ፡ ሰማያት ፡ ድልቅልቀ ፡ ዐቢየ ፡ ወኀይሉ ፡ ለልዑል ፡ ወመላእክት ፡ አእላፈ ፡ አእላፋት ፡ ወትእልፊተ ፡ ትእልፊት ፡ ተሀውኩ ፡ ዐቢየ ፡ ሁከተ ።

2 ወሶቤሃ ፡ ርኢኩ ፡ ርእሰ ፡ መዋዕል ፡ ዲበ ፡ መንበረ ፡ ስብሐቲሁ ፡ ይነብር ፡ ወመላእክት ፡ ወጻድቃን ፡ ዐውዶ ፡ ይቀውሙ ።

3 ወሊተ ፡ ረዐድ ፡ ዐቢይ ፡ ነሥአኒ ፡ ወፍርሀት ፡ አኀዘኒ ፡ ወሐቌየ ፡ ተቀጽዐ ፡ ወተፈትሐ ፡ ወኵለንታየ ፡ ተመስወ ፡ ወወደቁ ፡ በገጽየ ።

4 ወፈነወ ፡ ቅዱስ ፡ ሚካኤል ፡ ካልአ ፡ መልአከ ፡ ቅዱሰ ፡ ፩ እምነ ፡ መላእክት ፡ ቅዱሳን ፡ ወአንሥአኒ ፡ ወሶበ ፡ አንሥአኒ ፡ መንፈስየ ፡ ገብአት ፡ እስመ ፡ ኢክህልኩ ፡ ተዐግሦ ፡ እምርእየ ፡ ዝኩ ፡ ኀይል ፡ ወኪያሁ ፡ ሀውክ ፡ ወአንቀልቅሎ ፡ ሰማይ ።

5 ወይቤለኒ ፡ ቅዱስ ፡ ሚካኤል ፡ በእንተ ፡ ምንት ፡ ራእይ ፡ ዘከመዝ ፡ ተሀውኮ ፤ እስከ ፡ ዮም ፡ ሀለወት ፡ ዕለተ ፡ ምሕረቱ ፡ ወሀሎ ፡ መሓሪ ፡ ወርኁቀ ፡ መዐት ፡ ላዕለ ፡ እለ ፡ የኀድሩ ፡ ዲበ ፡ የብስ ።

6 ወሶበ ፡ ትመጽእ ፡ ዕለት ፡ ወኀይል ፡ ወመቅሠፍት ፡ ወኵነኔ ፡ እንተ ፡ አስተዳለወ ፡ እግዚአ ፡ መናፍስት ፡ ለእለ ፡ ይሰግዱ ፡ ለኵነኔ ፡ ጽድቅ ፡ ወለእለ ፡ ይክሕዱ ፡ ለኵነኔ ፡ ጽድቅ ፡ ወለእለ ፡ ያነሥኡ ፡ ስሞ ፡ በከ ፡ ወተደለወት ፡ ይእቲ ፡ ዕለት ፡ ለኅሩያን ፡ መሀላ ፡ ወለኃጥኣን ፡ ሐተታ ።

7 ወይትከፈሉ ፡ በይእቲ ፡ ዕለት ፡ ፪ አናብርት ፡ አንበሪ ፡ አንስቲያዊት ፡ ዘስማ ፡ ሌዋታን ፡ ከመ ፡ ትኅድር ፡ በልጐተ ፡ ባሕር ፡ መልዕልተ ፡ አንቅዕተ ፡ ማያት ።

8 ወለተባዕታይ ፡ ስሙ ፡ ብሔሞት ፡ ዘይእኅዝ ፡ በእንግድዓሁ ፡ በበድው ፡ ዘኢያስተርኢ ፡ ወስሙ ፡ ዴንዳይን ፡ በምሥራቀ ፡ ገነት ፡ በኀበ ፡ ይነብሩ ፡ ኅሩያን ፡ ወጻድቃን ፡ በኀበ ፡ ተመጠወ ፡ እምሔውየ ፡ ዘውእቱ ፡ ሳብዕ ፡ እምነ ፡ አዳም ፡ ቀዳሚሆሙ ፡ ለሰብእ ፡ ዘገብረ ፡ እግዚአ ፡ መናፍስት ።

