Chapter 32
Chapter 31 / Enoch / Chapter 32 Chapter 33

1 ወእምድኅረ ፡ እሉ ፡ አፈው ፡ ለመስዕ ፡ እንዘ ፡ እኔጽር ፡ መልዕልተ ፡ አድባር ፡ ርኢኩ ፡ ፯ አድባረ ፡ ምሉዓነ ፡ ሰንበልት ፡ ቅድወ ፡ ወዕፀወ ፡ መዐዛ ፡ ወቀናንሞን ፡ ወፐፐሬ ።

2 ወእምህየ ፡ ሖርኩ ፡ መልዕልተ ፡ ርእሶሙ ፡ ለእልኩ ፡ አድባር ፡ እንዘ ፡ ርኁቅ ፡ ውእቱ ፡ ለጽባሕ ፡ ወኀለፍኩ ፡ እንተ ፡ ዲበ ፡ ባሕረ ፡ ኤርትራ ፡ ወእምኔሁ ፡ ርኁቀ ፡ ኮንኩ ፡ ወኀለፍኩ ፡ መልዕልቶ ፡ ለመልአክ ፡ ዙጥኤል ።

3 ወመጻእኩ ፡ ውስተ ፡ ገነተ ፡ ጽድቅ ፡ ወርኢኩ ፡ ካሐካሐቲሆሙ ፡ ለእልክቱ ፡ ዕፀው ፡ ዕፀወ ፡ ብዙኃነ ፡ ወዐቢያነ ፡ ይበቍሉ ፡ በህየ ፡ ወእንዘ ፡ ፄናሆሙ ፡ ሠናይ ፡ ዐቢያን ፡ ወስኖሙ ፡ ብዙኅ ፡ ወስቡሓን ፡ ወዕፀ ፡ ጥበብ ፡ ዘእምኔሁ ፡ በሊዖሙ ፡ የአምርዋ ፡ ለጥበብ ፡ ዐባይ ።

4 ወይመስል ፡ ሐመረ ፡ ጽራእ ፡ ወፍሬሁ ፡ ከመ ፡ አስካለ ፡ ወይን ፡ ጥቀ ፡ ሠናይ ፡ ወፄናሁ ፡ ለውእቱ ፡ ዕፅ ፡ የሐውር ፡ ወይበጽሕ ፡ ነዊኃ ።

5 ወእቤ ፡ ሠናይ ፡ ዝዕፅ ፡ ወከመ ፡ ሠናይ ፡ ወፍሡሕ ፡ ርእየቱ ።

6 ወአውሥአኒ ፡ መልአክ ፡ ቅዱስ ፡ ሩፋኤል ፡ ዘምስሌየ ፡ ሀሎ ፡ ወይቤለኒ ፡ ዝውእቱ ፡ ዕፀ ፡ ጥበብ ፡ ዘእምኔሁ ፡ በልዑ ፡ አቡከ ፡ አረጋዊ ፡ ወእምከ ፡ እቤራዊት ፡ እለ ፡ ቀደሙከ ፡ ወአእመርዋ ፡ ለጥበብ ፡ ወተፈትሐ ፡ አዕይንቲሆሙ ፡ ወአእመሩ ፡ ከመ ፡ ዕራቃኒሆሙ ፡ ሀለዉ ፡ ወተሰዱ ፡ እምገነት ።