Chapter 45
Chapter 44 / Enoch / Chapter 45 Chapter 46

1 ወዝካልእ ፡ ምሳሌ ፡ ዲበ ፡ እለ ፡ ይክህዱ ፡ ስሞ ፡ ለማኅደረ ፡ ቅዱሳን ፡ ወለእግዚአ ፡ መናፍስት ።

2 ኢሰማየ ፡ የዐርጉ ፡ ወኢምድረ ፡ ይበጽሑ ፡ ከመዝ ፡ ይከውን ፡ ክፍለ ፡ ኃጥኣን ፡ እለ ፡ ይክሕዱ ፡ ስሞ ፡ ለእግዚአ ፡ መናፍስት ፡ እለ ፡ ከመዝ ፡ ይትዐቀቡ ፡ ለዕለተ ፡ ሥራኅ ፡ ወምንዳቤ ።

3 በይእቲ ፡ ዕለት ፡ ይነብር ፡ በመንበረ ፡ ስብሐት ፡ ኅሩይ ፡ ወየኀሪ ፡ ምግባሪሆሙ ፡ ወምዕራፎሙ ፡ ኍልቍ ፡ አልቦሙ ፡ ወመንፈሶሙ ፡ በማእከሎሙ ፡ ትጸንዕ ፡ ሶበ ፡ ርእይዎ ፡ ለኅሩየ ፡ ዚአየ ፡ ወለእለ ፡ ሰከዩ ፡ ስምየ ፡ ቅዱሰ ፡ ወስቡሐ ።

4 ወበይእቲ ፡ ዕለት ፡ አነብሮ ፡ በማእከሎሙ ፡ ለኅሩየ ፡ ዚአየ ፡ ወእዌልጣ ፡ ለሰማይ ፡ ወእገብራ ፡ ለበረከት ፡ ወብርሃን ፡ ዘለዓለም ።

5 ወእዌልጣ ፡ ለየብስ ፡ ወእገብራ ፡ ለበረከት ፡ ወለኅሩያነ ፡ ዚአየ ፡ አነብሮሙ ፡ ውስቴታ ፡ ወእለ ፡ ይገብሩ ፡ ኀጢአተ ፡ ወጌጋየ ፡ ኢይከይዱ ፡ ውስቴታ ።

6 እስመ ፡ አነ ፡ ርኢክዎሙ ፡ ወአጽገብክዎሙ ፡ በሰላም ፡ ለጻድቃንየ ፡ ወአንበርክዎሙ ፡ ቅድሜየ ፡ ወቀርበት ፡ ኀቤየ ፡ ኵነኔ ፡ ለኃጥኣን ፡ ከመ ፡ ኣህጕሎሙ ፡ እምገጸ ፡ ምድር ።