Chapter 55
Chapter 54 / Enoch / Chapter 55 Chapter 56

1 ወእምድኅረዝ ፡ ነስሐ ፡ ርእሰ ፡ መዋዕል ፡ ወይቤ ፡ በከ ፡ አሕጐልክዎሙ ፡ ለኵሎሙ ፡ እለ ፡ ይነብሩ ፡ ዲበ ፡ የብስ ።

2 ወመሐለ ፡ በስሙ ፡ ዐቢይ ፡ ከመ ፡ እምይእዜ ፡ ኢይገብር ፡ ከመዝ ፡ ለኵሎሙ ፡ እለ ፡ ይነብሩ ፡ ዲበ ፡ የብስ ፡ ወትእምርተ ፡ እወዲ ፡ በሰማያት ፡ ወይከውን ፡ ማእከሌየ ፡ ወማእከሎሙ ፡ ሃይማኖተ ፡ እስከ ፡ ለዓለም ፡ መጠነ ፡ መዋዕለ ፡ ሰማይ ፡ ዲበ ፡ ምድር ።

3 ወእምዝ ፡ በትእዛዝየ ፡ ውእቱ ፡ ሶበ ፡ ፈቀድኩ ፡ ከመ ፡ አጽንዖሙ ፡ በእደ ፡ መላእክት ፡ በዕለተ ፡ ምንዳቤ ፡ ወሕማም ፡ ቅድመዝ ፡ መዓትየ ፡ ወመቅሠፍትየ ፡ የኀድር ፡ ላዕሌሆሙ ፡ መዓትየ ፡ ወመቅሠፍትየ ፡ ይቤ ፡ እግዚአብሔር ፡ እግዚአ ፡ መናፍስት ።

4 ነገሥት ፡ ኀያላን ፡ እለ ፡ ተኀድሩ ፡ ውስተ ፡ የብስ ፡ ሀለወክሙ ፡ ትርአይዎ ፡ ለኅሩየ ፡ ዚአየ ፡ ከመ ፡ ይነብር ፡ በመንበረ ፡ ስብሐትየ ፡ ወይኴንኖ ፡ ለአዛዝኤል ፡ ወለኵሎሙ ፡ ማኅበረ ፡ ዚአሁ ፡ ወለትዕይንተ ፡ ዚአሁ ፡ ኵሎሙ ፡ በስሙ ፡ ለእግዚአ ፡ መናፍስት ።