Chapter 12
Chapter 11 / Enoch / Chapter 12 Chapter 13

1 ወእምቅድመ ፡ ኵሉ ፡ ነገር ፡ ተከብተ ፡ ሄኖክ ፡ ወአልቦ ፡ ዘየአምሮ ፡ እምውሉደ ፡ ሰብእ ፡ በኀበ ፡ ተከብተ ፡ ወኀበ ፡ ሀሎ ፡ ወምንተ ፡ ኮነ ።

2 ወኵሉ ፡ ግብሩ ፡ ምስለ ፡ ቅዱሳን ፡ ወምስለ ፡ ትጉሃን ፡ በመዋዕለ ፡ ዚአሁ ።

3 ወአነ ፡ ሄኖክ ፡ ኮንኩ ፡ እባርኮ ፡ ለእግዚእ ፡ ዐቢይ ፡ ወለንጉሠ ፡ ዓለም ፡ ወናሁ ፡ ትጉሃን ፡ ይጼውዑኒ ፡ ሊተ ፡ ለሄኖክ ፡ ጸሓፊ ፡ ወይቤሉኒ ።

4 ሄኖክ ፡ ጸሓፌ ፡ ጽድቅ ፡ ሑር ፡ አይድዕ ፡ ለትጉሃነ ፡ ሰማይ ፡ እለ ፡ ኀደጉ ፡ ሰማየ ፡ ልዑለ ፡ ወምቅዋመ ፡ ቅዱሰ ፡ ዘለዓለም ፡ ወምስለ ፡ አንስት ፡ ማሰኑ ፡ ወገብሩ ፡ ዘከመ ፡ ይገብሩ ፡ ውሉደ ፡ ሰብእ ፡ ወነሥኡ ፡ ሎሙ ፡ አንስተ ፡ ወማሰኑ ፡ ዐቢየ ፡ ሙስና ፡ በዲበ ፡ ምድር ።

5 ወኢይከውን ፡ ሎሙ ፡ በዲበ ፡ ምድር ፡ ሰላም ፡ ወኅድገተ ፡ ኀጢአት ፡ እስመ ፡ ኢይትፌሥሑ ፡ በውሉዶሙ ።

6 ቀትለ ፡ ፍቁራኒሆሙ ፡ ይሬእዩ ፡ ወዲበ ፡ ሐጕለ ፡ ውሉዶሙ ፡ ይግዕሩ ፡ ወይስእሉ ፡ ለዓለም ፡ ወኢይከውን ፡ ሎሙ ፡ ምሕረት ፡ ወኢሰላም ።