Chapter 40
Chapter 39 / Enoch / Chapter 40 Chapter 41

1 ወርኢኩ ፡ እምድኅረዝ ፡ አእላፈ ፡ አእላፋት ፡ ወትእልፊተ ፡ ትእልፊት ፡ ወአልቦሙ ፡ ኍልቍ ፡ ወሐሳብ ፡ እለ ፡ ይቀውሙ ፡ ቅድመ ፡ ስብሐተ ፡ እግዚአ ፡ መናፍስት ።

2 ርኢኩ ፡ ወበ ፬ ክነፊሁ ፡ ለእግዚአ ፡ መናፍስት ፡ ርኢኢኩ ፡ ፬ ገጸ ፡ ካልአ ፡ እምእለ ፡ ይቀውሙ ፡ ወአስማቲሆሙ ፡ አእመርኩ ፡ ዘአይድዐኒ ፡ አስማቲሆሙ ፡ መልአክ ፡ ዘመጽአ ፡ ምስሌየ ፡ ወኵሎ ፡ ኅቡኣተ ፡ አርአየኒ ።

3 ወሰማዕኩ ፡ ቃሎሙ ፡ ለእልኩ ፡ ፬ ገጽ ፡ እንዘ ፡ ይሴብሑ ፡ ቅድመ ፡ እግዚአ ፡ ስብሐት ።

4 ቃል ፡ ቀዳማዊ ፡ ይባርኮ ፡ ለእግዚአ ፡ መናፍስት ፡ ለዓለመ ፡ ዓለም ።

5 ወቃለ ፡ ካልአ ፡ ሰማዕኩ ፡ እንዘ ፡ ይባርኮ ፡ ለኅሩይ ፡ ወለኅሩያን ፡ እለ ፡ ስቁላን ፡ በእግዚአ ፡ መናፍስት ።

6 ወሣልሰ ፡ ቃለ ፡ ሰማዕኩ ፡ እንዘ ፡ ይስእሉ ፡ ወይጼልዩ ፡ በእንተ ፡ እለ ፡ የኀድሩ ፡ ውስተ ፡ የብስ ፡ ወያስተበቍዑ ፡ በስሙ ፡ ለእግዚአ ፡ መናፍስት ።

7 ወቃለ ፡ ራብዐ ፡ ሰማዕኩ ፡ እንዘ ፡ ይሰድዶሙ ፡ ለሰይጣናት ፡ ወኢየኀድጎሙ ፡ ይባኡ ፡ ኀበ ፡ እግዚአ ፡ መናፍስት ፡ ከመ ፡ ያስተዋድይዎሙ ፡ ለእለ ፡ የኀድሩ ፡ ዲበ ፡ የብስ ።

8 ወእምድኅረዝ ፡ ተስእልክዎ ፡ ለመልአከ ፡ ሰላም ፡ ዘየሐውር ፡ ምስሌየ ፡ ዘውእቱ ፡ አርአየኒ ፡ ኵሎ ፡ ዘኅቡእ ፡ ወእቤሎ ፡ መኑ ፡ ውእቶሙ ፡ እሉ ፡ ፬ ገጽ ፡ ዘርኢኩ ፡ ወእለ ፡ ሰማዕኩ ፡ ቃሎሙ ፡ ወጸሐፍክዎሙ ።

9 ወይቤለኒ ፡ ዝቀዳማዊ ፡ ውእቱ ፡ መሐሪ ፡ ወርኁቀ ፡ መዓት ፡ ቅዱስ ፡ ሚካኤል ፤ ወካልእ ፡ ዘዲበ ፡ ኵሉ ፡ ሕማም ፡ ወዲበ ፡ ኵሉ ፡ ቍስል ፡ ዘውሉደ ፡ ሰብእ ፡ ውእቱ ፡ ሩፋኤል ፤ ወሣልስ ፡ ዘዲበ ፡ ኵሉ ፡ ኃይል ፡ ውእቱ ፡ ቅዱስ ፡ ገብርኤል ፤ ወራብዕ ፡ ዘዲበ ፡ ንስሓ ፡ ወለተስፋ ፡ እለ ፡ ይወርሱ ፡ ሕይወተ ፡ ዘለዓለም ፡ ውእቱ ፡ ፋኑኤል ።

10 ወእሉ ፡ ፬ መላእክቲሁ ፡ ለእግዚአብሔር ፡ ልዑል ፡ ወ ፬ ቃለ ፡ ሰማዕኩ ፡ በውእቶን ፡ መዋዕል ።