Chapter 18
Chapter 17 / Enoch / Chapter 18 Chapter 19

1 ወርኢኩ ፡ መዛግብተ ፡ ኵሉ ፡ ነፋሳት ፡ ወርኢኩ ፡ ከመ ፡ ቦሙ ፡ አሰርገወ ፡ ኵሎ ፡ ፍጥረተ ፡ ወመሰረታቲሃ ፡ ለምድር ።

2 ወርኢኩ ፡ እብነ ፡ ማእዘንተ ፡ ምድር ፡ ወርኢኩ ፡ ፬ ነፋሳተ ፡ እለ ፡ ይፀውርዋ ፡ ለምድር ፡ ወለጽንዐ ፡ ሰማይ ።

3 ወርኢኩ ፡ ከመ ፡ ነፋሳት ፡ ይረብብዋ ፡ ለልዕልና ፡ ሰማይ ፤ ወእሙንቱ ፡ ይቀውሙ ፡ ማእከለ ፡ ሰማይ ፡ ወምድር ፡ እሙንቱ ፡ ውእቶሙ ፡ አዕማደ ፡ ሰማይ ።

4 ወርኢኩ ፡ ነፋሳተ ፡ እለ ፡ ይመይጥዋ ፡ ለሰማይ ፡ እለ ፡ ያዐርቡ ፡ ለክበበ ፡ ፀሐይ ፡ ወኵሎ ፡ ከዋክብተ ።

5 ወርኢኩ ፡ ዘዲበ ፡ ምድር ፡ ነፋሳተ ፡ ዘይፀውሩ ፡ ደመናተ ፤ ወርኢኩ ፡ ፍናወ ፡ መላእክት ፤ ርኢኩ ፡ ውስተ ፡ ጽንፈ ፡ ምድር ፡ ጽንዐ ፡ ዘሰማይ ፡ መልዕልተ ።

6 ወኅለፍኩ ፡ መንገለ ፡ አዜብ ፡ ወይነድድ ፡ መዓልተ ፡ ወሌሊተ ፡ ኀበ ፡ ፯ አድባር ፡ ዘእምእብን ፡ ክቡር ፡ ፫ መንገለ ፡ ጽባሕ ፡ ወ ፫ መንገለ ፡ አዜብ ።

7 ወመንገለ ፡ ጽባሕሰ ፡ ዘእምእብነ ፡ ኅብር ፡ ወ ፩ ሰ ፡ ዘእምእብነ ፡ ባሕርይ ፡ ወ ፩ ኒ ፡ ዘእምእብነ ፡ ፈውስ ፡ ወዘመንገለ ፡ አዜብ ፡ እምነ ፡ እብን ፡ ቀይሕ ።

8 ወማእከላይሰ ፡ ይጐድእ ፡ እስከ ፡ ሰማይ ፡ ከመ ፡ መንበሩ ፡ ለእግዚአብሔር ፡ ዘእምእብነ ፡ ፔካ ፡ ወድማሁ ፡ ለመንበር ፡ ዘእምእብነ ፡ ሰንፔር ።

9 ወእሳተ ፡ ዘይነድድ ፡ ርኢኩ ፡ ወዘሀሎ ፡ ውስተ ፡ ኵሉ ፡ አድባር ።

10 ወርኢኩ ፡ ህየ ፡ መካነ ፡ ማዕዶቱ ፡ ለዐቢይ ፡ ምድር ፡ ህየ ፡ ይትጋብኡ ፡ ማያት ።

11 ወርኢኩ ፡ ንቅዐተ ፡ ምድር ፡ ዕሙቀ ፡ በአእማዲሁ ፡ ለእሳተ ፡ ሰማይ ፡ ወርኢኩ ፡ በውስቴቶሙ ፡ አዕማደ ፡ ሰማይ ፡ ዘእሳት ፡ ዘይወርዱ ፡ ወአልቦሙ ፡ ኍልቍ ፡ ወኢመንገለ ፡ መልዕልት ፡ ወኢመንገለ ፡ ዕመቅ ።

12 ወዲበ ፡ ውእቱ ፡ ንቅዐት ፡ ርኢኩ ፡ መካነ ፡ ወኢጽንዐ ፡ ሰማይ ፡ ላዕሌሁ ፡ ወኢመሠረተ ፡ ምድር ፡ በታሕቱ ፡ ወኢማይ ፡ አልቦ ፡ ላዕሌሁ ፡ ወኢአዕዋፍ ፡ አላ ፡ መካነ ፡ በድው ፡ ውእቱ ።

13 ወግሩመ ፡ ርኢኩ ፡ በህየ ፡ ፯ ከዋክብተ ፡ ከመ ፡ ዐበይት ፡ አድባር ፡ ዘይነድዱ ፡ ወከመ ፡ መንፈስ ፡ ዘይሴአለኒ ።

14 ይቤ ፡ መልአክ ፡ ዝውእቱ ፡ መካነ ፡ ተፍጻሜቱ ፡ ለሰማይ ፡ ወለምድር ፤ ቤተ ፡ ሞቅሕ ፡ ኮኖሙ ፡ ዝንቱ ፡ ለከዋክብተ ፡ ሰማይ ፡ ወለኀይለ ፡ ሰማይ ።

15 ወከዋክብት ፡ እለ ፡ ያንኰረኵሩ ፡ ዲበ ፡ እሳት ፡ ወእሉ ፡ ውእቶሙ ፡ እለ ፡ ኀለፉ ፡ ትእዛዘ ፡ እግዚአብሔር ፡ እምቅድመ ፡ ጽባሖሙ ፡ እስመ ፡ ኢመጽኡ ፡ በጊዜሆሙ ።

16 ወተምዕዖሙ ፡ ወአሠሮሙ ፡ እስከ ፡ ጊዜ ፡ ተፍጻሜተ ፡ ኀጢአቶሙ ፡ በዓመተ ፡ ምሥጢር ።