Chapter 53
Chapter 52 / Enoch / Chapter 53 Chapter 54

1   ወበህየ ፡ ርእያ ፡ አዕይንትየ ፡ ቈላ ፡ ዕሙቀ ፡ ወርኅው ፡ አፉሁ ፡ ወኵሎሙ ፡ እለ ፡ የኀድሩ ፡ ዲበ ፡ የብስ ፡ ወባሕር ፡ ወደሰያት ፡ አምኃ ፡ ወአስትዓ ፡ ወጋዳ ፡ ያመጽኡ ፡ ሎቱ ፡ ወዝክቱሰ ፡ ቈላ ፡ ዕሙቅ ፡ ኢይመልእ ።

2 ወጌጋየ ፡ እደዊሆሙ ፡ ይገብሩ ፡ ወኵሎ ፡ ዘይጻምዉ ፡ ለጌጋይ ፡ ኃጥአን ፡ ይበልዑ ፡ ወእምገጹ ፡ ለእግዚአ ፡ መናፍስት ፡ ይትኀጐሉ ፡ ኃጥኣን ፡ ወእምገጻ ፡ ለምድረ ፡ ዚአሁ ፡ ይትቀወሙ ፡ ወኢየኀልቁ ፡ ለዓለመ ፡ ዓለም ።

3 እስመ ፡ ርኢክዎሙ ፡ ለመላእክተ ፡ መቅሠፍት ፡ እንዘ ፡ የሐውሩ ፡ ወያስተዳልዉ ፡ ኵሎ ፡ መባዕላተ ፡ ለሰይጣን ።

4 ወተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ እሎንተ ፡ መባዕላተ ፡ ለመኑ ፡ ያስተዳልውዎሙ ።

5 ወይቤለኒ ፡ እሎንተ ፡ ያስተዳልውዎሙ ፡ ለነገሥት ፡ ወለኀያላን ፡ ዘዝንቱ ፡ ምድር ፡ ከመ ፡ ቦቱ ፡ ይትሐጐሉ ።

6 ወእምድኅረ ፡ ዝንቱ ፡ ያስተርኢ ፡ ጻድቅ ፡ ወኅሩይ ፡ ቤተ ፡ ምስትጉቡአ ፡ ዚአሁ ፡ እምይእዜ ፡ ኢይትከልኡ ፡ በስሙ ፡ ለእግዚአ ፡ መናፍስት ።

7 ወእሉ ፡ አድባር ፡ ይከውኑ ፡ በቅድመ ፡ ገጹ ፡ ከመ ፡ ምድር ፡ ወአውግር ፡ ይከውኑ ፡ ከመ ፡ ነቅዐ ፡ ማይ ፡ ወያዐርፉ ፡ ጻድቃን ፡ እምጻማ ፡ ኃጥኣን ።