9 ወተስእልክዎ ፡ ለዝኩ ፡ ካልእ ፡ መልአክ ፡ ከመ ፡ ያርእየኒ ፡ ኀይሎሙ ፡ ለእልክቱ ፡ አናብርት ፡ እፎ ፡ ተሌለዩ ፡ በአሐቲ ፡ ዕለት ፡ ወተወድዩ ፡ ፩ በልጐተ ፡ ባሕር ፡ ወ ፩ በየብሰ ፡ በድው ።

10 ወይቤለኒ ፡ አንተ ፡ ወልደ ፡ ሰብእ ፡ በዝየ ፡ ትፈቅድ ፡ ታእምር ፡ ዘኅቡእ ።

11 ወይቤለኒ ፡ ካልእ ፡ መልአክ ፡ ዘየሐውር ፡ ምስሌየ ፡ ወዘበኅቡእ ፡ ያርእየኒ ፡ ዘቀዳሚ ፡ ወዘደኃሪ ፤ በሰማይ ፡ በውስተ ፡ ላዕሉ ፤ ወበውስተ ፡ የብስ ፡ በማዕምቅ ፤ ወበአጽናፈ ፡ ሰማይ ፤ ወበመሠረተ ፡ ሰማይ ፤ ወበመዛግብተ ፡ ነፋሳት ።

12 ወእፎ ፡ ይትከፈሉ ፡ መናፍስት ፡ ወእፎ ፡ ይደሉ ፡ ወእፎ ፡ ይትኌለቁ ፡ አንቅዕት ፡ ወነፋሳት ፡ በኀይለ ፡ መንፈስ ፡ ወኀይሎሙ ፡ ለብርሃነ ፡ ወርኅ ፡ ወከመ ፡ ኀይለ ፡ ጽድቅ ፡ ወክፍላተ ፡ ከዋክብት ፡ በበስሞሙ ፡ ወኵሉ ፡ ክፍል ፡ ይትከፈል ።

13 ወነጐድጓድ ፡ በበሙዳቃቲሆሙ ፡ ወለኵሉ ፡ ክፍል ፡ ዘይትከፈል ፡ ከመ ፡ ይብርቅ ፡ በመብረቅ ፡ ወትዕይንቶሙ ፡ ከመ ፡ ፍጡነ ፡ ይስምዑ ።

14 እስመ ፡ ቦቱ ፡ ለነጐድጓድ ፡ ምዕራፋት ፡ በትዕግሥት ፡ ለቃለ ፡ ዚአሁ ፡ ተውህበ ፡ ወኢይትሌለዩ ፡ ኢነጐድጓድ ፡ ወኢመብረቅ ፡ ወኢ ፩ በመንፈስ ፡ ክልኤሆሙ ፡ የሐውሩ ፡ ወኢይትሌለዩ ።

15 እስመ ፡ ሶበ ፡ ይበርቅ ፡ መብረቅ ፡ ነጐድጓድ ፡ ቃሎ ፡ ይሁብ ፡ ወመንፈስ ፡ በጊዜሃ ፡ ያዐርፍ ፡ ወዕሩየ ፡ ይከፍል ፡ ማእከሎሙ ፡ እስመ ፡ መዝገበ ፡ ጊዜያቲሆሙ ፡ ዘኆፃ ፡ ውእቱ ፡ ወ ፩፩ እምኔሆሙ ፡ በጊዜሁ ፡ በልጓም ፡ ይትአኀዙ ፡ ወይትመየጡ ፡ በኀይለ ፡ መንፈስ ፡ ወይትነዳዕ ፡ ከመዝ ፡ በከመ ፡ ብዝኀ ፡ አድዋለ ፡ ምድር ።

16 ወመንፈሰ ፡ ባሕር ፡ ተባዕታይ ፡ ውእቱ ፡ ወጽኑዕ ፡ ወበከመ ፡ ኀይለ ፡ ጽንዐታ ፡ በልጓም ፡ ያገብኣ ፡ ወከመዝ ፡ ትትነዳዕ ፡ ወትዘራእ ፡ በኵሉ ፡ አድባረ ፡ ምድር ።

