Chapter 39
Chapter 38 / Enoch / Chapter 39 Chapter 40

1 ወይከውን ፡ በዝንቱ ፡ መዋዕል ፡ ይወርዱ ፡ ደቂቅ ፡ ኅሩያን ፡ ወቅዱሳን ፡ እምልዑላን ፡ ሰማያት ፡ ወ ፩ ይከውን ፡ ዘርኦሙ ፡ ምስለ ፡ ውሉደ ፡ ሰብእ ።

2 በውእቱ ፡ መዋዕል ፡ ነሥአ ፡ ሄኖክ ፡ መጻሕፍተ ፡ ቅንዐት ፡ ወመዐት ፡ ወመጻሕፍተ ፡ ጕጕዓ ፡ ወሀውክ ፡ ወምሕረት ፡ ኢይከውን ፡ ላዕሌሆሙ ፡ ይቤ ፡ እግዚአ ፡ መናፍስት ።

3 ወበውእቱ ፡ ጊዜ ፡ መሠጠኒ ፡ ደመና ፡ ወዐውሎ ፡ ነፋስ ፡ እምገጻ ፡ ለምድር ፡ ወአንበረኒ ፡ ውስተ ፡ ጽንፈ ፡ ሰማያት ።

4 ወበህየ ፡ ርኢኩ ፡ ራእየ ፡ ካልአ ፡ ማኅደሪሆሙ ፡ ለጻድቃን ፡ ወምስካባቲሆሙ ፡ ለቅዱሳን ።

5 በህየ ፡ ርእያ ፡ አዕይንትየ ፡ ማኅደሪሆሙ ፡ ምስለ ፡ መላእክት ፡ ወምስካባቲሆሙ ፡ ምስለ ፡ ቅዱሳን ፡ ወይስእሉ ፡ ወያስተበቍዑ ፡ ወይጼልዩ ፡ በእንተ ፡ ውሉደ ፡ ሰብእ ፡ ወጽድቅ ፡ ከመ ፡ ማይ ፡ ይውሕዝ ፡ በቅድሜሆሙ ፡ ወምሕረት ፡ ከመ ፡ ጠል ፡ ውስተ ፡ ምድር ፤ ከመዝ ፡ ውእቱ ፡ ማእከሎሙ ፡ ለዓለመ ፡ ዓለም ።

6 ወበውእቱ ፡ መዋዕል ፡ ርእያ ፡ አዕይንትየ ፡ መካነ ፡ ኅሩያን ፡ ዘጽድቅ ፡ ወዘሃይማኖት ፡ ወጽድቅ ፡ ይከውን ፡ በመዋዕሊሆሙ ፡ ወጻድቃን ፡ ወኅሩያን ፡ ኍልቍ ፡ አልቦሙ ፡ ቅድሜሁ ፡ ለዓለመ ፡ ዓለም ።

7 ወርኢኩ ፡ ማኅደሪሆሙ ፡ መትሕተ ፡ አክናፈ ፡ እግዚአ ፡ መናፍስት ፡ ወኵሎሙ ፡ ጻድቃን ፡ ወኅሩያን ፡ በቅድሜሁ ፡ ይትለሐዩ ፡ ከመ ፡ ብርሃነ ፡ እሳት ፡ ወአፉሆሙ ፡ ይመልእ ፡ በረከተ ፡ ወከናፍሪሆሙ ፡ ይሴብሑ ፡ ስሞ ፡ ለእግዚአ ፡ መናፍስት ፡ ወጽድቅ ፡ ቅድሜሁ ፡ ኢየኀልቅ ።

8 ህየ ፡ ፈቀድኩ ፡ እኅድር ፡ ወፈተወቶ ፡ ነፍስየ ፡ ለውእቱ ፡ ማኅደር ፡ በህየ ፡ ኮነ ፡ ክፍልየ ፡ ቅድመ ፡ እስመ ፡ ከመዝ ፡ ጸንዐ ፡ በእንቲአየ ፡ በቅድመ ፡ እግዚአ ፡ መናፍስት ።

9 ወበውእቶን ፡ መዋዕል ፡ ሰባሕኩ ፡ ወአልዓልኩ ፡ ስሞ ፡ ለእግዚአ ፡ መናፍስት ፡ በረከተ ፡ ወስብሐተ ፡ እስመ ፡ ውእቱ ፡ አጽንዐኒ ፡ በበረከት ፡ ወስብሐት ፡ በከመ ፡ ፈቃዱ ፡ ለእግዚአ ፡ መናፍስት ።

10 ወጕንዱየ ፡ ርእያ ፡ አዕይንትየ ፡ በውእቱ ፡ መካን ፡ ወባረክዎ ፡ እንዘ ፡ እብል ፡ ቡሩክ ፡ ውእቱ ፡ ወይትባረክ ፡ እምቅድም ፡ ወእስከ ፡ ለዓለም ።

11 ወበቅድሜሁ ፡ አልቦ ፡ ማኅለቅት ፡ ውእቱ ፡ ያአምር ፡ ዘእንበለ ፡ ይትፈጠር ፡ ዓለም ፡ ምንት ፡ ውእቱ ፡ ዓለም ፡ ወለትውልደ ፡ ትውልድ ፡ ዘይከውን ።

12 ይባርኩከ ፡ እለ ፡ ኢይነውሙ ፡ ወይቀውሙ ፡ በቅድመ ፡ ስብሐቲከ ፡ ወይባርኩከ ፡ ወይሴብሑ ፡ ወያሌዕሉ ፡ እንዘ ፡ ይብሉ ፡ ቅዱስ ፡ ቅዱስ ፡ ቅዱስ ፡ እግዚአ ፡ መናፍስት ፡ ይመልእ ፡ ምድረ ፡ መንፈሳት ።

13 ወበህየ ፡ ርእያ ፡ አዕይንትየ ፡ ኵሎ ፡ እለ ፡ ኢይነውሙ ፡ ይቀውሙ ፡ ቅድሜሁ ፡ ወይባርኩ ፡ ወይብሉ ፡ ቡሩክ ፡ አንተ ፡ ወቡሩክ ፡ ስሙ ፡ ለእግዚእ ፡ ለዓለመ ፡ ዓለም ።

14 ወተወለጠ ፡ ገጽየ ፡ እስከ ፡ ስእንኩ ፡ ነጽሮ ።