Chapter 38
Chapter 37 / Enoch / Chapter 38 Chapter 39

1  ምሳሌ ፡ ቀዳሚ ፡ ሶበ ፡ ያስተርኢ ፡ ማኅበረ ፡ ጻድቃን ፡ ወይትኴነኑ ፡ ኃጥኣን ፡ በኀጢአቶሙ ፡ ወእምገጸ ፡ የብስ ፡ ይትሀወኩ ።

2 ወሶበ ፡ ያስተርኢ ፡ ጻድቅ ፡ በገጾሙ ፡ ለጻድቃን ፡ እለ ፡ ኅሩያን ፡ ተግባሮሙ ፡ ስቁል ፡ በእግዚአ ፡ መናፍስት ፡ ወያስተርኢ ፡ ብርሃን ፡ ለጻድቃን ፡ ወለኅሩያን ፡ እለ ፡ የኀድሩ ፡ ዲበ ፡ የብስ ፡ አይቴ ፡ ማኅደረ ፡ ኃጥኣን ፡ ወአይቴ ፡ ምዕራፎሙ ፡ ለእለ ፡ ክህድዎ ፡ ለእግዚአ ፡ መናፍስት ፡ እምኀየሶሙ ፡ ሶበ ፡ ኢተወልዱ ።

3 ወሶበ ፡ ይትከሠታ ፡ ኅቡኣቲሆሙ ፡ ለጻድቃን ፡ ይትኴነኑ ፡ ኃጥኣን ፡ ወይትሀወኩ ፡ ረሲዓን ፡ እምገጸ ፡ ጻድቃን ፡ ወኅሩያን ።

4 ወእምይእዜ ፡ ኢይከውኑ ፡ አዚዛነ ፡ ወኢልዑላነ ፡ እለ ፡ ይእኅዝዋ ፡ ለምድር ፡ ወኢይክሉ ፡ ርእየ ፡ ገጸ ፡ ቅዱሳን ፡ እስመ ፡ ለእግዚአ ፡ መናፍስት ፡ ተርእየ ፡ ብርሃኑ ፡ ለገጸ ፡ ቅዱሳን ፡ ወጻድቃን ፡ ወኅሩያን ።

5 ወነገሥት ፡ አዚዛን ፡ በውእቱ ፡ ጊዜ ፡ ይትኃጐሉ ፡ ወይትወሀቡ ፡ ውስተ ፡ እደ ፡ ጻድቃን ፡ ወቅዱሳን ።

6 ወእምህየ ፡ አልቦ ፡ ዘያስተምህር ፡ ኀበ ፡ እግዚአ ፡ መናፍስት ፡ እስመ ፡ ተወድአ ፡ እንቲአሆሙ ፡ ሕይወት ።