17 ወመንፈሰ ፡ አስሐትያ ፡ መልአከ ፡ ዚአሁ ፡ ውእቱ ፡ ወመንፈሰ ፡ በረድ ፡ መልአክ ፡ ኄር ፡ ውእቱ ።

18 ወመንፈሰ ፡ ሐመዳ ፡ ኀደገ ፡ በእንተ ፡ ኀይለ ፡ ዚአሁ ፡ ወመንፈስ ፡ ቦቱ ፡ ባሕቲቱ ፡ ወዘየዐርግ ፡ እምኔሁ ፡ ከመ ፡ ጢስ ፡ ውእቱ ፡ ወስሙ ፡ ደደክ ።

19 ወመንፈሰ ፡ ጊሜ ፡ ኢይትኀበር ፡ ምስሌሆሙ ፡ ውስተ ፡ መዛግብቲሆሙ ፡ አላ ፡ መዝገብ ፡ ቦቱ ፡ ለባሕቲቱ ፡ እስመ ፡ ምሕዋረ ፡ ዚአሁ ፡ በስብሐት ፡ ወበብርሃን ፡ ወበጽልመት ፡ ወበክረምት ፡ ወበሐጋይ ፡ ወመዝገበ ፡ ዚአሃ ፡ ብርሃን ፡ ወመልአካ ፡ ውእቱ ።

20 ወመንፈሰ ፡ ጠል ፡ ማኅደሩ ፡ በአጽናፈ ፡ ሰማይ ፡ ወድሩግ ፡ ውእቱ ፡ ምስለ ፡ መዛግብተ ፡ ዝናም ፡ ወምሕዋረ ፡ ዚአሁ ፡ በክረምት ፡ ወበሐጋይ ፡ ወደመና ፡ ዚአሁ ፡ ወደመና ፡ ጊሜ ፡ ኅብር ፡ ወ ፩ ለካልኡ ፡ ይሁብ ።

21 ወመንፈሱ ፡ ለዝናም ፡ ሶበ ፡ ይትሐወስ ፡ እምነ ፡ መዝገበ ፡ ዚአሁ ፡ ይመጽኡ ፡ መላእክት ፡ ወያርኅው ፡ መዝገበ ፡ ወያወፅእዎ ፡ ወሶበ ፡ ይዘራእ ፡ ዲበ ፡ ኵሉ ፡ የብስ ፡ ወሶበ ፡ ይትኀበር ፡ በኵሉ ፡ ጊዜ ፡ ምስለ ፡ ማይ ፡ ዘዲበ ፡ የብስ ።

22 እስመ ፡ ኮኑ ፡ ማያት ፡ ለእለ ፡ የኀድሩ ፡ ዲበ ፡ የብስ ፡ እስመ ፡ ሲሳያ ፡ ለየብስ ፡ እምኀበ ፡ ልዑል ፡ ዘበሰማይ ፡ ውእቱ ፡ እስመ ፡ በእንተዝ ፡ መስፈርት ፡ ቦቱ ፡ ለዝናም ፡ ወመላእክት ፡ ይትሜጠውዎ ።

23 እሎንተ ፡ ኵሎሙ ፡ ርኢኩ ፡ እስከ ፡ ገነተ ፡ ጻድቃን ።

24 ወይቤለኒ ፡ መልአከ ፡ ሰላም ፡ ዘምስሌየ ፡ ይሄሉ ፡ እሉ ፡ ፪ አናብርት ፡ ላዕለ ፡ ዕበይ ፡ ዘእግዚአብሔር ፡ ድልዋን ፡ ይሴሰዩ ፡ ከመ ፡ መቅሠፍቱ ፡ ለእግዚአብሔር ፡ በከ ፡ ኢይኩን ፡ ወይትቀተሉ ፡ ደቂቅ ፡ ምስለ ፡ እማቲሆሙ ፡ ወውሉድ ፡ ምስለ ፡ አበዊሆሙ ።

25 ሶበ ፡ ታዐርፍ ፡ መቅሠፍቱ ፡ ለእግዚአ ፡ መናፍስት ፡ ዲቤሆሙ ፡ ታዐርፍ ፡ ከመ ፡ ኢትምጻእ ፡ መቅሠፍቱ ፡ ለእግዚአ ፡ መናፍስት ፡ በከ ፡ ዲበ ፡ እሉ ፡ ድኅረ ፡ ትከውን ፡ ኵነኔ ፡ በምሕረቱ ፡ ወበትዕግሥቱ ።