Chapter 51
Chapter 50 / Enoch / Chapter 51 Chapter 52

1 ወበእማንቱ ፡ መዋዕል ፡ ታገብእ ፡ ምድር ፡ ማኅፀንታ ፡ ወሲኦል ፡ ታገብእ ፡ ማኅፀንታ ፡ ዘተመጠወት ፡ ወኀጕል ፡ ያገብእ ፡ ዘይፈዲ ።

2 ወየኀሪ ፡ ጻድቃነ ፡ ወቅዱሳነ ፡ እምኔሆሙ ፡ እስመ ፡ ቀርበት ፡ ዕለት ፡ ከመ ፡ እሙንቱ ፡ ይድኀኑ ።

3 ወኅሩይ ፡ በእማንቱ ፡ መዋዕል ፡ ዲበ ፡ መንበሩ ፡ ይነብር ፡ ወኵሉ ፡ ኅቡኣተ ፡ ጥበብ ፡ እምሕሊና ፡ አፉሁ ፡ ይወፅእ ፡ እስመ ፡ እግዚአ ፡ መናፍስት ፡ ወሀቦ ፡ ወሰብሖ ።

4 ወበእማንቱ ፡ መዋዕል ፡ ይዘፍኑ ፡ አድባር ፡ ከመ ፡ ሐራጊት ፡ ወአውግርኒ ፡ ያንፈርዕፁ ፡ ከመ ፡ መሐስዕ ፡ ጽጉባነ ፡ ሐሊብ ፡ ወይከውኑ ፡ ኵሎሙ ፡ መላእክተ ፡ በሰማይ ።

5 ገጾሙ ፡ ይበርህ ፡ በፍሥሐ ፡ እስመ ፡ በእማንቱ ፡ መዋዕል ፡ ኅሩይ ፡ ተንሥአ ፡ ወምድር ፡ ትትፌሣሕ ፡ ወጻድቃን ፡ ዲቤሃ ፡ የኀድሩ ፡ ወኅሩያን ፡ ውስቴታ ፡ የሐውሩ ፡ ወያንሶስዉ ።