Chapter 13
Chapter 12 / Enoch / Chapter 13 Chapter 14

1 ወሄኖክ ፡ ኀሊፎ ፡ ይቤሎ ፡ ለአዛዝኤል ፡ ኢይከውነከ ፡ ሰላም ፡ ዐቢይ ፡ ኵነኔ ፡ ወፅአ ፡ ላዕሌከ ፡ ይእሥርከ ።

2 ወሣኅት ፡ ወስእለት ፡ ወምሕረት ፡ ኢይከውነከ ፡ በእንተ ፡ ዘመሀርከ ፡ ግፍዐ ፡ ወበእንተ ፡ ኵሉ ፡ ምግባረ ፡ ጽርፈት ፤ ወግፍዕ ፤ ወኀጢአት ፤ ዘአርአይከ ፡ ለውሉደ ፡ ሰብእ ።

3 አሜሃ ፡ ሐዊርየ ፡ ነገርክዎሙ ፡ ለኵሎሙ ፡ ኅቡረ ፤ ወእሙንቱ ፡ ፈርሁ ፡ ኵሎሙ ፡ ፍርሃት ፡ ወረዓድ ፡ ነሥኦሙ ።

4 ወተስእሉኒ ፡ ተዝካረ ፡ ስእለት ፡ ከመ ፡ እጽሐፍ ፡ ሎሙ ፡ ከመ ፡ ይኩኖሙ ፡ ኅድገተ ፡ ወከመ ፡ አነ ፡ አዕርግ ፡ ተዝካረ ፡ ስእለቶሙ ፡ ኀበ ፡ እግዚአብሔር ፡ ሰማየ ።

5 እስመ ፡ ኢይክሉ ፡ እሙንቱ ፡ እምይእዜ ፡ ተናግሮ ፡ ወኢያነሥኡ ፡ አዕይንቲሆሙ ፡ ውስተ ፡ ሰማይ ፡ እምኃፍረተ ፡ አበሳሆሙ ፡ ዘተኰነኑ ።

6 ወአሜሃ ፡ ጸሐፍኩ ፡ ተዝካረ ፡ ስእለቶሙ ፡ ወአስተብቍዖቶሙ ፡ በእንተ ፡ መንፈሶሙ ፡ ወለለ ፡ ፩ምግባሮሙ ፡ ወበእንተ ፡ ዘይስእሉ ፡ ከመ ፡ ይኩኖሙ ፡ ስርየተ ፡ ወኑኀተ ።

7 ወሐዊርየ ፡ ነበርኩ ፡ ዲበ ፡ ማያተ ፡ ዳን ፡ በዳን ፡ እንተ ፡ ይእቲ ፡ እምየማነ ፡ ዓረበ ፡ አርሞን ፡ ወእነብብ ፡ ተዝካረ ፡ ስእለቶሙ ፡ እስከ ፡ ደቀስኩ ።

8 ወናሁ ፡ ሕልም ፡ መጽአኒ ፡ ወራእያት ፡ ዲቤየ ፡ ወድቁ ፡ ወርኢኩ ፡ ራእየ ፡ መቅሠፍት ፡ እንግር ፡ ለውሉደ ፡ ሰማይ ፡ ወእዛለፎሙ ።

9 ወነቂሕየ ፡ መጻእኩ ፡ ኀቤሆሙ ፡ ወኵሎሙ ፡ ጉቡዓነ ፡ ይነብሩ ፡ እንዘ ፡ ይላሕዉ ፡ በኡብልስያኤል ፡ ዘሀለወት ፡ ማእከለ ፡ ሊባኖስ ፡ ወሴኔሴር ፡ እንዘ ፡ ግልቡባን ፡ ገጾሙ ።

10 ወተናገርኩ ፡ በቅድሜሆሙ ፡ ኵሎ ፡ ራእያተ ፡ ዘርኢኩ ፡ በንዋምየ ፡ ወወጠንኩ ፡ እትናገር ፡ ውእተ ፡ ቃላተ ፡ ጽድቅ ፡ ወእዝልፍ ፡ ለትጉሃነ ፡ ሰማይ ።