Chapter 24
Chapter 23 / Enoch / Chapter 24 Chapter 25

1 ወእምህየ ፡ ሖርኩ ፡ ካልአ ፡ መካነ ፡ ምድር ፡ ወአርአየኒ ፡ ደብረ ፡ እሳት ፡ ዘያንበለብል ፡ መዓልተ ፡ ወሌሊተ ።

2 ወሖርኩ ፡ መንገሌሁ ፡ ወርኢኩ ፡ ፯ አድባረ ፡ ክቡራነ ፡ ወኵሉ ፡ ፩ እምነ ፡ ፩ እንዘ ፡ ይትዌለጥ ፡ ወአዕባነ ፡ ክቡራነ ፡ ወሠናያነ ፡ ወኵሉ ፡ ክቡር ፤ ወስቡሕ ፡ ራእዮሙ ፡ ወሠናይ ፡ ገጾሙ ፡ ፫ መንገለ ፡ ጽባሕ ፡ ወጽኑዓን ፡ ፩ ዲበ ፡ ፩ ወ ፫ መንገለ ፡ ሰሜን ፡ ወጽኑዓን ፡ ፩ ዲበ ፡ ፩ ወቈላተ ፡ ዕሙቃተ ፡ ወጠዋያተ ፡ አሐቲ ፡ ለአሐቲ ፡ እይትቃረባ ።

3 ወሳብዕ ፡ ደብር ፡ ማእከሎሙ ፡ ለእሎንቱ ፡ ወኑኆሙሰ ፡ ይትማሰሉ ፡ ኵሎሙ ፡ ከመ ፡ መንበረ ፡ አትሮንስ ፡ ወየዐውድዎ ፡ ዕፀወ ፡ መዐዛ ።

4 ወሀሎ ፡ ውስቴቶሙ ፡ ዕፅ ፡ አልቦ ፡ ግሙራ ፡ አመ ፡ ፄነወኒ ፡ ወኢ ፩ እምውስቴቶሙ ፡ ወባዕዳንሂ ፡ ዘከማሁ ፡ ኢኮነ ፡ ዘይምዕዝ ፡ እምኵሉ ፡ መዐዛ ፡ ወቈጽሉ ፡ ወጽጌሁ ፡ ወዕፁ ፡ ኢይጸመሂ ፡ ለዓለም ፡ ወፍሬሁኒ ፡ ሠናይ ፤ ወፍሬሁሰ ፡ ከመ ፡ አስካለ ፡ በቀልት ።

5 ወውእተ ፡ ጊዜ ፡ እቤ ፡ ነዋ ፡ ዝንቱ ፡ ሠናይ ፡ ዕፅ ፡ ወሠናይ ፡ ለርእይ ፡ ወአዳም ፡ ቈጽሉ ፡ ወፍሬሁኒ ፡ ሞገስ ፡ ጥቀ ፡ ለርእየ ፡ ገጽ ።

6 ወውእተ ፡ ጊዜ ፡ አውሥአኒ ፡ ሚካኤል ፡ ፩ እምነ ፡ መላእክት ፡ ቅዱሳን ፡ ወክቡራን ፡ ዘምስሌየ ፡ ሀሎ ፡ ውእቱ ፡ ዘዲቤሆሙ ።