Chapter 56
Chapter 55 / Enoch / Chapter 56 Chapter 57

1 ወርኢኩ ፡ በህየ ፡ ትዕይንተ ፡ መላእክት ፡ ዘመቅሠፍት ፡ እንዘ ፡ የሐውሩ ፡ ወእኁዛን ፡ መሣግረ ፡ ኀፂን ፡ ወብርት ።

2 ወተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ እንዘ ፡ እብል ፡ ለመኑ ፡ የሐውሩ ፡ እለ ፡ ይእኅዙ ።

3 ወይቤለኒ ፡ ፩፩ ፡ ለኅሩያነ ፡ ዚአሆሙ ፡ ወለፍቁራነ ፡ ዚአሆሙ ፡ ከመ ፡ ይትወደዩ ፡ ውስተ ፡ ንቅዐተ ፡ ማዕምቅት ፡ ዘቈላ ።

4 ወአሜሃ ፡ ይመልእ ፡ ውእቱ ፡ ቈላ ፡ እምነ ፡ ኅሩያን ፡ ወፍቁራነ ፡ ዚአሆሙ ፡ ወይትዌዳዕ ፡ ዕለተ ፡ ሕይወቶሙ ፡ ወዕለተ ፡ ስሕተቶሙ ፡ እምይእዜ ፡ ኢይትኌለቍ ።

5 ወበእማንቱ ፡ መዋዕል ፡ ይትጋብኡ ፡ መላእክት ፡ ወይወድዩ ፡ አርእስቲሆሙ ፡ ለምሥራቅ ፡ ለኀበ ፡ ሰብአ ፡ ጳርቴ ፡ ወሜድ ፡ የሐውስዎሙ ፡ ለነገሥት ፡ ወይበውእ ፡ ላዕሌሆሙ ፡ መንፈሰ ፡ ሀውክ ፡ ወየሀውክዎሙ ፡ እመናብርቲሆሙ ፡ ወይወፅኡ ፡ ከመ ፡ አናብስት ፡ እምስካባቲሆሙ ፡ ወከመ ፡ አዝእብት ፡ ርኁባን ፡ ማእከለ ፡ መርዔተ ፡ ዚአሆሙ ።

6 ወየዐርጉ ፡ ወይከይድዎ ፡ ለምድረ ፡ ኅሩያነ ፡ ዚአሆሙ ፡ ወትከውን ፡ ምድረ ፡ ኅሩያነ ፡ ዚአሁ ፡ በቅድሜሆሙ ፡ ምክያደ ፡ ወአሰረ ።

7 ወሀገረ ፡ ጻድቃነ ፡ ዚአየ ፡ ይከውን ፡ ማዕቅፈ ፡ ለአፍራሲሆሙ ፡ ወያነሥኡ ፡ በበይናቲሆሙ ፡ ቀትለ ፡ ወትጸንዕ ፡ የማኖሙ ፡ ዲቤሆሙ ፡ ወኢያአምሮ ፡ ብእሲ ፡ ለካልኡ ፡ ወለእኁሁ ፡ ወኢወልድ ፡ ለአቡሁ ፡ ወለእሙ ፡ እስከ ፡ ይከውን ፡ ኍልቈ ፡ አብድንት ፡ እሞቶሙ ፡ ወመቅሠፍቶሙ ፡ ወኢይከውን ፡ በከ ።

8 ወበእማንቱ ፡ መዋዕል ፡ ትፈትሕ ፡ አፉሃ ፡ ሲኦል ፡ ወይሠጠሙ ፡ ውስቴታ ፡ ወሐጕሎሙ ፡ ሲኦል ፡ ትውኅጦሙ ፡ ለኃጥኣን ፡ እምገጸ ፡ ኅሩያን ።