Chapter 17
Chapter 16 / Enoch / Chapter 17 Chapter 18

1 ወነሥኡኒ ፡ ውስተ ፡ ፩ መካን ፡ ኀበ ፡ ሀለዉ ፡ ህየ ፡ ከመ ፡ እሳት ፡ ዘይነድድ ፡ ወሶበ ፡ ይፈቅዱ ፡ ያስተርእዩ ፡ ከመ ፡ ሰብእ ።

2 ወወሰደኒ ፡ ውስተ ፡ መካን ፡ ዘዐውሎ ፡ ወውስተ ፡ ደብር ፡ ዘከተማ ፡ ርእሱ ፡ ይበጽሕ ፡ ውስተ ፡ ሰማይ ።

3 ወርኢኩ ፡ መካናተ ፡ ብሩሃነ ፡ ወነጐድጓድ ፡ ውስተ ፡ አጽናፍ ፤ ኀበ ፡ ዕመቁ ፡ ቀስተ ፡ እሳት ፤ ወሐፅ ፤ ወምጕንጳቲሆሙ ፤ ወሰይፈ ፡ እሳት ፤ ወመባርቅት ፡ ኵሉ ።

4 ወነሥኡኒ ፡ እስከ ፡ ማየ ፡ ሕይወት ፡ ዘይትነገር ፡ ወእስከ ፡ እሳተ ፡ ዓረብ ፡ ዘውእቱ ፡ ይእኅዝ ፡ ኵሎ ፡ ዕርበተ ፡ ፀሐይ ።

5 ወመጻእኩ ፡ እስከ ፡ ፈለገ ፡ እሳት ፡ ዘይውኅዝ ፡ እሳቱ ፡ ከመ ፡ ማይ ፡ ወይትከዐው ፡ ውስተ ፡ ባሕር ፡ ዐቢይ ፡ ዘመንገለ ፡ ዓረብ ።

6 ወርኢኩ ፡ ኵሎ ፡ ዐበይተ ፡ አፍላገ ፡ ወእስከ ፡ ዐቢይ ፡ ጽልመት ፡ በጻሕኩ ፡ ወሖርኩ ፡ ኀበ ፡ ኵሉ ፡ ዘሥጋ ፡ ያንሶሱ ።

7 ወርኢኩ ፡ አድባረ ፡ ቆባራት ፡ እለ ፡ ክረምት ፡ ወምክዓወ ፡ ማይ ፡ ዘኵሉ ፡ ቀላይ ።

8 ወርኢኩ ፡ አፉሆሙ ፡ ለኵሎሙ ፡ አፍላገ ፡ ምድር ፡ ወአፉሃ ፡ ለቀላይ ።