Chapter 21
Chapter 20 / Enoch / Chapter 21 Chapter 22

1 ወኦድኩ ፡ እስከ ፡ መካን ፡ ኀበ ፡ አልቦ ፡ ዘይትገበር ።

2 ወርኢኩ ፡ በህየ ፡ ግብረ ፡ ግሩመ ፡ ኢሰማየ ፡ ልዑለ ፡ ወኢምድረ ፡ ሱርርተ ፡ አላ ፡ መካነ ፡ በድው ፡ ዘድልው ፡ ወግሩም ።

3 ወህየ ፡ ርኢኩ ፡ ፯ ከዋክብተ ፡ ሰማይ ፡ እሱራን ፡ በላዕሌሁ ፡ ኅብረ ፡ ከመ ፡ አድባር ፡ ዐበይት ፡ ወከመ ፡ ዘእሳት ፡ እንዘ ፡ ይነድዱ ።

4 ውእተ ፡ ጊዜ ፡ እቤ ፡ በእንተ ፡ አይ ፡ ኅጢአት ፡ ተአሥሩ ፡ ወበእንተ ፡ ምንት ፡ ዝየ ፡ ተገድፉ ።

5 ወይቤለኒ ፡ ኡርኤል ፡ ፩ እምነ ፡ መላእክት ፡ ቅዱሳን ፡ ዘምስሌየ ፡ ውእቱ ፡ ይመርሀኒ ፡ ወይቤ ፡ ሄኖክ ፡ በእንተ ፡ መኑ ፡ ትሴአል ፡ ወበእንተ ፡ መኑ ፡ ትጤይቅ ፡ ወትስእል ፡ ወትጽህቅ ።

6 እሉ ፡ ውእቶሙ ፡ እምነ ፡ ከዋክብት ፡ እለ ፡ ኀለፉ ፡ ትእዛዘ ፡ እግዚአብሔር ፡ ልዑል ፡ ወተአሥሩ ፡ በዝየ ፡ እስከ ፡ ይትፌጸም ፡ ትእልፊተ ፡ ዓለም ፡ ኍልቈ ፡ መዋዕለ ፡ ኃጢአቶሙ ።

7 ወእምህየ ፡ ሖርኩ ፡ ካልአ ፡ መካነ ፡ እምዝ ፡ ዘይጌርም ፡ ወርኢኩ ፡ ግብረ ፡ ግሩመ ፡ እሳት ፡ ዐቢይ ፡ በህየ ፡ ዘይነድድ ፡ ወያንበለብል ፡ ወመምተርት ፡ ቦቱ ፡ ወሰኑ ፡ እስከ ፡ ቀላይ ፡ ፍጹም ፡ አዕማደ ፡ እሳት ፡ ዐበይት ፡ ዘያወርድዎሙ ፡ ወኢአምጣኖ ፡ ወኢዕበዮ ፡ እክህልኩ ፡ ነጽሮ ፡ ወስእንኩ ፡ ነጽሮ ፡ ዐይኑ ።

8 ውእተ ፡ ጊዜ ፡ እቤ ፡ እፎ ፡ ግሩም ፡ ዝንቱ ፡ መካን ፡ ወሕማም ፡ ለነጽሮ ።

9 ውእተ ፡ ጊዜ ፡ አውሥአኒ ፡ ኡርኤል ፡ ፩ እመላእክት ፡ ቅዱሳን ፡ ዘምስሌየ ፡ ሀለወ ፡ አውሥአኒ ፡ ወይቤለኒ ፡ ሄኖክ ፡ ምንት ፡ ውእቱ ፡ ፍርሃትከ ፡ ከመዝ ፡ ወድንጋፄከ ፡ በእንተዝ ፡ ግሩም ፡ መካን ፡ ወቅድመ ፡ ገጹ ፡ ለዝ ፡ ሕማም ።

10 ወይቤለኒ ፡ ዝመካን ፡ ቤተ ፡ ሞቅሖሙ ፡ ለመላእክት ፡ ወበህየ ፡ ይትአኅዙ ፡ እስከ ፡ ለዓለም ።