Chapter 41
Chapter 40 / Enoch / Chapter 41 Chapter 42

1 ወእምድኅረዝ ፡ ርኢኩ ፡ ኵሎ ፡ ኅብኣቲሆሙ ፡ ለሰማያት ፡ ወመንግሥት ፡ እፎ ፡ ትትከፈል ፡ ወተግባረ ፡ ሰብእ ፡ ከመ ፡ በመዳልው ፡ ይደለዉ ።

2 በህየ ፡ ርኢኩ ፡ ማኅደሪሆሙ ፡ ለኅሩያን ፡ ወማኅደሪሆሙ ፡ ለቅዱሳን ፡ ወርእያ ፡ አዕይንትየ ፡ በህየ ፡ ኵሎሙ ፡ ኃጥኣን ፡ እንዘ ፡ ይሰደዱ ፡ እምህየ ፡ እለ ፡ ይክህድዎ ፡ ለስመ ፡ እግዚአ ፡ መናፍስት ፡ ወይስሕብዎሙ ፡ ወቀዊም ፡ አልቦሙ ፡ በመቅሠፍት ፡ እንተ ፡ ትወጽእ ፡ እምእግዚአ ፡ መናፍስት ።

3 ወበህየ ፡ ርእያ ፡ አዕይንትየ ፡ ኅቡአተ ፡ መባርቅት ፡ ወነጐድጓድ ፡ ወኅቡአተ ፡ ነፋሳት ፡ እፎ ፡ ይትከፈሉ ፡ ከመ ፡ ይንፍሑ ፡ ዲበ ፡ ምድር ፡ ወኅቡአተ ፡ ደመናት ፡ ወጠል ፡ ወበህየ ፡ ርኢኩ ፡ እምኀበ ፡ ይወጽእ ፡ በውእቱ ፡ መካን ፡ ወእምህየ ፡ ይጸግቡ ፡ ፀበለ ፡ ምድር ።

4 ወበህየ ፡ ርኢኩ ፡ መዛግብተ ፡ ዕፅዋነ ፡ ወእምኔሆሙ ፡ ይትከፈሉ ፡ ነፋሳት ፡ ወመዝገበ ፡ በረድ ፡ ወመዝገበ ፡ ጊሜ ፡ ወዘደመናት ፡ ወደመና ፡ ዚአሁ ፡ እምላዕለ ፡ ምድር ፡ የኅድር ፡ እምቅድመ ፡ ዓለም ።

5 ወርኢኩ ፡ መዛግብተ ፡ ፀሐይ ፡ ወዘወርኅ ፡ እምአይቴ ፡ ይወጽኡ ፡ ወአይቴ ፡ ይገብኡ ፡ ወግብአቶሙ ፡ ስብሕ ፤ ወእፎ ፡ ይከብር ፡ ፩ እምካልኡ ፡ ወምሕዋሮሙ ፡ ብዑል ፡ ወኢየኀልፉ ፡ ምሕዋረ ፡ ወኢይዌስኩ ፡ ወኢየሐፅፁ ፡ እምሕዋረ ፡ ዚአሆሙ ፡ ወሃይማኖቶሙ ፡ የዐቅቡ ፡ ፩ ምስለ ፡ ካልኡ ፡ በመሐላ ፡ ዘነበሩ ።

6 ወይወፅእ ፡ ቅድመ ፡ ፀሐይ ፡ ወይገብር ፡ ፍኖቶ ፡ በትእዛዘ ፡ እግዚአ ፡ መናፍስት ፡ ወይጸንዕ ፡ ስሙ ፡ ለዓለመ ፡ ዓለም ።

7 ወእምድኅረዝ ፡ ፍኖት ፡ ዘኅቡእ ፡ ወዘክሡት ፡ ዘወርኅ ፡ ወምሕዋረ ፡ ፍኖቱ ፡ ይፌጽም ፡ በውእቱ ፡ መካን ፡ በመዓልት ፡ ወበሌሊት ፡ ፩ ለካልኡ ፡ ይኔጽር ፡ በቅድመ ፡ እግዚአ ፡ መናፍስት ፡ ወየአኵቱ ፡ ወይሴብሑ ፡ ወኢያዐርፉ ፡ እስመ ፡ አኰቴቶሙ ፡ ዕረፍት ፡ ውእቱ ፡ ሎሙ ።

8 እስመ ፡ ለፀሐይ ፡ ብሩህ ፡ ብዙኅ ፡ ምያጤ ፡ ቦቱ ፡ ለበረከት ፡ ወለመርገም ፡ ወምርዋጸ ፡ ፍኖቱ ፡ ለወርኅ ፡ ለጻድቃን ፡ ብርሃን ፡ ወለኃጥኣን ፡ ጽልመት ፡ በስሙ ፡ ለእግዚእ ፡ ዘፈጠረ ፡ ማእከለ ፡ ብርሃን ፡ ወማእከለ ፡ ጽልመት ፡ ወከፈለ ፡ መንፈሶሙ ፡ ለሰብእ ፡ ወአጽንዐ ፡ መንፈሶሙ ፡ ለጻድቃን ፡ በስመ ፡ ጽድቀ ፡ ዚአሁ ።

9 እስመ ፡ መልአክ ፡ ኢይከልእ ፡ ወሥልጣን ፡ ኢይክል ፡ ከሊአ ፡ እስመ ፡ መኰንን ፡ ለኵሎሙ ፡ ይሬኢ ፡ ወእሎንተ ፡ ኵሎሙ ፡ በቅድሜሁ ፡ ውእቱ ፡ ይኴንን ።