Chapter 14
Chapter 13 / Enoch / Chapter 14 Chapter 15

1 ዝመጽሐፍ ፡ ቃለ ፡ ጽድቅ ፡ ወዘለፋ ፡ ትጉሃን ፡ እለ ፡ እምዓለም ፡ በከመ ፡ አዘዘ ፡ ቅዱስ ፡ ወዐቢይ ፡ በይእቲ ፡ ራእይ ።

2 አነ ፡ ርኢኩ ፡ በንዋምየ ፡ ዘአነ ፡ ይእዜ ፡ እነግር ፡ በልሳን ፡ ዘሥጋ ፡ ወበመንፈስየ ፡ ዘወሀበ ፡ ዐቢይ ፡ አፈ ፡ ለሰብእ ፡ ይትናገሩ ፡ ቦቱ ፡ ወይለብዉ ፡ በልብ ።

3 ከመ ፡ ፈጠረ ፡ ወወሀበ ፡ ለሰብእ ፡ ይለብዉ ፡ ቃለ ፡ አእምሮ ፡ ወሊተኒ ፡ ፈጠረ ፡ ወወሀበኒ ፡ እዛለፎሙ ፡ ለትጉሃን ፡ ውሉደ ፡ ሰማይ ።

4 አነ ፡ ስእለተክሙ ፡ ጸሐፍኩ ፡ ወበራእይየ ፡ ከመዝ ፡ ያስተርኢ ፡ እስመ ፡ ስእለትክሙ ፡ ኢትከውነክሙ ፡ ውስተ ፡ ኵሉ ፡ መዋዕለ ፡ ዓለም ፡ ወኵነኔ ፡ ፍጽምት ፡ ላዕሌክሙ ፡ ወኢይከውነክሙ ።

5 ወእምይእዜ ፡ ኢተዓርጉ ፡ ውስተ ፡ ሰማይ ፡ እስከ ፡ ኵሉ ፡ ዓለም ፡ ወውስተ ፡ ምድር ፡ ተነግረ ፡ ይእሥርክሙ ፡ በኵሉ ፡ መዋዕለ ፡ ዓለም ።

6 ወእምቅድመ ፡ ዝንቱ ፡ ርኢክሙ ፡ ኅጕለ ፡ ውሉድክሙ ፡ ፍቁራን ፤ ወአልብክሙ ፡ ጥራያኒሆሙ ፡ አላ ፡ ይወድቁ ፡ ቅድሜክሙ ፡ በሰይፍ ።

7 ወስእለትክሙ ፡ በእንቲአሆሙ ፡ ኢይከውን ፡ ወበእንቲአክሙኒ ፡ ወአንትሙሂ ፡ እንዘ ፡ ትበክዩ ፡ ወታስተበቍዑ ፡ ወኢትትናገሩ ፡ ወኢምንተኒ ፡ ቃለ ፡ እምውስተ ፡ መጽሐፍ ፡ ዘጸሐፍኩ ።

8 ወሊተ ፡ ከመዝ ፡ ራእይ ፡ አስተርአየኒ ፤ ናሁ ፡ ደመናት ፡ በራእይ ፡ ይጼውዑኒ ፤ ወጊሜ ፡ ይጼውዐኒ ፤ ወሩፀተ ፡ ከዋክብት ፡ ወመባርቅት ፡ ያጔጕዑኒ ፡ ወያጽዕቁኒ ፡ ወነፋሳት ፡ በራእይ ፡ ያሰርሩኒ ፡ ወያጔጕዑኒ ።

9 ወነሥኡኒ ፡ ላዐለ ፡ ውስተ ፡ ሰማይ ፡ ወቦእኩ ፡ እስከ ፡ እቀርብ ፡ ኀበ ፡ ጥቅም ፡ ዘኅንጽት ፡ በእብነ ፡ በረድ ፡ ወልሳነ ፡ እሳት ፡ የዓውዳ ፡ ወወጠነ ፡ ያፍርሀኒ ።

10 ወቦእኩ ፡ ውስተ ፡ ልሳነ ፡ እሳት ፡ ወቀረብኩ ፡ ኀበ ፡ ቤት ፡ ዐቢይ ፡ ዘሕኑጽ ፡ በአዕባነ ፡ በረድ ፤ ወአረፍተ ፡ ውእቱ ፡ ቤት ፡ ከመ ፡ ጸፍጸፈ ፡ ሰሌዳ ፡ በአዕባን ፡ ዘእምበረድ ፡ ወምድሩ ፡ በረድ ።

