Chapter 58
Chapter 57 / Enoch / Chapter 58 Chapter 59

1 ወአኀዝኩ ፡ እበል ፡ ሣልሰ ፡ ምሳሌ ፡ በእንተ ፡ ጻድቃን ፡ ወበእንተ ፡ ኅሩያን ።

2 ብፁዓን ፡ አንትሙ ፡ ጻድቃን ፡ ወኅሩያን ፡ እስመ ፡ ስብሕ ፡ ክፍልክሙ ።

3 ወይከውኑ ፡ ጻድቃን ፡ በብርሃነ ፡ ፀሐይ ፡ ወኅሩያን ፡ በብርሃነ ፡ ሕይወት ፡ ዘለዓለም ፡ ወማኅለቅት ፡ አልቦቱ ፡ ለመዋዕለ ፡ ሕይወቶሙ ፡ ወለቅዱሳን ፡ ኍልቈ ፡ መዋዕል ፡ አልቦሙ ።

4 ወየኀሥሥዎ ፡ ለብርሃን ፡ ወይረክብ ፡ ጽድቀ ፡ በኀበ ፡ እግዚአ ፡ መናፍስት ፤ ሰላም ፡ ለጻድቃን ፡ በኀበ ፡ እግዚአ ፡ ዓለም ።

5 ወእምድኅረዝ ፡ ይትበሀል ፡ ለቅዱሳን ፡ ከመ ፡ ይኅሥሡ ፡ በሰማይ ፡ ኅቡኣተ ፡ ጽድቅ ፡ ክፍለ ፡ ሃይማኖት ፡ እስመ ፡ ሠረቀ ፡ ከመ ፡ ፀሐይ ፡ ዲበ ፡ የብስ ፡ ወጽልመት ፡ ኀለፈ ።

6 ወብርሃን ፡ ዘኢይትኌለቍ ፡ ይከውን ፡ ወበኍልቈ ፡ መዋዕል ፡ ኢይበውኡ ፡ እስመ ፡ ቀዳሚ ፡ ተሐጕለ ፡ ጽልመት ፡ ወብርሃን ፡ ይጸንዕ ፡ በቅድመ ፡ እግዚአ ፡ መናፍስት ፡ ወብርሃነ ፡ ርትዕ ፡ ትጸንዕ ፡ ለዓለም ፡ በቅድመ ፡ እግዚአ ፡ መናፍስት ።