11 ጠፈሩ ፡ ከመ ፡ ሩፀተ ፡ ከዋክብት ፡ ወመባርቅት ፤ ወማእከሎሙ ፡ ኪሩቤል ፡ ዘእሳት ፡ ወሰማዮሙ ፡ ማይ ።

12 ወእሳት ፡ ዘይነድድ ፡ በዓውደ ፡ አረፍቱ ፡ ወኆኅቱ ፡ ይውዒ ፡ በእሳት ።

13 ወቦእኩ ፡ ውስተ ፡ ውእቱ ፡ ቤት ፡ ወምውቅ ፡ ከመ ፡ እሳት ፡ ወቈሪር ፡ ከመ ፡ በረድ ፡ ወኢምንተኒ ፡ ፍግዓ ፡ ወሕይወት ፡ አልቦ ፡ ውስቴቱ ፤ ፍርሃት ፡ ከደነኒ ፡ ወረዓድ ፡ አኀዘኒ ።

14 ወእንዘ ፡ እትሀወክ ፡ ወእርዕድ ፡ ወደቁ ፡ በገጽየ ፡ ወእሬኢ ፡ በራእይ ።

15 ወናሁ ፡ ካልእ ፡ ቤት ፡ ዘየዐቢ ፡ እምዝኩ ፡ ወኵሉ ፡ ኆኅቱ ፡ ርኁት ፡ በቅድሜየ ፡ ወኅኑጽ ፡ በልሳነ ፡ እሳት ።

16 ወበኵሉ ፡ ይፈደፍድ ፡ በስብሐት ፡ ወበክብር ፡ ወዕበይ ፡ እስከ ፡ ኢይክል ፡ ዜንዎተክሙ ፡ በእንተ ፡ ስብሐቲሁ ፡ ወበእንተ ፡ ዕበዩ ።

17 ወምድሩሰ ፡ እሳት ፡ ወመልዕልቴሁ ፡ መብረቅ ፡ ወምርዋፀ ፡ ከዋክብት ፡ ወጠፈሩኒ ፡ እሳት ፡ ዘይነድድ ።

18 ወነጸርኩ ፡ ወርኢኩ ፡ ውስቴቱ ፡ መንበረ ፡ ልዑለ ፤ ወራእዩ ፡ ከመ ፡ አስሐትያ ፡ ወክበቡ ፡ ከመ ፡ ፀሐይ ፡ ዘያበርህ ፡ ወቃለ ፡ ኪሩቤል ።

19 ወእመትሕተ ፡ መንበሩ ፡ ዐቢይ ፡ ይወፅእ ፡ አፍላገ ፡ እሳት ፡ ዘይነድድ ፤ ወኢይክሉ ፡ ርእዮቶ ።

20 ወዐቢየ ፡ ስብሐት ፡ ይነብር ፡ ላዕሌሁ ፡ ወዐጽፉሰ ፡ ዘይበርህ ፡ እምፀሐይ ፡ ወይፀዐዱ ፡ እምኵሉ ፡ በረድ ።

21 ወኢይክል ፡ ወኢመኑሂ ፡ እመላእክት ፡ በዊአ ፤ ወራእየ ፡ ገጹ ፡ ለክቡር ፡ ወስቡሕ ፡ ኢይክል ፡ ወኢመኑሂ ፡ ዘሥጋ ፡ ይርአይ ፡ ኪያሁ ።

22 እሳተ ፡ እሳት ፡ ዘይነድድ ፡ በዓውዱ ፡ ወእሳት ፡ ዐቢይ ፡ ይቀውም ፡ ቅድሜሁ ፡ ወአልቦ ፡ ዘይቀርብ ፡ ኀቤሁ ፡ እምእለ ፡ ዓውዱ ፡ ትእልፊተ ፡ ትእልፊት ፡ ቅድሜሁ ፡ ወውእቱሰ ፡ ኢይፈቅድ ፡ ምክረ ፡ ቅድስተ ።

23 ወቅዱሳን ፡ እለ ፡ ይቀርቡ ፡ ኀቤሁ ፡ ኢይርኅቁ ፡ ሌሊተ ፡ ወመዓልተ ፡ ወኢይትአተቱ ፡ እምኔሁ ።

24 ወአነ ፡ ሀለውኩ ፡ እስከ ፡ ዝንቱ ፡ ዲበ ፡ ገጽየ ፡ ግልባቤ ፡ እንዘ ፡ እርዕዱ ፡ ወእግዚእ ፡ በአፉሁ ፡ ጸውዐኒ ፡ ወይቤለኒ ፡ ቅረብ ፡ ዝየ ፡ ሄኖክ ፡ ወለቃልየ ፡ ቅዱስ ።

25 ወአንሥአኒ ፡ ወአቅረበኒ ፡ እስከ ፡ ኆኅት ፤ ወአንሰ ፡ ገጽየ ፡ ታሕተ ፡ እኔጽር ።